ماني ولد حاكم خذى عدة ألقاب

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

لاهل الوفاء مني تحيه وترحاب=اللي بهم للنايبات احتمالي ‏
اشكي عليهم علة ماله اطباب=وصارت تسبب ضيقتي وانفعالي
بشت الغناة اللي رماني بالانشاب=عسى خيوطه للتلف والزوالي
يامن يقدم لي مواكيل وثياب=ويستاهل البشت المطرز بدالي
صيت رفعني عند ابازيد وذياب=وانا عجزت اكمل حوايج عيالي
وخلا ربوعي تنتظر عند الابواب=هذا يبي عونه وهذا كفالي
سمعوا طواريف المدايح والاعجاب=وظنوا بنوك الغرب كله حلالي
وان قلت ماعندي يقولون كذاب=وشلون ترهم يااديب الشمالي
والبخل بأمثالك مع الناس ينعاب=وينقض كلامك بالوقوت الخوالي
قلت القصايد والوقايع والاداب=بالسوق ماتسوى خروف استرالي
محدن يريد فعول هادي وطيثاب=قدام هرج العقربي والشتالي
ودونه ودون اهل الذهب ستر وحجاب=ويجري له اللي بالخلايق جر الي
كود الذي يقفز بهم تقل سنجاب=ويودع عزاهم بالهروج احتفالي
وامسيت اعاني بين غاضب ومرتاب=واللي عزومه بالشدايد هزالي
وانا حياتي بين مسجد ومحراب=ومنزالنا عند الرجاجيل عالي
واحوال دنيانا بها سلب وايجاب=والميل يفرق عن دروب العدالي
وماني ذيور لا حصل حزم كلاب=والا من اللي يعتريه الجفالي
وشدايد الدنيا تقل لعب طرناب=وقصر الفزايع له دروب ومجالي
بس البلى من كدة مالها اتعاب=والا قليب ماتطوله حبالي
والرزق ماهو بالمخالب والانياب=ولا ينقصه كثر العطاء والنوالي
وابواب رزق اليوم غارات وحراب=وكذب ونفاق ومهزله واحتيالي
وانا شبعت من المغثه والاتعاب=وليتي ربحت من التعب راس مالي
واخبر لارزاق البشر باب واسباب=وقبله وبعده حكم رب الجلالي
ماني ولد حاكم خذى عدة ألقاب=وياخذ من اموال البلد مايبالي
ولا مفتي يشرح تبارك والاحزاب=ويسكت اليا صاب الطبوع انحلالي
او دارس علم السياسه والاعصاب=واصبح رئيس المجلس الانتقالي
ولا نلت ميراث ابن لادن وزرياب=ولا صرت بالترشيح صاحب معالي
ولا ني على الشاشه وسيم وجذاب=واضبط دعايات الشباب المثالي
ومالي خراجي تبترم تقل دولاب=ولا لاعب بصفوف ناد الهلالي
يرسل امريكا بالعجل حين ينصاب=ويصير لي حفله نهار اعتزالي
ولا مطرب في ليلة العرس ينجاب=ويقعد على روس الخلايق يلالي
ولا قمت اعالج بالقراوي والاعشاب=واقرا مجانين النساء والرجالي
ولا لي مع السلطان خالات واقراب=ولا واحد منهم دعى ياخوالي
ولا نلت منحه ساميه دون الاصحاب=واصبحت في رتبة كبار الملالي
ولا لي كتاب بالقبايل والانساب=وخليت نذل القوم مثل القبالي
ولا لي قتيل يطلبن عتق الارقاب=وشرطت مايكسر ظهور الجمالي
وماني معارض في محطات الاجناب=وامدح جيوش الغرب والاحتلالي
واسعى ورى الفتنه وتقطيع الاطناب=ونشر العدى والتفرقه والجدالي
ولاسقت بنتي بالملابس والاطياب=صوب الامير اللي رصيده خيالي
في متعة يرضى بها بعض الاذناب=فيها الدياثه والخزى والهبالي
العرس ساعه كنها بعض الالعاب =في خيمة تنصب بوسط المفالي
واكسب بها ثروه بلا عد وحساب=للي فحص هيكل حسين الدلالي
من شان اعدل غترتي دون مرزاب=وافهق على العلباء طوارف عقالي
وهذي دروب المال في كل الاقطاب=وكله مضت ياهيه ياهملالي
وانا اتقلب بين شامت وشذاب=والربح قولة ياخلف من غدالي
واثباتنا محجوز مع عكف الاشناب=عند الذي ساق القرار ارتجالي
مدري غدى بين المكاتب والاسياب =والا رقد في مكتب القوم سالي
عامين غايب بين دافع وجلاب =من شان تمنع رحلتي وارتحالي
والصدق يظهر واضح تقل مشهاب =ويكشف دروب المعترض والموالي ‏‎
[/poem]