قصائد الشعراء المشاركين في الحلقة الثالثة من شاعر المليون

عبدالله سكات الرشيدي
المملكة العربيه السعودية


قبل لا يذن المذن ويرحل كاتم الاسرار ..
بقرب المسجد اللي ودعه حتى مصلينه ..
على صوت القنابل هاوية رحماك يا ستار ..
صحى الطفل اليتيم ونبض موته في شرايينه ..
قبل عامين فاقد له عزيز وعاش طالب ثار ..
وقبل شهرين ودع والده واقرب محبينه ..
وقبل ساعات نام وفي عيونه دمعتين صغار ..
تشح إبها المحاجر لو دموعه هي قرابينه ..
غشاه اللوم وبلحظة تفاني والهموم كبار ..
صدح صوت الفراق وكل منظر حوله يهينه ..
تساقط حب عنقود الكرامه والجمل معذار ..
تمادى الطيش في مكمن دفاه وبعثر سنينه ..
على مشهد حزين افطر وخلد ناظره تذكار ..
ووضعٍ لو يحاول يهجره ما غمضت عينه ..
سمع صوتٍ مدوي مع صياح وزمجره وغبار ..
وبوح الصبح لفه مشهدٍ تاهت عناوينه ..
خلاصة ما حصل هم وسحابه وبلها هدار ..
مطرها الموت يوم العدل مختله موازينه ..
لمح دخانٍ اسود من نوافذ بيت ابو عمار ..
ركض يمه لقى طفلٍ بما يلبس مغطينه ..
نشد عن صاحبه عمار واقسى ما دهاه وجار ..
كشف عات الهوا وجه الصحيب اللي مخبينه ..
صرخ صرخة فجيعة هزت جبال الشيم وانهار ..
عجايب يا ظروفٍ حطت الاغلال بيدينه ..
وبعد ما فاق من ذل المقام وطعنة الغدار ..
بهمة من حواه الدين ومكابر سلاطينه ..
تولم واسرج عزوم الفزوع وحطم الاسوار ..
يبي يقرا ملامح وجه يومه في ميادينه ..
لقا وقفة صلاح الدين تنخى غيرة المختار ..
وتستجدي ضمير بشارعٍ باتت قوانينه ..
بيوت مهدمه وانقاض تبكي تحتها الازهار ..
وذلة ترسم الوان الشتات وغصن مدمينه ..
وفاصل حزن يعزفه بخفوقه شجب واستنكار ..
وحيٍ ما شكى بين الملا قلة معزيينه ..
على هالمشهد المشؤوم واجراس الندم والعار ..
صحى همه لكنه قرر التحرير من حينه ..
حكاية طفل واحد من ملايينن من الاحرار ..
طفل عاش الحروب وشيبت به قبل عشرينه ..


****


عبيد خميس بن صويلح الهاملي
الامارات

يا عل رعدٍ براقه قاعٍ له ..
فيه المزون تهل
يخضر ثوب اوراقه في حله ..
يعشب عقب المحل
والقايني باعباقه مع فله ..
يزهل في كل محله
الكوس من عشاقه لأرضٍ له ..
تلفي بريحة نفل
يا من نهب خفاقه خلٍ له ..
صعبن فراقه حل
قلبي وداده ساقه عيلٍ له ..
سوق ضياع انهمل
ساعة غدا باشواقه متوله ..
زاد اعواقي علل
وارماه في معلاقه ما امهل له ..
رمية سبر انختل
لا عاد يوم فراقه هلل له ..
دمعاتٍ تنهمل
ريمن راقي مزاجه بوصل له ..
لو هو ما ينوصل
لو دون وصله عاقه وعدن له ..
ما داخلني ويل
الروح له منساقه لا والله ..
ما اهتم بمن زعل
غصت بغزير اعماقه واغزل له ..
غزل بيوت الغزل
ابيات له براقه تحفل له ..
فيها روحه نزل
خلٍ لشوفه شفاقه شفقن له ..
بو خمص معتزل
ذوق وحسن ولباقه واحكن له ..
في منطوقه عسل
وخدن يشع اشراقه وجهٍ له ..
مثل القمر المطل
حبر القلم واوراقه بدعن له ..
منه البيوت تعل
مـ الخافق اللي باقه ويتله ..
تل الدلو الحبل
اهديت لك ذا الباقة توصل له ..
لدياره بالعجل


****


نايف بن عرويل العتيبي
المملكة العربيه السعودية

في مدرسة بندر درست وتخرجت ..
يعني تغيب ابراج وتشيد ابراج ..
ياشعري اللي فالحنايا تحشرجت ..
فج الحنايا وانهمر مثل الامواج ..
ياموج وصلك كسر لكن تثججت ..
من سجدة الساجد ومن توبةالحاج ..
ياما على كبتك وضيمك تخارجت ..
واكتب على الموضوع منعا وقت الاحراج ..
وانا نجم لكن مهما توهجت ..
قرب القمر خلاه للعالم سراج ..
وانا أكبر أكبر قطر ياللي تحججت ..
بمقارن الاحجام والحق فلاج ..
يامسلسل(ن) تركي علينا تدبلجت ..
مايعدل المنعاج من كان منعاج ..
دامك من ادمان الكرامه تعالجت ..
أناكذا مرتاح مابغالي علاج ..
الناس ماتحفظ مقامي ليا احتجت ..
وانا لغير الله ماني بمحتاج ..
شمت وتركتلك المساحه وخرجت ..
ضحكاتك الصفرا على كل هلباج ..
وظهرت على منبر هل الشعرواسرجت ..
خيل الهجوس اللي لها الصيت ضجاج ..
وارخيت مسمار الصناديد وافرجت ..
عن دانة(ن) من دونها قفل وسياج ..
سلابة(ن) نهابة(ن) خير ماانتجت ..
مصيوغة(ن) محبوكة(ن) تبهج ابهاج ..
ياللي بنورك للقوافي تبلجت ..
ذود القوافي جاك باطح وهجاج ..
وعلى البكار اللي عليها تفرجت ..
وسمي وانا نايف على كل الانتاج ..
فإن كان فيها عيب طبت وحرجت ..
وانفقت قيمتها على هيم الافواج ..
وإن كانها الاولى على كثر مادجت ..
فاحرص على البلها ترى ذكرها راج ..
كتبت شي بالخفوق وتدرجت ..
من زاويه ظلما ليا نور وهاج ..
وانا أشعر إني عقب قولي تتوجت ..
يعني ملكت الجوخ والعرش والتاج ..
وريحت فكري مع ضميري وعرجت ..
للي قصايدهم حبيسات الادراج ..
لابوظبي هات القصايد ليا احتجت ..
تحفظ مقام اللول والماس والعاج ..

****


نصار السويط
دولة الكويت


على سير ماساروا هل العرف واهل الدين ..
مشيت الطريق وقلت قدام يااقدامي ..
يدين الرجال اطوال باللازمات تبين ..
مساها غدى داوي وميدانها حامي ..
مثل ماعلينا دين يبقى عليهم دين ..
ولاعاد في هالوقت جايع ولاظامي ..
على شاطئ الراحه وفي موقفي هالحين ..
عرفت انها الراحه عقب طول درهامي ..
اغبطك ياصياد الشوارد على ثنتين ..
كفيلك محمد وانك البندق الرامي ..
غدا عمرك اربع عقب رحلة ثلاث سنين ..
ولازالت ارضك معشبه والهوى شامي ..
نما فكرك الي ماترك شي للتالين ..
ياعين الشعر نامي مادام الفكر نامي ..
عسى الله يجنبني مجي النهار الشين ..
عصام رماني مافرح فيك ياعظامي ..
على قد مقدر ارتقي للكلام الزين ..
واغرس الحبر بالطرس واستيجن اقلامي ..
افضل اكون الصمت في حزة التخمين ..
على كل حالاته تجي بصمة ابهامي ..
تعلمت عقب اخذت من واقعي شيين ..
اخذت التغاضي والصبر منك ياايامي ..
من اول وحلمي قبل عمري يجي عشرين ..
تصدر يالين انه غدى مصدر الهامي ..
وش الرجل لامن قيل عيبه شحيح ايدين ..
يعيب الخصال الطيبه لو هو قطامي ..
احد غمضت عينه واحد ماغفت له عين ..
وانا كيف اغمضها وموت البحر طامي ..
عيوني لها مده على السيف ابوحدين ..
سعيت ارسل النظره سما والهدف سامي ..
تضيق الدروب ولاورى العسر غير اللين ..
ولاتاقف الدنيا على شرفة احلامي ..
صحيح الكلام المر لامرني سكين ..
ولكني اشعر لادنى يكرب احزامي ..
من الناس اميز راعي الوجه والوجهين ..
انا اشوف خلفي مثل مااشوف قدامي ..