ابا اتجلد وين انا والجلاده
ابا اتعزا وين انا والعزا وين
احترت في جرحي ومدة حداده
الليا نشدت القلب قال انشد العين
وضيعت عقلي عقب ذيك الركاده
مافقه كلام اللي لفوني معزين
وازرعي اللي قبل يوفي حصاده
جاه القدر باعصار نار وبنزين
قلبي على باسم تكسر شداده
يرفس كما طير كسير الجناحين
وخيال باسم كلما الفكر صاده
جره خيالي وحجره بين قوسين
له صوره رسمتها بالوساده
اضمها والليا غدا الليل ليلين
يالايمي ماحد بكى من سعاده
وفقد الولد يفرا كبود البعارين
ضيعت ياقلبي زمام القياده
انا اشهد ان الموت قبل المرض شين
عد على راعيه ماهوب عاده
واشين على المفجوع في موت غالين
ياليت بين المقبره والعياده
جسر يخفف لو من الميه اثنين
ماينبري جرح الفؤاد بهواده
وما انساه انا لوقلت ابانساه بعدين
وانا ادري ان العمر مابه زياده
لكن عسى ربي على فقده ايعين
اللي يخفف من عذاب افتقاده
وهموم قلبي لو همومه ملايين
ان اخر الفاظه حروف الشهاده
عساه في جنات خضر البساتين
واطلب من اللي مايخيب عباده
انه يثبتنا على الحق والدين
مرثية لوالد ابن أختي في ولده