اذكر عيونك حورها من الخجل زايد شويه
بس هذا اذكره وغيره من الذكرى محيته
لا بعد .. اذكرشعرك اللي يحب لعبة ايديا
سالفه شعرك لحاله لو ابشرح ما وفيته
واذكر ان طعونك اللي بالظهر كانت قويه
ايه اعرفك بس اخاف الجرح يكبر لاطريته
انتي كنتي شي ثاني .. كنتي شي مني وفيه
اقرب انسانه لقلبي حطمت قلبي في بيته
تذكرين : الورد " الاحمر " يوم جبتي لي هديه
قلتي : تكفا لايموت الورد لك غالي شريته
مات قلبي قبل يموت الورد وجروحه نديه
في يديني جبت دم القلب للورد وسقيته
كنت احس اني اضحي .. مادريت اني ضحيه
كنت احسب ان العطى يثمر بعين اللي عطيته
راحت احلام العمر .. روحه كذا من غير جيه
حتى زرعي اللي زرعته .. ما توفقت وجنيته
من عقب ماكان ليه .. صار له ماهو بليــه
من خذاه !! وقلبي يسأل عنه لكن ما لقيته
دايم اسمع عن خوي (ن) خان في خوه خويه
موقف (ن) يمكن كتبته بالشعر قبل وقريته
المهم .. ماكنت احسه لين ماجتني بليــه
من يديك وحسستني وخاب كل اللي هقيته
يا " بدويه" مو كذا رد الجمايل يا بدويه
البداوه علمتني كيف ارد اللي خذيته
في الزمن هذا .. محال الوافي يلقى له وفيــه
الزمن هذا خذلني في محبتك وبكيته
كنت اقول : الطيبه احسن من علوم الرديه
كنت اقول وكنت اقول ولا نفعني ما حكيته
مابقا عندي كلام ولا بقا بصدري بقيه
من تفارقنا بصدري هالعتاب ولا شكيته
هذا كله اللي عليك .. وقولي انتي ما عليه
بسمعك للصبح يمكن اسمع ما بغيته
اما شكلك اعرفه عرف الموصى للوصيه
قلت : ما اعرفه وفي قلبي اقول : انــي فديته
ايه اعرفك والعذر اقبح من ذنوب الخطيه
انتي شكلك صدقيني راح اموت ولا نسيته