شيء ٍ يخلي كامل العقل مجنون ..

السلام عليكم ورحمة الله وبركاته
؛ ؛
وبعد غياب طويل عن النت والشبكه لظروف العمل
إلى ان ذكركم والشوق لكم لازال و داام ..
وهــا نحـن نـعـود لــكم مـن جـديـد
عل وعسى هالمتواضعه تشفع لي :
؛ ؛

البارحه مع هاجس الهم محزون=بين العلوم الخافيه والدفينه
هاجس خياله غاسق الهام مكنون=خم الضماير واستباحت كنينه
اوجست خيفه منه وجروح وطعون=توشك على سده وقفل الخزينه
شيء ٍ يخلي كامل العقل مجنون=وتهتال منه اهل العقول الرزينه
قسوة زمان وناب الآيام مسنون=والصبر طول م آسعفتنا سنينه
الجور وأنواع الشقا وقلب مشطون=ونجوى بها عين المولع حزينه
شابت وكن بموقها شب وفنون=ودمعه تموت 2000مره بعينه
كنيتها مابي المخاليق يدورن=وآمسيت مثل مدور الحاجتينه
صديت يوم الناس قاموا يشطون=والهرج ما ودي بزينه وشينه
جنبت والحكمه مع اللي يصدون=تقول فيها للعرب!! شارتينه؟
احدن بطيبه يجرع البين وغبون=واحدن على منهاج فعله يدينه
واحدن ضمر لـصاحبه موقف الهون=واحدن ملى صدره حِقد وضغينه
واحدن غدى قلبه من الحِسْد مشحون=غااوي وتسيّره النوايا اللعينه
وآقول.. دام الراس به عقل وعيون=والله عطاه العرف يا جاهلينه
البيت ما يبنى بلى سقف وركون=ولا ضاع حق ٍ دونه مطالبينه
الطيب في درب الردى كان مقرون=رجيت ربي يعين به محتمينه
الجود ماهو في ثرى الذل مدفون=دونه شموخ النايفات الحصينه
عزفت له لحن الوفا ليل وشجون=ودعيت ربي يعـز به منتوينه
القادر اللي يفرج الكرب والهون=الواحد اللي كلنا نستعينه

‘

‘

آخوكم ومحبكم :

حمدان سليمان

بـ قـلـم ـي

‘

‘