ياغايبه لحضورك ألفين ميلاد

هالأغنية في داخلي دقّت أوتاد .. يصحى عليها كل وقتٍ حنيني
ياراحله وطعونك قدامٍ جْداد .. لين أصبحت ظلٍ يباري سنيني
لفّيت هالدنيا من بلاد لبلاد .. من وين ماوجّهت طيفك بعيني
مكتظ بفراقك مقيمٍ وشدّاد .. خالي من الحيلات وأصفق يديني
أعشقْك وأحمل لك من الود أوداد .. ياعْذب ملاكٍ حل عصري وحيني
عشرين عامٍ من رحيلك بلا أعياد .. عشرين عامٍ بين بعدك وبيني
عشرين عامٍ مرت بقلبي شْداد .. عشرين عامٍ وين أنتي وويني ؟
لبست أماكنّا من الضيقة حداد .. ماكنها إلا صورةٍ من دفيني
ياغايبه لحضورك ألفين ميلاد .. زولك ملازمني ومزروع فيني
يا أغنية في داخلي دقّت أوتاد .. يصحى عليها كل وقتٍ حنيني


للشاعر
سعد العوجان