طمنيني ياحنونه في غيابي كيف حالك
وفي غيابك طمنيني عن حضوري كيف حاله
والا انا حالة عدوّك الا عقبك ليل حالك
كن حالي حال شايب فاقد ٍتالي عياله
وكنّي اللي زان حاله ثم جرّه للمهالك
للفراق..وللعذاب..وللهموم اللي فباله
آآه ياقلب المهالك..قللي شجاب المها..لك
وانتي من جيتي وقلبي معلن ٍ فيك احتفاله
كيف انا افتي في غلاتك والحنايا فيها مالك
عاقل ٍ من زود عقله لاعقل ساوى هباله
يسهر وآآآخر طموحه انه يمر بخيالك
لأنه اصلا ً وش خياله كان ماصرتي خياله
يعشق فراقه لأنه ينتظر عقبه وصالك
يكره فراقك لأنه ماعرف لذّة وصاله
مُمكنه ياقف برجوى تنفتح شرفة محالك
وش حلاة الممكن الاّ لاحصل فيه استحاله
ابحر بعينك واخاف من الغرق وارجع لجالك
وارجع اغرق في سواد ٍ جل من صور جماله
وارمي نفسي في يدينك واطلبك زيدي دلالك
وآخذك منك لقلبي ويتمادى في دلاله
واسرف بذنب المشاعر من حرامي في حلالك
الوعد مرسى السفينه والعذر موج الجهاله
كل هذا ماتبيني اسألك وشلون حالك؟
اتركي حالك واباسأل عن حضوري كيف حاله