راويتنا الأستاذ / فواز بن يحيى بن فهد الغسلان

صبحكم الله بالخير جميع

بطبيعة قسم الموروث فإنه يتحدث عن قصص وأحداث حدثت في فترة من الزمن البعيدة وأشعار وقصائد فحول الشعر القدماء وتسطير مجدهم هنا وحفظه وتداوله بين الصغير والكبير ..

لذا أنـا رأيت علم يرفرف يحوي مابداخله من موروث أجدادنا ..
فالمعذره إن خرجت عن إطار هذا القسم ..

الموضوع اليوم نبذة صغيرة عن غالينا ومشرفنا

الرواي والشاعر الفحل / فواز يحيى الغسلان


راويتنا الأستاذ / فواز بن يحيى بن فهد الغسلان ، ولد في محافظة بقعاء بمنطقة حائل عام 1385هـ .
كان يتردد كثيرا على مجالس كبار السن ينهل من خبرتهم و تجاربهم , و نتيجة لذلك فقد بدأ في نظم الشعر وحفظه في سن الخامسة عشر من عمره , كما أن جده فهد و جده لأمه خلف البدر شعراء و رواة فحول و قد اثر ذلك عليه بشكل جلي وواضح فحفظ قدراً كبيراً من الشعر النبطي والفصيح .
يدين بالفضل بعد الله – عز وجل – للراوية الأستاذ / فهد بن محمد الدخيل فهو أستاذه في هذا المجال .
يحفظ ما يربو على الألف قصة و قصيدة , و له أسلوبه الممتع الشيق الذي أمتع الجماهير به في برنامجه ( الراوي ) الذي قدمه في قناة المجد الفضائية والذي بث منه إلى الآن 15 حلقة .
كما أن له برنامجا تلفزيونيا لصالح قناة السياحية بعنوان نوادر من التراث .
له تعاون مستمر و ثابت مع دارة الملك عبدالعزيز حيث سجل لهم أيضا عدة حلقات .
لراويتنا مشاركات عديدة في الأمسيات و المهرجانات الثقافية .




هدية صغيرة لكم



لتحميل مقطع من الشريط الرابط تحت موجود

http://www.afaaaq.com/wav/nawader-torath.mp3





...



هناك جوهرة أسماها الراوي لإحدى قصائده

فصدق عندما سماها بالجوهرة

لما تحملة من حكم وأمثال صاغها وحبكها بفن عميق وحكيم ..



خفوقي ضاق ياراع الجزيره
وهاض الجاش من نارن تديره

وصغت القاف من زين المثايل
لعل القاف فيه اليوم خيره

بيوتن مانظمها كل شاعر
تبي له شاعرن روحه خبيره

يصوغ اللي يهيض بوسط جاشه
وينثر مالجى وسط السريره

لو ان القاف تغنيني حروفه
تحديت الفرزدق مع جريره

لقى بالقاف وقت الضيق راحه
على روحن من همومه حسيره

شرب من سكر الدنيا ومره
وصار الشعر لهمومه ذخيره

وانا قاسيت بالدنيا عجايب
ورافقت الموظف مع مديره

وشفت طبوع تجارالخلايق
وخالطنا من العالم فقيره

وجيت دروب دنياي الغريبه
وذقت سيوف دنياها الشطيره

ولاجربت زينات المباني
ولانامت عيوني في حريره

حياتي كلها كد ومتاعب
همومه بالحشى مثل السعيره

اشوف الناس فرحانه بجنبي
وريح ثيابها ريحن عطيره

اغسل الثوب بكفوفي لروحي
ولافكرت عمري وش مصيره

لك الله كم رجف جسمي بثلجه
نصوف الليل والدنيا مطيره

فطوري من عشاء البارح حفظته
ولا اعرف الفطاير والفطيره

ولا شفت الدراهم وسط جيبي
واخلط الكيك مع لذة عصيره

وراح العمر في ضحكه وضيقه
مع العالم وانا عيني بصيره

وعقب اربع عقودن من حياتي
فهمت دروب وقتي في مسيره

هبيل الناس لاكثرت فلوسه
غدى شيخ المجالس مع وزيره

تقوم الناس عن وجهه بسرعه
لو انه ماعطى مخلوق نيره

وتصغي له رجالن شاب راسه
ويقعد وسطهم تسمع هديره

وهو هيسن ولد هيسن تسلسل
ولايفرق غنمها من بعيره

مدامك ماتراجي نفع ماله
ولاتطمع شياهك ورد بيره

علامك هنت نفسك وانت شايب
وهون النفس راياته خطيره

مدام ان الكرامه راس مالك
سيوف الطيب شلها من جفيره

لحى الله من يهين النفس راضي
ويرضى الهون والنفس الكسيره

لاجل قرشن من كفوفن بخيله
يلو تاكل قشاشن من شعيره

وشفت اجناس ماتفرق طبوعه
وطرق الناس بطبوعه كثيره

وفيهم من يغثك في شعيبك
لو الوديان سالت في غديره

تحسدك لو كسبت ريال واحد
لو ان ارباحهم تمشي دريره

يظن الرزق ينقص من حلاله
تضايق وابتدى تسمع زحيره

وكل الناس تلقى فيه صالح
ولا تلقاه باللي فيه غيره

وغيرات المراجل شر غيره
خطرها زاد عن عذرى غريره

اذا غارت هنوفن راح تبكي
وهو ينقل سكاكينن طريره

وفيهم من يبي تنفيذ رايه
يريد الناس كله تستشيره

وهو ماله من الدنيا تجارب
وعند الكود يظهر لك صفيره

شبيهن للنعام ان شاف زيله
هبوب الصيف في ليله يذيره

وفيهم من رفع بالكذب نفسه
وحين اللازمه تسمع شخيره

اذا شافك ضحك لك في موده
ونيران العداوه في ضميره

خبيث النفس منبوذ السجايا
جفولن بالطواريق العسيره

ترى الخسران من ياخذ بناته
يجيه عيال للعالم معيره

وبعض الناس يتبع راي حرمه
عنود الريم بالبيت الاميره

وهي تامر وتنهى في حضوره
وهو مثل الذي وسط الحضيره

والانثى دايمن حكمه بقلبه
وشوره عند نوره او منيره

مع ان الراي بعقول النشاما
وبعض البيض بالشورى جديره

ولاتركن على عهد العذارى
ولو ساقت مواثيقن ضريره

ولو قالت غلاك بوسط جوفي
وقالت خذ عيوني مع نظيره

اذا طال الزمان يخور عزمه
ولاتصبر على طول الجبيره

وفيهم من يجي درب الصداقه
ويصدق في اموره مع خشيره

ولكن من غلط واحد يعافك
ويعلن عنك بالتالي نفيره

وماتلقى الذي ماداس زله
يقوله من فرض ركن الشعيره

ولازم تدمح اغلاط الرفاقه
قبل تقعد وحيدن وسط حيره

اذا رب البشر يعفوا ويصفح
علام العبد مايرحم عشيره

وبعض الناس رفقتهم وناسه
سعادة واحدن روحه كديره

وناسة ساعتن لاصرت ضايق
وبالشده سريعن كسر زيره

اذا شافك طريح بوسط شده
تعذر منك في لاهب هجيره

وللشدات ناسن ترتكي له
اذا ثاروا غدت عينك قريره

زمولن لانخيته جاك هادر
ماهي رقصن على نغمة سميره

وكل الناس بالدنيا معادن
كريم الناس او راع الثبيره

كريم الاصل تلقى الفرع طيب
وترى الويلان فزعتهم شهيره

بلا هونن بربعي نسل شمر
هم الميراد لاكثروا صديره

وفيهم مسلمن والخير دربه
غدى سيل الرحامه مع محيره

اذا جيته لقيت الخير عنده
ولو انه عايشن عيشه ستيره

فقير المال وطبوعه غنيه
زبون الضيق حماي الجريره

واذا جت ساعة ظهور المراجل
شجاعن باللقاء ماطار طيره

بيوتن قالها الراوي بضيقه
عسى مولاه من نفسه يجيره

نظمته شعر للناس العوارف
لان النصح للعاقل بريره

وانا ماني رفيعن فوق ربعي
وهوزاتي مع العالم قصيره

ولكن مااتعمد بوق غيري
لان البوق وربوعه نكيره

ومن ينصح ويكشف لي عيوبي
عطى روحي عن الغلطه نذيره



نرجع مرة أخرى لإبداعه في مجال الإصدارات المسموعه والتي لاقت حسن إستماع الجمهور المهتم للتراث ..




لسماع المقدمة للشريط

http://www.gbland.info/up11/1193918037.rm


وهنا رابط كامل للإصدار بحجم 70 ميغا للإتصالات السريعه

http://www.4shared.com/file/31480942...ified=df415ad7

رائعه أخرى من روائع ابو فهد


طير ياللي بالجناحين خـفاقي



طير ياللي بالجناحين خفاقي
ماشكى نار الهواجيس من شوقه

ان نزل ينزل نبا كل شوهاقي
وان بغى له وجهتن شال طاروقه

يشلع الجانح تحت كل براقي
البشر تحته والامزان من فوقه

ماوقف عند الجمارك بالاوراقي
لاجل يدفع قيمة الختم وحقوقه

او وقف ساعات مع كم سواقي
في لهيبن يودع النفس مزنوقه

مالقى من نقطة الحجز منطاقي
عسكري ينفخ على الناس بشدوقه

صابرن يشكي لواهيب الاشواقي
والهواجس تحرق الجوف وعروقه

تجتمع بالقلب من كل الاشناقي
ويل من ياصل لهيبه لمعلوقه

من عشيرن بالحلا حاز ما لاقي
لابسن زين الملابيس من ذوقه

مهرتن فوقه شجاعن ومطفاقي
دايمن مع ساقة القوم مصلوقه

وعين ريمن ترتعي قبل الاشفاقي
تختفق بين المشاريف وفلوقه

مزبنه عالي شفى كل مطباقي
فوق روضن زاهي نبت رقروقه

جافلن من خوف يفجاه تفاقي
تودعه مع هبرة الفخذ مصفوقه

جاه وبل الوسم بالوبل دفاقي
وزان عشبه وارتفع ساق زملوقه

خفرتن زينه جمع كل الارناقي
لين صارت بين الاريام مفروقه

الجديل بمتنها طاق ماطاقي
والردايف تشكي الثوب من ضوقه

مع حلاها حايزن زين الاخلاقي
الوصايف في حلاياه مطبوقه

حبها في ذابح البرد مشراقي
لاضحك شفت الثنايا لهن لوقه

لاطرت لي فزة الروح بشهاقي
كن قلبي والمعاليق محروقه

طول ليلي ساهرن ضايقن شاقي
والضماير بين الاظلاع مسروقه

لين تنشف بالقهر كل الارياقي
ذاهلن بالفكر عن كل مخلوقه

ريحها ريح المعاطر بالاسواقي
كنها في غدفة الزين مدفوقه

قصر حبه في خفوقي بالاعماقي
ارتفع من دون لبنه وطابوقه

والله انه ماغدر بي ولا باقي
والظروف الظالمه هي سبب عوقه

ساق لي بعهود الاحباب ميثاقي
ولا ظهر منها كذايب ولا بوقه

ثم صار الزين للظرف منساقي
وشفت روحي من طواريه مفلوقه

صار في بابه ثلاثين مغلاقي
واصبحت فيه المسامير مطقوقه

دايمن قلبي لروياه تواقي
قطعتن من داخل الجوف مشلوقه

المفارق والجفى صعب ينطاقي
يوم صارت حب قلبي ومعشوقه

ليت رب العرش يامر بالاوفاقي
لاجل اشوف صويحبي زاهي دقوقه

أه ويلي منك يامدمج الساقي
ليت من ياخذ من اشفاك لو ذوقه


المعذرة على القصور ولكن هي همسة للجميع
تجاه رواينا الغالي فواز الغسلان

عشوقـ