ياضاق صدرك للولي نقّح ايديك=الواحد اللي مايخيّب عبيده
واعلم تره من رحمته مايخليك=ربك كريم وكل الارزاق بيده
يامصخّر الارزاق منج المداريك=نفسي من التقوى تزوّد رصيده
يارب اناعبدك فقيرٍ وناصيك=واطمع بغفران الذنوب العديده
اسجد لوجهك وابتهلك واناجيك=وارجيك توفيق وحياةٍ سعيده
مايلحقن في رحمة الرب تشكيك=مؤمن من اهل الدين واهل العقيده
مسلم سليم من العقد والشرابيك=ولي اسوةٍ باهل العقول الرشيده
واسجد لوجهك في صلاتي واراجيك=يوم ان ميت القلب ضيّع حصيده
اشدق ورع من خوف بطشك واناديك=وارجع واكرر سجدتي لك واعيده
ياسامعن صوت المنادي وداعيك=يامحيي العود الرميم وهضيده
مشعل عسام الغافل التريباني الشمري في 22/12/1441هجري