ياقلب...

..السلام عليكم..
..اخواني اخواتي كل عام وانتم بخير..
..إنتقائي اليوم من بستان المبدع /عبدالكريم الجباري..
..واتمنى انتقائي يرتقي لذائقتكم العذبه..



ياقلب تفعل بس أبنشدك وش جاك
اللي استفدت هموم وطعون وعيون

ياقــل صـدقانك ويامكثر أعــداك
وأغلب هقاويّك فقاعات صابون

اللي تــوقعــته معاديــك صافــاك
واللــي تراهن في وفاهم يخونون

واللي ذكــرته بد هالنــاس ينساك
ياليت بس ينسى يجازيك بطعون

ياقلب لـو كلٍ يسوي سواياك
مافيه رجالٍ من الضيم مغبون

الله عطاك ونحمده يومه أعطاك
والله يحــب اللي بفضله يحـمدون

الحمـد لك تعــداد دورات الأفلاك
والحمد لك عدد حجيجٍ يلبُّون

والحمد لك عدد عطاك ومزاياك
والحمد لك عدد كلامِ يقولون

عطيتني وأخجلتني فـي عطاياك
وجمّلتني بالعقل والشكل واللون

فـ يالله جمّلني مـعك يـوم لقيـاك
ولاتجعلٍ يالله من اللي يخسرون

يالادمي لو طال عمرك ومبناك
لابد في يومٍ مكفن ومدفون

جابتك أمك والعرب تسمع بكاك
والناس حولك من فرحهم يهلُّون

خلَّك ليـَّا منَّه حظـر يـوم فرقـاك
تضحك وكل اللي حواليك يبكون