( أول يوم مشرحة )
عريان وممدد
والجو برد
ودكاترة بالبالطو الابيض
واخدينها جد
وتلامذة من دور عيالي
ومالها عد
وانا الميت
بينهم وبين العلم سد
*********
اول ما كشفوا الوش
واحد أغمى عليه
كأنه طبق واندش
وواحد ضحك
وقال.. مابيخوّفش
واللي قال
الضرب في الميت حرام
رد عليه واحد
العلم ما بيغلطش
*********
زاد الكلام بينهم
وانتشر الهمس
ساعة ما جا استاذهم
وقال للجميع بس
سكت كلامهم
والكل جنبي اترص
وكأنه جان
بص لي بصه
نسّتني اسمي
ومن غير حتى ما يسمي
مد مشرط جوه جسمي
قطع جلدي
وصل عضمي
كإني لا كنت في يوم انسان
ولا سجدت للرحمن
ولا بريت في يوم امي
كأني ارض محتلة
وجسمي غنيمة للفاتح
وقلبي جيفه مرمية
وهو طير
يا ناس جارح
*********
وفـ وسط ألمي
وكتر همي
كان لازم اضحك
وده لأني رغم اني
طول عمري أمي
ومهنتي.. بواب
بعد موتي
ورغم جهلي
اتقلبت.. كتـــاب
************
م
ن
ق
و
ل