[poem=font="simplified arabic,7,black,bold,normal" bkcolor="white" bkimage="" border="double,9,black" type=2 line=0 align=center use=ex num="0,black""]
الا ياقلب شين فراق خلانك وخـــلاني=كوونا ونْكبونا نكبةٍ ما بعدها نكبـــات
والا وحن قلبي حن فرتٍ حن بالثـاني=ضرب عرق النفود وفارق التمرين والراحات
والا وحت قلبي حت حبٍ حته الجــاني=بعد حت الورق يبست سنابيله وعرقه مـات
والا يالجتي لجّة اضلوع الذيب سرحــاني=والا ياتل قلبي تلّتين وتلّتين افــــوات
على خلٍ خليلٍ خلّني واقفا وخـــلاني=ثلاث سنين في صحراء هواه يواصل الغـارات
رماني رميةٍ من بعدها وجعاني وجعـاني=ماغير ارعى النجوم السارية واجاذب الونات
ونين العشق معدومٍ دواه بكل الاوطـاني=ياكود ليا جمع ربي مواليفٍ على اللـذات
وانا اللي كل بادي ليل يسلبني ويسبــاني=حبيبٍ حبني وانا على حبة وفاتي جـات
خياله فالمنام يمرّني مقفي وعجـلاني=والا ياليل يامطْولك يا مَطْولك من سـاعات
سبب خلٍّ حبيبٍ نافلٍ خدرات الاعيــاني=كمل كل الوصوف ونزّهه ربي من الغلطـات
عيونه سود وخدوده حمر والعود ريــاني=وخشم ومبسمٍ ناعم وتحته وضّحٍ عذبات
وله عنقٍ زهاه الصوغ من لولو ومرجـاني=ومجدولٍ تفرّق عن ثمر صدرٍ كما اللمبـات
ملكني ما ملكته والهوى غالب وسلطـاني=ملك قبلي رجالٍ قبل يملكهم لهم سلطات
كواني ثم كواني لا جزاه الله بالاحسـاني=وزاد الكيتين بخمس واتبعهن عشر كيـات
نساك الله كان انك بعد هالعرف تنســاني=واصابك ما يصيب الصابرين بساعة الشــدات[/poem]
للشاعر / خلف ابن هــذال العتيبي.