طال الغياب
طال الغياب ولامني من أودّه*** وبقدر طول الغيبة إيطول العناق
يا مالك قلبٍ وصوبك تحدّه***إن كنت مشتاق ف..انا ألف مشتاق
تدري الفراق يجدِّد الحب عهده***وانا من الفرقا على جمر حراق
شرقٍ وغربٍ صاحب الشوق وحده***حر جناحه دايم الوقت خفاق
يا كم تريّا اللحظه اللي تردّه*** كنه من الفرقا الى الموت ينساق
وكانه تذكَّر من كسا الوَرْد خَدّه***جرى على خده من الدمع مهراق
هذا امتحانٍ للغلا فيه شِدّه***إن كان ما زلنا مثل قبل عشاق
ما اغلى النهار ان الليالي تضدّه***لو كان سرمد ما أظنه بينطاق
يْزَيِّد غلا اللؤلؤ صعوبة مكدّه***لو هو رخيص ما يعلق في الأعناق
وحتى ربيع الوقت لو طال مدّه***ما شفت يا خلي له الناس تشتاق
للشيخ محمد بن راشد ال مكتوم
العرض الشجري
