ذكرى الحبيب...

ِِالليله ذكرى ثلاث سنين من يوم افترقنا..
الليله تذكرت أحلى سنين من يوم تفارقنا..
الليله وكل ليله أشعل شمعه و أخليها..
أراقبها أنا والليل..
تتعذب .. تشعل ظلامي .. و تموت..
و أتذكر بمعاناتها معاناتي..
تواسيني بشجنها..
و أواسيها بألحاني..
تلعب بلهيبها رياح الليل..
و تتمايل مع هبايب الريح..
مثل جفني..
كلما حاولت أغفي..
تلعب به رياح الليل..
و يفز .. يودع راحتي و الأمان..
فتيل الشمعه كأنه لا نهائي..
و فتيل جفني ذكريات و أماني..
مثل هذي الليله .. كتبنا بدموع الشغف حكايتنا..
شخصين في العالم .. احبو بعضهم بجنون..
و عاشو ربيع العمر ولا يدرون..
ان السعاده مجرد لحظه..
و حكايتهم نجمه في مجره..
غيرها آلاف النجوم..
تتعذب .. تشعل الظلام .. وتموت..
الليله ذكرى ثلاث سنين.. لياليها شموع..
تتعذب و أتعذب..
تشعل ظلامي .. و يسهر غرامي..
وتموت الشمعه .. وتحيا الدمعه..
على خد عاشق ما لقى غير الهموم..
يرسل على أطياف الحنين آهات مكتومه..
يكتب لحبه القديم أبيات مغبونه..
يكتبها على صفحة الفضاء .. وتضيع..
ينقشها على صخر القفار .. وتضيع..
مسكين يا حرفي الشقي أفناك الضياع..
مشرد و غريب .. لا ثريا و لا قاع..
و مسكين يا عاشق وهم أفنيت الدموع..
تنثر دموعك قهر و تخطفها الشموع..
و تضيع مع نورها..
و تتعذب .. و تشعل ظلامك .. وتموت..
مثل هذي الليله .. من ثلاث سنين تفارقنا..
كان مع الفراق موعدنا..
توادعنا .. و ودعنا آخر فصول الروايه..
كتبنا بدموع الحسره كلمة النهايه..
و تفارقنا..
و تركنا على صفحات الأيام شمعه..
تضوي ظلام الذكريات..
و تسامرنا في الأمسيات..
و تجلي عن العيون السبات..
و تداعب في دواخلنا الأمنيات..
اننا في يوم من الأيام تلتقي أقدارنا..
و نكتب على جبين الدنيا روايه جديده..
أنت فيها البدايه و النهايه..
و أنا عاشق يعيش كل أيامه سعيد..
و انت يا أحلى ما في الوجود..
تخطي بابتسامتك فصول الروايه..
ونعيد كتابة الأحداث من البدايه..
لا عتاب ولا فراق..
كلها وصل و اشتياق..
لكنها أمنيه.. و أحلى أمنيه..
أشعلتها شموع..
و قتلتها دموع..
حبيبي..
هذي الأمنيه.. في كل ليله..
تتعذب .. وتشعل ظلامي .. وتموت..