بسم الله الرحمن الرحيم
الشاعر / مشعل عسام التريباني الشمري
(( الشيب ))
تكفون طيبو باول العمر ياعيــال (1) ترو اخره مافيه لذه ولا طيــــــــــب
من لا تبيّن باول العمرما طــــال (2) فعل المراجل عقب ما ناشه الشيـــب
الشيب كم دمّر عزيزين وابطــال (3) لو بارزو بالفعل جسّاس وكليـــــــب
الشيب للرجّال يوريه الاهـــــوال (4) يالي تقول الشيب مابه عذاريـــــــب
الشيب يقصر باع ذربين الأفعـال (5) الّي لهم بالطيب ماضي تجاريــــــب
عيّب ذياب الخيل كسّاب الأنفــال (6) الفارس المقدام ستر الرعابيـــــــــب
وسعدون في شيبه عليه الدهرمال (7) شامخ فعل بالشيخ فعل الأعاجيــــب
شامخ نوى يشمخ ويعملّه اعمـــال (8) لكن تصداله عطيب المضــــــاريب
شله عقاب الخيل حمـــــال الاثقال (9) وعاف الطماعه يوم شاف الاشانيب
الشيب به للرجل تنقيـــص وإذلال (10) ستر العفون متركين المواجيـــــب
عزي لرجلٍ باول العمر ما شـــال (11) حمل الرجوله واعتلا بالمراقيـــب
يا صار ما يحمل من الطيب مثقال (12) تراه يحسب من حساب الرعابيـب
متى يطيب إنكان للطيب مانــــــال (13) باول شبابه ما حوا المدح والطيـب
الحر فرخه ماكره عالي الجــــــال (14) والبوم ما يسكن طويل اللهابيــــب
طيبو ترا الطولات به عز واجـلال (15) هذا كلام الصح مافيــــــــه تكذيب
حي الكريم الي بذل غالي المـــــال (16) الي بذل ماله كفاحٍ عن العيــــــب
الي بكف الجود للجود يكتــــــــــال (17) يا دنّق الخائب كبير اللغابيــــــــب
عسا الكريم يزيده الله بالامـــــــوال (18) ألّــي يجّمل يالفوه الاجانيـــــــــب
ألّي على الطولات صابــر ولا زال (19) ماقال انا خايف يبي ينقص الجيب
لعل يفدونه من الناس الانـــــــــذال (20) عبّادة الدرهم قلال التراحيــــــــب