.
.
قبل أروح
ويمتلي صدري جروح
وقبل أسافر عن مداك
يصير أجيك ؟
( وأحتضن صدرك وأنوح )!
مو كثير
وذاك صوت الموت نادى
والأمل بعدك تهادى
وكل ساكن قبل أتوهك
من بعد هجرك تمادى
حتى صوتك لي ليالي ما سمعته !؟
آآه
آسف
قد نسيت أنك قطعته
ما تذكر
صاير أنسآ بالهبل
حتى بابك ما طرقته بالعجل
شدني ريح الحنين
وكنت ضامي
وجيت أدور عن بلل
بس ..!
تاه الحلم وادري
ذبلت أغصان الأمل
وين أروح وما بقالي من محل
ووين أداري هالجروح
؟
قبل أفل الحلم وأحضن ما بقالي من
عذاب
وقبل أتوه من الضمى وسط السراب
وقبل أجاري خطوتي عن مد شوفك
وأحتزم وضع الذهاب
دقت أقدامي بعضها وطاحت أكتاف السحاب ..!
ياخي والله ما قدرت أحيا بدون
وما حسبت أن الغلا
ممكن يهون
وما حسبت أنك تخون
وتحطب أحلامي بكفك
وأرتمي دونك بدون !
يعني فرقا؟
وأحتظار وموت حلم
وروح غرقا!
وقلب ذاب وطاح ضلم
طيب أسمع
والا أقول
ما بقى للبوح دور
وكيف أبنصف هالشعور
وساق وصلي
( يفتقد كرت العبور )..!
،
،
تعال وأرخ المسامع ذالمسا يغري
................بي ضيقة ضروف مدري وين اوزعها .!
اوآآه لوّك.. تحس النار .. في صدري
..............ما كان تثقل .. وانا ادري فيك .. بايعها .!
جيت اشحذ الموت ،/ لأيامي .. وانا عذري
.................الموت طب المواجع .. يا مشرعها .!
ما كل غيمة لها تُشرع،/ سما فكري
...............ولا كل رمضى ،/ مناخي يتفق معها .!
وانا المنافي تهاوى في ثرا وكري
....................الين تنبت على صدري مراتعها .!
اصبحت قبلة مسار التيه .. من بدري
............ما غير ابعثر ضياع وجيه ،/ واجمعها .!
يتسوّل الضيق،/ من مدي ليا جزري
............... وأفل ساق امتداد الريح ،/ وأتبعها .!
لو كان صدر الفضى واسع على خبري
..............ما كان تتوسد ،/ احلامي شوارعها .!
بي ربكة اقدار واحكام الزمن تسري
..........رغم ٍ على الروح ترضى في مصارعها .!
لليل خيل ٍ تدابك من على كبري
..............والصبح حذوى النوايب ما يرقّعها .!
كم قلت لابن الارق لا عاد لي تطري
.................. أدريه لو مر في ذاتي يلوعها .!
تطري لي اشياء ما كانت على ذكري
............. مثل أنت والريح لا طشتني أفرعها .!
وسكين دكه ضلام الليل في ضهري
......... وجروح الاحباب ما كل عذر يشفعها .!
ماريد أطوّل وانا ادري طينك الفطري
...............ما يحتمل مزنة افكاري ويبلعها .!
لكنّ قبل انتوادع ( رد لي عمري )
............بعض الضرايب عبث والله ندفعها .!
.
.
أتمنى أن تنآل رضآ ذآئقتكم العذبه
ولكل من مر هنآ 
,
,
[ تعال وأرخ المسامع ذالمسا يغري ! ]
العرض الشجري
