ياشوق لاتبحثين الخافي المخفي
أرجوك خلي جروحي تندمل حاله
إن قلت ماني بشاعر صاربي ضعفي
وإن قلت شاعر تحط الناس لي قاله
ولافيه احد يانخيته ياقف بصفي
وهمي مع الوقت زاد بحل ترحاله
من وحدتي ترتكز في ضامري شلفي
وانا الذي في خياله شي ماناله
فارقت ولفي ياشين مفارق الولفي
تسع سنين اتمنى واتحراله
انوح باسمه ليا هب الهوا صلفي
واقول يمكن يعلي جيت في باله
يحن قلبي عليها حنت الخلفي
خلفن ترازم بيوم الورد لعياله
متى على الله مراسيله لنا تلفي
وتافي عهوده او انه تقطع حباله
وعقب السنين الطويله للغليل اشفي
واقول ليته تقدم بس مرساله
وانتي ياشوق اعذريني ضايعن نصفي
الكيل طافح بقلب اللي رثا حاله
هاجوس يقبل وهاجوسن مني مقفي
وهاجوس لو مايجي انا اتعناله
يابنت مي البحر ماينقصه غرفي
ولارحم حظي إذا ماشلت انا ثقاله
كل المصايب انا اشيله على كتفي
ولا غير ربي لياضاقت بي الجاله
وسلامتكم،،،،،
العرض الشجري
