►►موضوع شامل عن المرحوم الامير طلال الرشيد من مجهودي◄◄

"خــلــي"
لامن غدى قلبي يدي
تمدني واصافحك
ولا من غدى قلبك خلي
ما به لزوم اصارحك
ما من عطش..كود السلام
ان سلهمت ذوابحك
ترويه عين بالكلام
شرب نهر ملامحك
لا من نوت شمسك تذوب
اسمع سوالف ناصحك
اجمع عطش لأهل النهر
وابك لسوالف مادحك
واللي معه قلب خلي
لا يمتلك جوارحك
ما دامها ..قلبي ..يدي
جرحني..والله يسامحك
و لا من غدت..وجهي..يدي
أموت..قبل اصافحك


"دبــي"
جيتكم همي شمالي وانا كلي شمال
من جبال أجا وسلمى ديار الطيبين
جيتكم من حايل اللي غلاها ما يقال
بس عشق دبي زاد الوله بي والحنين
جيتكم والعذر كأني مقصر بالوصال
بعدكم قرب غلاكم وجينا هايمين
وجيت عاشق للإمارات بحره والسهال
وانتم ادرى بالخلف يا السلف بالعاشقين
وش يقول الشاعر اللي يشوف من الجمال
كل شي زين فيكم ولا غيره يبين
اذكر الله كل ما جاّ لذكر الله مجال
الشهادة حق والله يصد الحاسدين


"دلــوعــة الــغــيــم"
الدار عنوان اهلها حي ما تحتوي
من حدّ ماطى ثراها لين راس السنام
دلوعة الغيم حضر وضاعن وقروي
لبيه يا ديرة الوافين واهل الذمام
دلوعة الغيم جاك من الشمال بدوي
محفورة فيه أجا وسلمى وحب الهيام
قلت اتجمل يـ عابر ما تبيك خوي
قال:انت ريض وانا عجل ولا لي مقام
قلت احترس يا قصيدي عن كلام قوي
يتلّ سبق الحرار وخلنا في الحمام
عجزت ابثنيك عن جرحي وهو منزوي
فضحتني ما تعرف من الحلال الحرام
قيل اجمل الشعر شعر من الغزل يرتوي
وقلت اجمل الشعر ما بكى رجالٍ تضام
الشعر سلعة هل الطايف ولي معنوي
وشلون اقدّم كلام لألهات الكلام
ولّيت ذيبٍ بسوق عكاظ كان يعوي
ألفين عام وقنيبه في دياجي ظلام
ما بلل الشعر نابٍ هاوي المنتوي
إلين خاوى الغراب وصار زاده لمام
ما احسب أنا الغيم شاعر قبل اجي مهتوي
إلين شفت الشفا أجمل قصيد الغمام
يكفيك فخر ان من جالك وهو منتوي
لابد يرقى وذا في حدّ ذاته وسام
وان قلت ليلى او الطايف فهي تستوي
ما دام غيم المناشي قيس من بك يلام؟!