حلم الورق

لبيه يا حلم الورق كثر ما اشتقت
للطيش ودروب السهر واللقافة


للحزن وجروح المحبين والوقت
للجسر وعيون المها والرصافة


لعيون من يحبس مدى روحي اعتقت
صوتٍ يفضفض للضما عن جفافه


ومن يومها، ما نام جفني ولا فقت
إلا وأنا اكتب نزوته واعترافه


معقول تذبل وأنت للحين ما أورقت
ويجف نهرٍ مدّ لأجلك ضفافه


كذّبت نفسي ، غصب عني ، وصدّقت
وهمٍ أحبه ، وأعترف به ، وأخافه


في موعد عيونك حضرت وتدفقت
كان الرجا مغرور ، والياس تافه


عثرت بأهدابك وطحت وتشققّت
وأنا اتمادى في اختصار المسافة


وش قيمتك يا حلم لا من تحققت
واصبحت واقع ممتلي بالسخافة