][ .. شلّال ونهر .. ][

مُمْكن افهم ليه تِشِّر باصْبعك ؟
.......... وش بلاك اخْفيت عنّي ما ظهر ؟!

خانت العبْرات عاصي مدْمعك
.......... كنّها الشلاّل وعيونك نهر .... !

واستغاث الورد قبْل يْودّعك
.......... في خدودك ضاع لونه وانصهر !

ليتني غرقان تحْتِك وارفعك
.......... ليتني مرْسوم بخْدودك زهر .. !

ليتني فنجال بيدك واشْبِعك
.......... لا تقهْوى الشوق صوتك وانبهر !

بقْطفك واسْقيك وارْجع ازْرعك
.......... في عيوني دوم وبْحضني دهر . !

يا شتات الهمّ وِدّي أجْمعك
.......... الفرح لك بيت والبسْمه مهر .. !

ظامي النظرات ناوي يتْبعك
.......... ما بقى له غير طيفك والسهر !

وَلّ يا حظّي وْ تاليها معك ؟
.......... ما تحِنّ لْروح صاحت بالجهر .. !

يا عظيم البوح وشلون أمْنعك
.......... لا عصاك الدمع وابكاك القهر . !






قصيده هدر شللها وأدلهمت سحابتهابسيل أقبل من مغانيهاالتي كادت أن تجف وتضمئ أوراق صفحاتها

فكأنها عانقت السحاب ونتحت لنا هملولا فأسقت كل متعطش للشعر.......روعه ياخالد فكم من الشعراء

تحفزهم قصائدك للشعر وللبوح عمّابمخيلاتهم .... فشكرا يارآآآآآآئع نتابعك دآآآآآئما