من الارشيف اتمنى تحوز على رضاكم
اليوم بنت الناس في بيت رجال
***************شطر ٍ على لساني واغنيه شيله
يابري حالي ضعت والدمع همال
***************عن كفي دمعي مالي اليوم حيله
لا والله الا صار للحزن مدخال
***************ولا والله إلا ضعت كيف الوسيله
القلب من بعد الخبر جاه زلزال
***************لولا ضلوعي طار واعزتيله
والحال بعد اليوم ماضن به حال
***************حتى الفرح ماضن يبقى قليله
ياعزتي لي كان جاني على البال
***************وحنيت لايام للفرح بس ليله
لاقبل عليّ ولثم الوجه بالشال
***************وارخا على المتنين ذيك الجديله
ياعزتي لي قال من ضمن ماقال
***************قلبي يبي قلبك ولا ارضا بديله
واليوم راح وعقّب القلب غربال
***************واقفا مع الحرمان خل وخليله
والقلب ماهو بعده اليوم مدهال
***************يحرم عليه الحب بعد الاصيله
والعين يحرم شوفها كل الازوال
***************ويحرم على المسمع كلام يحكيله
وسلامتكم