| التميز خلال 24 ساعة | |||
 العضو الأكثر نشاطاً هذا اليوم |
الموضوع النشط هذا اليوم |
المشرف المميزلهذا اليوم |
المشرفة المميزه |
 |
صور الذكاء الاصطناعي
بقلم : نسمات  |
 |
 |
| كلمة الإدارة |
 |
|
|
||||||||
|
||||||||||
 |
|
 |
||||||||
 « آخـــر الـــمـــشـــاركــــات » |
 الإهداءات |
|
|
أدوات الموضوع | انواع عرض الموضوع |
09-30-2009, 06:32 PM
|
#1 | |
|
32 قصيده للأمير/طلال الرشيد الله يرحمة
1-قصيدة اللقب
يـا صغيّـر مـا يكبرنـا لقـب وما يصغرنا إليا أنكرنا صغيـر ما خذينا الصيت من جمع الذهب ولا نسابة شيـخ او قربةوزيـر كاسبينه من هل السيـف الحـدب الجنايز كان مـا جـاك النذيـر صيتهم نجم ٍ على رأسـه لهـب سمعوا الصقهان به واجهر ضرير بالوفا تاريـخ أبيـض ينتصـب لا حكوا بالحق حييـن الضميـر ضيغميـن للسناعيـس انتسـب لابةٍ طلنـا بهـا عـرش كبيـر عند حدك يا كثير الهـرج تـب لا تمر النـار وثيابـك حريـر كـان لـك عـز بذلـي فتعقـب والله ألا تبطي وحبلـك قصيـر احسبنك مـن صناديـد العـرب واثر ساترتك عباتك يـا غريـر ما حسب للسوس زراع القصـب والقراده ما درى عنهـا البعيـر ولو حسبنـا للحسايـف والتعـب ما بذرنا يا العصافيـر الشعيـر عن هللـك ابـراي لله واحتسـب الرجال اللـي مجارهـم عسيـر من قريش المصطفى وابو لهـب والدغالب ما غشت عذب الغديـر للرجال مـن الرجاجيـل العتـب والزكاة تحل فـي حـال الفقيـر لعنبـو وقـتٍ غدينابـه حطـب تحرقـه نـار يثورهـا اجـيـر ما ألومك والزمن سوى العجـب هو بقى غير الكرامـه بالجفيـر مـا أذل وراسـي يشـم المهـب لو بقى من شمـر طفـلٍ غريـر ما اهاب ولا يزلزلنـي غضـب الشجاعـه ورث العاقـل غزيـر يا صغيـر مـا يكبّـر باللقلـب غير من هو كان من دونه صغير 2-عـــلـــمـــتـــنــــي علمـتـنـي وشـلــون احـــب علـمـنـي كـيــف انــســى يابحر ضايع فيه .. الشـط والمرسـى علمـتـنـي وشـلــون احـــن علـمـنـي كـيــف اقــســى سير علي .. بس امسح دموعي وروح سير علي .. جب لي معك قلب وروح سير علـي .. اذا تذكـرت الجـروح ياطـاغـي النـظـرة .. خـطــا تـجــزى بهالـبـخـل الـعـطـا وانا اللي اهديتك أمن.. عيـن وجفـن هـــذي فـــراش وذا غـطــا يـاجـرح مــن ويــن ابـتـدي وانــت مـعـي مــن مـولـدي وعيت يدي .. على وداعـك تهتـدي بــس انــت علمـنـي الـجـفـا دامني عجزت اعلمك .. كيـف الوفـا علمتني كيف السهر .. ونسيتني الممسى علمـتـنـي وشـلــون احـــب علـمـنـي كـيــف انــســى 3-جــــــــــــتنــــي جتني وشافتهـا عيـون حايـرات ذا شعاع الشمـس او هـذا سناهـا ضاعوا اللي جوا معاها مسيـرات واقبلت تمشي تقـل محـدٍ معاهـا ياسنـا الفضـه وياجيـد المهـات ياشذى نبت الخزامى فـي وطاهـا قلت كن بوجنتـك زهـر النبـات قالت ان الرمش يجرح لي صفاهـا تجرح الظلمـا عيـون ناعسـات سلهمت وأغضت تغطرس في بهاها حققوا بالشوف فـي لـون الشفـاة هو خذا منها الشفـق والا عطاهـا ولو ظلام الليـل يعطينـا ثبـات فيه من لون الشعـر والا كساهـا كيف أباصف زين كاملة الصفـات كيف أباصل في حروفي منتهاهـا 4-آخـــر الحب كنت احسب اني عرفت الحب قبل اعرفك وعشقت قبل اعشقك واشتقت قبل التقيـك وكنت احسب اني لقيت احباب قبل اوصلك واثري توهمت في غيرك وانا كنت ابيك تعال نعطـش وتشربنـي وانـا اشربـك تعال قبل الوعد اجلـس معـي نحتريـك تعال شفني وانـا استنـاك كـم اشبهـك يطري علي الف راي و راي واحتار فيك اجي مكان الوعـد والا اسبقـه انطـرك والا آخذ الموعد اللي يحتريـك واجيـك يا آخر الحب ذقـت الحـب فـي اولـك ويا اول الشوق اقصى الشوق ما ينتهيـك علمتني كيف اعرفك لين صرت اجهلـك ضيعتني في متاهاتـك وكنـت ارتجيـك حبيـب الاحـلام يابعـدك ويامقـربـك حرام يكفـي تبعثرنـي وانـا احتويـك ان شفتك بحلم صدقتـه وانـا اتوهمـك وان شفتك بعلـم كذبتـه اليـن انتشيـك اخاف اغمض عيوني وان رمشت افقـدك واخاف افتح وتصبـح حلـم ولا التقيـك 5-قال حاقد قال حاقد قلـت يـا جاهـل هلـي كيف باطرف باصبعي عيني واصيح انت مثـل ابليـس حقـرك الولـي لا تسـر ولا تـريـح وتستـريـح من يصدق بي وانا الشمـس عملـي مـا يذريهـا عجـاج جـاب ريـح لو يطيعـك بـي غريـر يجهلـي ما تطيعك روسهم بـي يـا كليـح هم هلي يـا جاهـل وهـم منهلـي لو تضيق القى بهـم كـون فسيـح عودهم لـه طاعـة واجـب علـي شيخنـا اللـي مـا يوفيـه المديـح ما سفهت مـن العقـول الا الخلـي وما حقرت مـن الكـلام الا النبيـح الصباخـي مـا تـربـع بالـولـي والـردي للطيـب جحـاد شحيـح والعتـم لا بــد يــوم ينجـلـي واسود النيـة يجـي يـوم ويطيـح الردى بعـد السمـا عـن مدهلـي ما تعلمـت اجـزي الطيـب بقبيـح شمت عنك ابـي المراجـل منزلـي وفي ضلوعي شايـب عيـا يبيـح ما اعتلي بالشعر هـو بـي يعتلـي دام ميزانـي بحـسـادي رجـيـح لا تصدق في حصانـك يـا جملـي كنت انا وما زلت وابطي لك نصيح ما عرفت الغـي واخفيـت جهلـي علمونـي مستبيحـيـن المـريـح لـو تبيـن قلـت خلـوا ذاك لـي بس دامـك كالنسـا مالـي نطيـح قـل مـادام انـي بكذبـك مبتلـي كل كـذب دام هـو فنيـي صحيـح ما اخبـر مـن الذنـوب الا هلـي ذنبي اللـي يرفـع الـراس الفليـح 6-كل العواذل تشابه حبيبتـي كـل الـعـواذل تشـابـه قلبٍ ظلام ووجه يشبـه للأصحـاب ولامن غدى لك صاحبٍ ينحكى بـه لا تسمعين ان كان لك قلب وأحبـاب الى مشيت الـدرب يلهـث سرابـه والى سكنت الـدار نادانـي البـاب وشلون أنـام وهـم قلبـي صوابـه والشوك ينبت بين جفنيـن وأهـداب تعبـن أمنّـي الأسئلـة بالإجـابـه وأنطر شروق الشمس والشمس بغياب وتعبـت أناظـر والمعنـى عذابـه انك بعيده والمـلا دونـك حجـاب أجمع كـلام ومـا أعـرف الكتابـه وعندي شعورٍ صدق والوقت كـذاب وكل النجوم إلى أمطرت من سحابـه حبيبتي دمعك جرح قلـب وتـراب واللي وقف ما بيـن بابـي وبابـه قلبه ظلام ولابسٍ ثـوب الأصحـاب 7-عيـــــون الحــــــب عيون الحب لا يمكـن تناظـر عيوب الخل لوهو عيـب كلـه تماري فيه وبوصفـه تكابـر ترى من فوق خلـق الله محلـه رفيق الليل في الشبـاك ناطـر واثـاري الليـل شبـاك لخلـه حفظ احلى الكلام وصار شاعر بصبر ينتظـر والصبـر ملـه حبيب عشت في دنيـاه عابـر حسب قوله ويا شعـري فقلـه انا ضحيت له وارجي وصابر واذا عيـا اقـول الله يحـلـه على الملتاع الا يا بعـد باكـر يبي السلوان والذكـرى تظلـه صحيح ان الهوى سحر المشاعر يراه الصـب عـز لـو يذلـه عيون الحب في قلبـي تناظـر تشوف اللي عيوني مـا تدلـه 8-حبيبتــــــي حبيبتـي لا مـن غديتـي لـي سـراج اتبعـه وكني غديت من الضما اركض ويطردني السراب لا تبخلين اليا شربتك مـا شربتـك مـن سعـه دامي من جروح الهموم الموجعه كلـي صـواب اليـوم مرتنـي السوانـي والفصـول الاربعـه اليـوم مريـت الموانـي والمبانـي والسحـاب اليوم ما كني لقيت مـر صوتـك مـا اسمعـه اليوم ما كنـي فقدتـك مـن سؤاليـن وجـواب يا بنت في خدك وهج سيل الشمـوس الساطعـه احرق بداخـل داخلـي انسـان ماهـو للتـراب واللي خلـق ظلمـا الليالـي بالعيـون الهاجعـه اني من الحرمـان اتسـاءل وحرمانـي جـواب يـوم الـوداع اتخيلـي مالـي حبيـب اوادعـه محروم انا و تخيلي محروم حتـى مـن العـذاب يا بنت لـي قصـه تطـول بكلمتيـن موجعـه هي باختصار اني انا اركض ويطردني السراب 9-حكوا فيها حكوا فيها .. خذوا في طاري الحلوه .. وجابوا.. مسيكينه .. بسيرتها تنابوا.. واظن الصدق لشفاهم .. ابد ماهو قريب.. بشر يامصعب رضاهم .. وانا مالي حسيب.. انا سايق عليك الله لاجل الله يا شامت.. تخلي الشوك من يدك ولا تطرف عيون كحلت بالزين.. لا نامت انا افداها اذا ودك .. يا هل ترى انتي وين يا بنت الشفاة؟.. انا ادور عليك بصورتك.. وينك؟.. انا كني لمست رداك وايدينك .. ما شفتك بكل الكلام.. شفتك على سجادتك.. كنك تصلين القيام.. وليلك سرا بعبادتك.. ما اصدقه .. والهرج ابد ماهو دليل.. ما اصدقه .. يا عل يفداك الذليل.. الله يستر خوافيها.. اللي حكوا فيها.. 10-يـا بعـــــد حـــيــــي اليوم يا بنـت مـن زيـي الشمس واردت على ضيي جيت انتخي بالوجيه البيض يا عزوتي يا بعـد حيـي الجادل اللي حلاهـا غيـر ضيعت في شمسهـا فيـي بعيونها سلسبيـل رمـاح والموت بالسـود متهيـي موت وانا اموت انا بالموت كثيرهـا غـرق شويـي لا قلت تكفين قالت جـاك وان جيتهـا فجـأه تعيـي ولا قلت مالي و مال الغيد قالت وهم بينهـم زيـي؟ وان قلت انا تبت مالي كار مقفي زمانين عـن غيـي قالت وهي تلتفـت للنـاس طلال موته علـى يديـي 11-ذكرى الفراق اليوم ذكرى الفراق ومرت أول سنه اليوم لي عام متغرب وحيد وحزيـن اليوم أنا ضيف جرحي جيت باطمنه إني جمعت الدموع وجبت أمانة أمين ما يجرح الصادق إلا غدر مين يامنه لاحت من احباب قلبك لا نلوم السنين مليت من هالاماني دام مهي ممكنـه لاهي تحقق ولا ياسي بوجهي يبيـن لو ين أنا وأنت مثل الشمس والأزمنه مع كل صبح يجدد في لشمسك حنين لا قلت أحبك أحبـك كنهـا دندنـه أو كنها وردة ما بين أصابع جنيـن يا اجمل الناس لك بين الملا هيمنـه كثير غيرك ولكن مين مثلك ووين؟ يا عاذلي خذ عيوني يمكـن تثمنـه تشوف عيبه وانا اشوفه ملاك حسين امس افترقنا وأنا أحسـب أول سنـه يا طولها ليلة الفرقة سنـه للحزيـن 12-يــــاطــــاهــــرة يا بنت أنا ماني كذا وظنونـك تكّـذب عليـك كلّي عيوب وماقوت تخجلني ظنونـك وأتـوب أكذب عليك ودوم أخونك وألبس الأبيض وأجيك وأعشق معك ألفين وجه ويمتلي صدري قلـوب أحلى الكلام أقول لك لـو قلتـه البـارح لذيـك ياقف على شفاهي معك مراهقِِ صـبِ لعـوب أكذب ولا أدري ليه أكذب أعشقك مـا أرتجيـك أخاف من صدق الحقيقة في الهروب من الهروب والله أحبك وأعشقك وأعرف زمان انـي أبيـك لكنهـا هـذي الحيـاة اتعلمـت منـا الذنـوب العين عجزت تعتقـك القلـب عيّـى يشتريـك في السجن خيّال وفي في الصدر رجّال كـذوب هذي الحقيقة ما يجي في الكون أطهر من يديـك وانا الذي أنقض وضوء الغيم والمـا والهبـوب أنقل عيوبي فوق متني وانت لك عيبك شريـك وباكر تبسم لـي وجيـه لـك يعبسهاالشحـوب يا طاهره حنـا كـذا المظهـر يكـذب عليـك يمكن يجي يوم أخجـل مـن ظنونـك نتـوب 13-يازمان الذل يا زمان الذل.. زل.. ما بقى في الناس شيمه وما بقى للعدل خِل ومن كثر ما حنا صغرنا صرنا حتى بدون ظِل صرنا ما نملا المحِل صرنا أمه تحتقرنا كل أرذال الأمم لاتصدق ياعزيزي بالعروبه شيخ بوش يكفي هزأتو القيم يا زمان الالمبادىء يكفي أحرجت العروش الكرامه يا طويل العمر ما تكفي النعوش يا زمان البيت الابيض إنت مالك أمر يرفض تبغى هذا الدين أطول تبغى هذا الشرع أعرض إنت إكتب وإحنا نحفظ مو غريب لو نَحَسْب الخبث طيب ومو غريب نصرخ ولا من مجيب ومو غريب لو يكثر أعداد الأرامل فبلاد ما ترضى الهوان وحكومة ما تعرف تجامل ومو غريب لو تعتبر حتى عصا الكهل العجوز أسلحة دمار شامل يا زمن نهب المتاحف جانا جيش الحقد زاحف جتنا لعلوج الزواحف فتشوا حتى العقول وأسلحتنا في المصاحف!! يا زمن أمريكا شكراً أنتزعت الأقنعه إنت ازلت الأقنعه وانكشف وجه النوايا واتجاه الاشرعه ما نصدقهم خلاص وما بقى من نسمعه كل ذولا إمعه بس خلك مستريح الصحيح يوم هب الحقد من واشنطن ولندن كذب باسم المسيح الكل فضل ينحني وبغداد اختارت تطيح يا زمان الازمنه خليك شاهد إحنا مو ناقصنا واحد هو صلاح الدين احنا ألف مليون واحد هم صلاح الدين حنا بس بعيب واحد هو.. فساد الدين يا زمان الذِل حِــل قلت لك مالك حل 14-أحساسي غريب . الـلـيله احـسـاسي غـريـب عـاشـق وانــا مـالي حـبيب حـبيت ... كـل الـناس لاموني حـبيت ... كـل احبابي باعوني قـلـت احـب الـحب احـسن قـلـت احـب الـحب اضـمن لا احــــن .. ولا اتــــوه ولا بـعـد فــي يـوم احـزن رضـيـت بـاقداري ونـصيبي صــرت مـحـبوب الـحبايب وصــار كـل عـاشق حـبيبي الــلــيـلـه غـــيـــر شـــعــوري غـــيــر اشـــواقـــي غـــيــر حــتـى الاغــانـي غـيـر صدري سما .. واحساسي ... طير بـــس طـيـفك مـاتـركني ظــل سـاكـن تـحت جـفني كــــــان وافــــــي كــان يـذكر .. وانـت جـافي انــــــت ويـــنــك ؟ كـان هـذا الـفرق مابيني وبينك جـيـتـني تـشـكي الـزمـن وجـيـتـك أبـــي أدفـــى لـقـيت فــي قـلـبي وطـن ولـقـيـت بـــك مـنـفـى 15-جتني جتني وشافتها عيون حايرات" " ذا شعاع الشمس او هذا سناها ضاعوا اللي جوا معاها مسيرات" " واقبلت تمشي تقل محدٍ معاها ياسنا الفضه وياجيد المهات " " ياشذى نبت الخزامى في وطاها قلت كن بوجنتك زهر النبات" " قالت ان الرمش يجرح لي صفاها تجرح الظلما عيون ناعسات" " سلهمت وأغضت تغطرس في بهاها حققوا بالشوف في لون الشفاة " " هو خذا منها الشفق والا عطاها ولو ظلام الليل يعطينا ثبات" " فيه من لون الشعر والا كساها كيف أباصف زين كاملة الصفات " " كيف أباصل في حروفي منتهاها 16-تنهيدتين ونار كـلـّمـنـي عـنّـك أبعرف كل شيٍ عنّك منّك قلـّي وش أول جروحك قلـّي وش آخر أمل ترجيه روحك إحكي عن طبعك وعن ربعك عن اللي يهـزّ دمعك قلـّي وش معنى الحياة قلـّي بأنفاسك متى قد قلت آه إحكّ لي عن الحب إحكّ لي .. إحكّ لي إحكّ لي عن الشوق طـر بـي فوق .. فوق خـذنـي منّك وإحكّ لي .. عنّك الـصـدق إن الأمل من قبل أعرفك .. كذب والتضحيه أوهـام وإني أنا من قبل أعرفك كنت أعرف أنـام كان السهـر مـو هـالسهـر لعب .. و أغانـي .. و إخـتصار صار السهـر تفكير صار إنتظـار صار إحتظـار صار السهـر .. تنهيـدتيـن ونـار * * * يا منتهـى أمـري بالهمس قلـّي مرّه يا عمـري وطـر بـي فوق .. فوق خـذنـي منّك وإحـكّ لـي .. عـنّـك 17-♥♥ عيـون الحب ♥♥ عيون الحب لا يمكن تناظر ..... عيوب الخل لو هو عيب كله تماري فيه وبوصفه تكابر ..... ترى من فوق خلق الله محله رفيق الليل في الشباك ناظر ..... واثاري الليل شباك لخله حفظ أحلى الكلام وصار شاعر ..... بصبر ينتظر .. والصبر مله حبيبٍ عشت في دنياه عابر ..... حسب قوله ويا شعري فقله أنا ضحيت له وارجى وصابر ..... واذا عيا أقول الله يحله على اللي ينتظر يا بعد باكر ..... يبي السلوان والذكرى تضله عيون الحب في قلبي تناظر ..... تشوف اللي عيوني ما تدله 18-ماقلت أحبــكـ ما قلت احبك ولا قد قلت ما حبك ... احب مالي عيوني وانت تـسـواها لو تدري اش كثر تعني لي تعرف انك .... اخر امل في حياتي واول مناها ياكثر احس ان بك مني وبي منك ... روح قسمها على شخصين مولاها لا تقول وش تحب فيني اعشقك كلك .... من ليل شعرك لكلك واخر اقصاها سميتني نصـفــك الثاني ويا شحـــك ... انا بسمـيـــك كلي وانــــت معناها تعبت اوديك له يا قلب ويردك ... لا اخذ حلومي ولا خلاني انـســاها كل الحمام استراح وناح في ظلك ... والورد الاصفر سقته الروح من ماها ليتك بعمري ثلاثة اشخاص ماملّك .... واحد معي دوم وواحد روحي يملاها والثالث بجفن عيني لا فقد حسك ... او غمض الجفن جاني فيك يتباهى مو بس احبك انا والله من حبك ... احب حتى ثرى الارض اللي تطاها 19-ضيّعتْني ضيّعتْني شريتك إنت بكلّ شيّ وبعتني ولا نسى يوم إنّي.. انا هلّيت بك ودّعتني يا آخر الأبواب.. من ودّع ببسمة حزن.. أحبابه غيري؟ يا آخر الاحباب.. من قفّلوا في وجهه الأبواب غيري..؟ يا آخري بالله.. ليه ضيّعتني؟ الحب.. ضياع.. وإن كان ما صدّقتني.. شفني ألــــم.. وأقول لو حلّفتني.. إوصفني ليت أقدر أختار أحبابي يبرى صوابي وما كان قلت من الندم كلّه من أسبابي ويا غايتي باللَّه.. ليه ضيّعتني؟ لا .. لا للندم لا للألم لا للسؤال اللّي يحيرني جوابه مسكين.. من صدّ وبكى كلنٍ درا به .. إلا أحبابه يـ معذّبي.. واهوى عذابه دنياي وعيونك تشابه حبيبي.. لا والله أكثر من حبيبي ناسي وهلي.. وأصحابي وربعي وقريبي باللَّه.. ليه ضيّعتني....؟ 20-بيني و بينك بينــي وبينــك عرفت المـــوت تـحــب والحـــظ مـتجنـــــي تبــي الصـــــدق حبها منحوت واصبحت منهـا وهي منــي افــرش لها القـلب باليـــاقوت واقــــــول يـــادلي اتمنــــي صــدري قصور ومدن وبيوت وهي المليك اللي يحكمنــي ياويــــــل ويلي عليهــا صـوت تحكي تقـــــل كنهــــا تغنــي وسكوتها غيــــر كــل سكـوت كــــل شي فيهـــا يكلمنـــــي قد شفت شمس زرعوها توت بشفاتهــــا التـــوت متثنـــي ياحــلوهــــا والقلــــم مبهوت وش يكــتب بوصفها عنـــي هي دنيتي والهـــوي والقوت وان غبت عن وجهها كنــي متغـــربٍ وغـربتي تــــــابوت ميــــت وانــــا حي مستنــي قولو لهـــا لو يفــــوت الفوت هـــو ينفع الصوت متعنـــي وقولو لهـــــا والله الآ مــوت لـــو خــاب في حبهـا ظنـــي 21-ذهــول اللقـــــا انتهى الموعد و انا تو ابتديت اجمع احساسي من ذهول اللقا ذبت من نار الحنان وما دفيت والشتا ضيع ظنون اللي هقـا قلت كل اللي ابيه وما حكيت كل حكي الشوق لعيوني رقـا تهت وبرعشة يديها اهتديــت وش قضى من عمر حلمي وش بقا انتشي..واذا نوت تمشي شكيـت للزمان بساعتي طوول الشقـــا وين بلقاها بعد هذا .. وليـــت ضاع معها الوقت بذهوووول اللقـا 22-أوعدك أوعدك .. ان كان بعدي يسعدك الليله ارحل من الليله باختار الطريق من الليله الليل الرفيق وأوعدك ماأعاتب أو الوم .. إلانفسي ومادام في قلبٍ معك أوعدك حبيبتي ياليت ماأقولك ياليت وماقد تمنيت وشكيت حبيبتي ويلي لامن غدى جسري أنا لنسيانك انتي ذكرياتي حبيبتي مأصعبه نسيان ذاتي ولا أقوم .. أوعدك سريت عن الليل اللي فعيونك عن بلادك سريت وأوعدك اني اقول اني نسيت بس أوعديني لازارني طيفك وأنا وحدي أني ماابكي وانك بقلبي تموتي وأنك على عيوني تفوتي وماأعرفك وأوعدك اني من الليله أموت من يوم أقوم أودعك أوعدك 23-لــــحن بـــــدو حنا ولا من قلت حنا تحنا كل الكلام بعطر تاريخ الاجداد المجد هم وهام فينا وغنا حتى علينا من على روس الاشهاد يا كبر حظ الي نخانا و ثنا نشد له فوق الفخر سرج وشداد ان هلل التاريخ غطرف وطنا وان سولفو عنا رجاجيل واجواد وان بان لك شمس ترى ذيك حنا نشرق مدام الظلم ظلما وحساد يا بنت يمي كان رمشك تمنا اشق لك ثوب السماء جود وعناد واشدلك زملً جفن المعنا واسري بوجهك لاغشى وجهي سهاد يا حلو قدك يوم قدك تفنا محدا تغنى فيك من خوف الالحاد حنا البدو يابنت هذا لحنا نحب اكثر لاغدى حبك جهاد وحنا البدو يا بنت لامن نخنا بناتنا يثالث العيد الاعياد وحنا البدو يابنت وان قلت حنا فاح الكلام بعطر تاريخ الاجداد 24-مرثية بمحمد الدره اذن الطفل محمد فجر صبح الشهداء وانجلى من ساره النور كطهر الانبياء هذه الشمس تشوق القدس شوقا للشروق سوف تجلو ليل ظلم طال عن طول شقاء حي ذا الاسم محمد اسم نبراس الورى اخر في الانبياء اول اسم الشهداء اعزل بالخوف يستجدي بضعف والم قتل هذا الطفل يدعونا بصدق للفداء لاتنادي يامحمد نحن في رغد نيام لاتنادي يا محمد لم نعد نصغي النداء امه نحن كثير لا تجارينا الامم غير انا مثل ماء البحر لايرويك ماء اي صخر في الحنايا في حناياه اقتدى لم يزل فينا بما فينا يداويه الرياء اي ضيم ولم يحرك ساكنا في ساكن اي روح لضمير مات فرط الانحناء اي قيد كبل النخوات واقتات الهمم من ترى السجان مادمنا جميعا سجناء صوره تدمي قلوبا ما لأهداها دواء عندما اغتالو محمد هللت حتى السماء 25-أمـوت وورثي حــرامي أنا مابي من الدنيا..وصول للعيون الدعـــج وأظن الصدق يكفي لو أموت ورثي إحرامي حبيبي جاهل طاغي يحسب إن الجوارح ثلج وأنا مالي شفاه وفم صوتي ضيع أحلامــــــي إذا حبك ذبحني صد كل له بموتــه نهـــــــــج تشهّد بالعجاج البيـــــــــد.. قبل تموت قدامي أنا غصــــــنٍ.وإنت أوراق والعاذل خريف وعج ووش عذر الورق والغصن.. لا يابس ولا ظامي غديت الشايب اللي عاصبٍ راس الزمان الحرج كبيـــرٍ حــــزّم الدنـــــــيا على متنه.. ولا قامي شليلي بالعفاف أبيض.. على حالته يومه نسج تدور الناس والدنيا.. وأموت وورثي احرامي 26-عيونـ ـالصغـار وجهك غضب .. وجهك عروس يـضوي مدى .. يحرق نفوس تـشبه لـك الـشمس الشموس و مــــا لـمـحـتـك ســلام يــا أحـلى الأنـام دربــي مـثل عـينك ظـلام تـشبه لـك أسـراب الـحمام و مــــا وصـلـتـك يـا صـوتها الـرايح وجـاي مـابـين أشـواقـي وشـقاي تـشـبه لـك الـونّه و نـاي و مــــا سـمـعـتك حـبـيبتي والـبـوح نــار إنـتـي أنـا بـكل إخـتصار تـشبه لـك عـيون الـصغار و مــــا عـشـقـتك يـا مـهرتي الـبيضا الأصيل تـلعب و انـا صـبٍّ نـحيل تـشـبهك غـابـات الـنخيل و مــــا سـكـنـتـك يــا غـاية الـحلم الـمحال مـثلك أنـا حـلمي الـوصال يـشبهك فـي الـشاعر خـيال و مــــا كـتـبـتـك 27-** الى صديق الطفوله ** صديق الطفوله وش جرى لك مع الايام هي انصفــــــت دنياك ولا انت بك مثلي فقدنا ملامحنـــــا مثل ساير الانام عبث بنا جور الزمن والزمن يبلي وقفنا جميـــــع وبيننا حــــــاجز الاعوام صعيب وصولي لك ويا صعب لك وصلي وانا اشوف في وجهك طريق غشاه عتام وذاك النخل واشــــوف دارك ودار اهلي وســــدره هي اكـــــــرم من اهل بيتها اللوام وفي وجهك اصحابي عصى مدرسي وفصلي وعـود كبير ودايم فالظلال ينام في ذكرياتي له بعد ملمح وجلي وصوركتبنا فيه ذكرى عبث واوهام ولـي في عيونك صوره زانها جهلي بثوب تبلل بالمطــــــــر والتراب وشام وانا حب اسير العب وهي حافيه رجلي انا وانت طفل وطفل دايم رضى وخصام بكـــانا سهــــل والضحكه امر بعد سهلي دعاني بوجهــــك نـــاده ينده الاحــــــــــلام معه رمح مدري هو علي غاضب او لجلي انا كيف اباصل والامل خلف مو قدام كثيــر الاسى والسهد يا من فعل فعلي 28-~¤ô§ô¤~ أنـا راحــل ~¤ô§ô¤~ أجمل رحيل ما يوصلني إلى قافلة من القوافي أعود بعدها ..مليئاً بالشعر . أنا راحل وتارك كل شي جمعت من ذيك العيون أحلى المعاني وونيت مع صوت المعاني وبشويش ..وشوشت الشعور ريش تبلل .. وانتفض عصفور ولما وصلت لكل شي دريت إني ما وصلت لشي اخترت أصعب رأي أنا راحل ..وتارك كل شي مني وراي *** تعبت والدنيا عيت تستريح يا صاحبي القلب يمكن ينكسر بس أن راسي ما يطيح ولو قلت لك إني جريح أخاف تفهمني خطا وأخاف تفهمني صحيح يا صاحبي .. أنا على سكوتي تعلمت وما ندمت ولو طال بي مسراي *** الدنيا ما وقفت مسكين يا قلبي .. وهو يلتفت أقسيت أنا .. وهو يلتفت *** باقي رجوى تشبه عيون الصغار باقي لك في القلب نجوى باختصار باقي كلمه لصاحب الطرف الكحيل أنا راجع أقول إني أحب وابعثر هموم الرحيل 29-~¤ô§ô¤~مريولـ ـأزرق~¤ô§ô¤~ هذا الشهر مر هذا الشهر مر بالحزن والدمع الامر خمس طعشر شمس غابت وكسف خمس طعشر قمر بالله من يقدر يقول ؟ من يا ترى المسؤل؟ موظف اهمل بالاماره انه ماصان العماره العماره !! ارجوك لاتفهم خطا مهم تقدير المشاعر لا يزيدوا القتلى واحد خمس طعشر بنت وشاعر من ياترى المسؤل؟ الدفاع البدني ؟ الدفاع البدني يمكن كان ممكن انقذوا ماكان امكن لو شعور الرحمه والواجب تمكن ويمكن النار السبب؟ او يمكن الشاي؟ او حالة التنفيس او يمكن ابليس؟ او يمكن الهيئه لا تفهموني خطا اقصد هيئة التدريس من ياترى المسؤل؟ الرئاسه العامه لتعليم البنات ما فات فات والباقي اكثر يا خوات مؤتمر صحفي وبوفيه وهدايا قيمات قرر الريس يحل المشكلات راح نصرف في السنين القادمه مع الكتب ...كفن الحياة بس اذا نبغاها تغلق اقترح هديه تلبق علقوا في مكتب الشيخ الريس منظر طبيعي خمس طعش مريول ازرق اصبحت بالدم تغرق واكتبوا على كل مريول من ياترى المسؤل؟ * * * من يعزيني بخواتي؟ من يعزيني بناتي؟ من يواسيني على فقد امهاتي؟ قام واحد باخر المجلس وقال صغار كانوا ياطلال! ياسيدي هذي البلد والله مافيها صغار حنا حتى في المهد نولد كبار خمس طعشر ام ثكلى خمس طعشر ابو حزين الجاني مثل الطير حر والمجني على حلمه سجين 30-* حكاية شمس * كنـك مـلاك وطلـع توه الله وش كـثـرمـحـلـوه ماعاد بـه غيـرك حكايـه جيتـي وكـل تـرك جـوه الليل لـف ولمسهـا لمس بعيونك اغرب حكاية شمس وانتي الـى الحيـن نسايـه ضيعت باكر عشانـك امـس دايـم اقـرب وهـو يبعـد وفي شفتـك للشفـق موعـد ويحـط لاحزانـي نهـايـة من غيرك اللي قـدر يسعد ياللـي تحليـن اي لباس يغار مـن جيـدك الالمـاس حـرام تعـذيـب وكفـايـه حني على الناس ياحلى الناس والشمس تحضـر بميعـادك مـن يقـدر يلـوم حسـادك تغازلـك حتـى المـرايـه (( .... )) ياشمس والنـاس بيضا وفيها سمـار الحـور سمرا وفيها بيـاض النـور مالـه بـدايـه ولا نهـايـة من مثلك اللي جمالـه جـور والكامـل بحـق وجــه الله ياحلـوتـي كـامـلـه والله ياللـي لكـل البشـر ايــه من يشبهـك حلـوة الطلـه 31-إن حكت ان حكت غار السكوت من الحكي وان بكت يحسد مدامعها الغـرور كنها والشمس خصـم ومشتكـي وبين ذيك وذيك عذبت السطـور الثرى يـا مايسـه مغروركـي ومن يلومه ما يعرف سر الغرور والجمال امرايته فـي وجهكـي والبها له في جفن عينـك فتـور الحلا يـا حلوتـي شبّـه بكـي منهكٍ حرفي ويشكي به قصـور والحروف اتهني احروف اسمكي والاريج اختال في عرس العطور يا غريـره ياغـرورى مسلكـي تهت والا تاه عن كفـي العثـور في طريقي ضاعت الخطوه لكي ماتميز بيـن نـار وبيـن نـور 32-مكانك .. مكانك أموت من فرقاك .. و أموت بلقاك وأموت من جورك .. و أموت بحنانك كلٍ قضاه يموت مرّه .. و يفداك و أنا أموت ألفين مرّه .. عشانك أذكرك.. لا مني نسيت إني نسيتك أنساك .. لامني ذكرت نسيانك رضيت أنا بالهم لرضاك مرضاك و ارخصت لك قلبٍ جرحته .. وصانك أجيك في صدري عتاب .. و أبجفاك و أرجع ألوم الوقت و أقول خانك أحب فيك .. احساسي إني بلاماك في عز خوفي منك أحس بأمانك عجزت أفرق بين وصلك و فرقاك ياللي عطيت الناس بيدك عنانك مر تجــــيــــني لين أقول إنـــي إيـاك و مر تروح بعــــيـــــد و انسى أوانك أقبل و تقفي .. و اعتذر عن خطاياك و أقول ما عييت .. عيا زمانك و إن خانتك دنياك .. أو خنت دنياك إرجع و تلقابي .. مكانك.. مكانك >>>>>>>>>>>>>>>>>>>>>>> مع حبي و تحياتي منقول لعيونكم |
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
(عرض الكل)
الاعضاء الذين شاهدو هذا الموضوع: 11
|
|
| , , , , , , , , , , |
|
|
العرض الشجري