حين تلقيت خبر وفاة أمي رحمها الله وانا بالخارج في الهوتيل مع ولد خالتي كنت قبل الظهر نازل بالكوفي شوب انتظر ولد خالتي ينزل .. واشرب شاهي ودق جوالي وتلقيت الخبر ! فقدت احساسي بكل شي لمدة دقيقه .. قمت مثل المهبول ما ادري وين اروح .. وكل مافيني عبره ! واطلع برى الهوتيل نسيت إني ساكن فيه ! وإن ولد خالتي بالغرفه فوق بينزل ! واوقف برى شوي ! انا كنت ابي المطار .. ابي مكتب اقدم الحجز .. نسيت ان الهوتيل ممكن يسوي لي هالخدمه ! وانا راجع اثاري ولد خالتي جاه الخبر ونزل على طول لقاني جالس باللوبي في حالة ذهول تام وعيوني تعصى الدموع .. مابي احد يشوفني ويعزيني ولد خالتي والله وتطلع الدميعات ! كني ارتحت شوي وحسيت بالوضع كله ويجيني اتصال وبعده اتصال ويدّهر التلفون .. ويضبّط ولد خالتي العوده والحمد لله بنفس اليوم لأن الوقت بدري .. لكن كان يوم عصيب أطول يوم بحياتي ! من الهوتيل للمطار لركوب الطياره للطريق للوصول
الله لا يوريكم مكروه .. وبس !
موقف محرج //
والله المواقف كثيره .. لكن بقوللك مره كنا في رحله من اولها منعفسه عفاس طلعنا من الرياض على دبي بالاماراتيه بيوم الوقفه ( عرفات ) !! ترانزيت لكازابلانكا وكانت اول مره اروح للمغرب . . وكانت الرحله تطلع من دبي صبح يوم العيد .. نمنا بهوتيل المطار طبعا مجاني .. والصبح طلعنا .. وصلنا كازا يوم العيد بعد الظهر .. يوم دخلنا المطار مبسوطين مُنْشَرِحين واجي عند ضابط الجوازات مبتسم الكشره خالي الوفاض هههههههه <<--- ما عليك منها الاخيره هذي المهم السلام عليكم وعلى طول يعاجلني بكلمه بلهجتهم طبعا ( ما دبحتوا لحولي ياك ؟ ) !!! أنا انقلب لوني وتغير مزاجي احسبه يقول انت حولي .. ! واعرف من اول ان حولي = خروف .. وياك = إنت // ما يبي لها كلام يعني .. واكفهرّ واجتلد صبرا وتحسّبا عند الله والمشكله انه ضابط كبير يعني .. يوم شافني كذا حسّ اني ما فهمت .. ويشرح لي بالفصيح اثاري قصده / ناقد عليّ شلون تسافر يوم العيد ما ضحيت يعني ؟؟ هههههههه يا حليله ما يدري ان حجزنا هذا بواسطه وحب خشوم ! .. قلت له موصي اخوي هههه الوكاد اننا ضحكنا لين قلنا بس
موقف ثاني //
اذكر في امريكا ايام الدراسه في سياتل كنت ساكن بشقه طبعا انا وولد خالتي وولد خالتي الكبير كان ماخذ فيلا له تسع سنين هناك ! المهم كنا عنده ومدري شلون نحورف بالكهرباء يوم درينا ويطفي الكهربا على الفيلا كلها كان الوقت بعد المغرب .. حنا نحسْبه مثل هنا والله ان تموت ما حد درى بك .. يوم درينا إلا الدوريات مطوقه المكان والسيفتي والونانات والمايكرفونات يؤيؤيؤيؤيؤ ونطلع عند الباب ويخشون ثنين على جنب معهم سلاح // قسم كنه فيلم // بس الظاهر جيراننا قالوا لهم يعني انهم سعوديين وما ادري هم خذوها على اننا ارهابيين او انهم خذوها على ان ما عندنا سالفه هههههههههه ونكلمهم ونهديهم وان الوضع عادي مافيه شي واشوى يشغلونه وياخذون تعهد اننا ما نكررها .. هم توقعوا انه بفعل فاعل مو حورفه صيّع يعني ! بس اذكر اني رحت اخذت دش من يوم راحوا .. ليش ؟ ما ادري عاد !
موقف مضحك //
فيه ولد اختي صغير متولع مره بأسامي السيارات .. كلّما نطلع ما غير يطالع في السيارات وهذي كابرس وهذي خلفيه ( في اكس ) وهذي بانوراما وهذي دتسن .. طبعا الاسامي كلها غلط هههههه هو حافظ الاسامي بس يجد صعوبه في تركيبها على السيارات بطريقه صحيحه هههههه
مرّه قلت ابعلّمه مسكين هههههه يوم مرّت كامري قلت له شف شف / هذي كامري / وتمرّ هايلكس قلت وهذي هايلكس .. الخ الخ بعد دقايق وتمرّ كامري قلت له وشي هذي ؟ قال لومينا هههههه قلت لا هذي كامري // قال لا الكامري زرقاء هههههههه
لان الكامري اللي علمته اسمها كان لونها ازرق
موقف مضحك ثاني //
مرّه بالطياره حنا ثلاثه رايحين للمغرب وما ادري وش جاب طاري المصريين قعدنا نعلق عليهم .. ايه جاب الطاري يوم طلبنا عصير برتقال قلت انا باللهجه المصريه عسير بورتؤال ههههههه يا حُبّ المصريين له // وجلسنا نعلّق وهات يا ضحك عالمصريين // كانت المقاعد كلها إما سعوديين او خليجيين او مغاربه او افارقه سود // .. وفيه واحد بالمقعد المجاور لنا يعني يسمع كل كلامنا بس يطالع لنا وكلما ألتفت اشوفه يطالع اقول وش عنده هذا ؟ ونظراته ما ريّحتني يعني ... الوكاد طلع مصري هههههههه مدري وش جايبه طالع من جده للمغرب ؟؟؟ جابته قرادتنا والله هو ماقال شي يعني .. خلانا نضحك ونقول كل شي واشوى اننا ما تمادينا بالتعليق على اشياء ثانيه هههههه لكن سمعناه يكلم المضيفه باللهجه المصريه ! هلحين عاد شلون نبرر موقفنا .. واجلس انا اعلق على السوريين ههههههه بطريقه بسيطه يعني مافيها تعمق .. واميل على الخليجيين وعلى السعوديين شوي // عشان يحسّ اننا فري ونقصد المزح ههههههه وبسّ جالس اتذكر وش قلنا عن المصريين .. حنا هبّبنا كلام ما ينقال ههههههههه ومن البيت للكباريه ومن الكباريه للبيت ومن هالسوالف ههههه واكثر اللي حوالينا نايمين واستغلينا الفرصه من الزهق جلسنا نضحك // وكل شوي اطالع له ابيه يضحك ما يضحك // مكشّر // يووووه وبعدين !! يوم صمّمت واطالع له واقول // ازيك يا عسل ههههههه وانا خايف ويبتسم ويقول / وش عند الشباب فالّينها اجل من بدري ؟ يؤيؤيؤيؤيؤيؤيؤ طلع سعودي ههههههه وسواها بنا الملعون هههههههه مجررررررررررررم
قلت الله يرج اممممممممك .. انت تدري انك حسْتنا حوس ؟ قال ادري وميت ضحك من داخل هههههه ويجلس يضحك قهقهه يسمعها اللي ختم لنا الكروت بمطار جده هههههه قلت يازينك ساكت بس
العضو الأكثر نشاطاً هذا اليوم 
العرض الشجري
