تسعة عشر...عام والذكرى وماضينا*** والطيب والولف والآمال والعبره
مهما اسولف من اولنا لتالينا*** يضيق وسع المكان اللي على كبره
يارجم الاحباب ياذكراه نادينا***ماهزك اقدام رجلينن لها غبره
وحنّا براسك رمينا كل امانينا*** حتى جمعنا الامل من كثرة الخبره
احلامنا غير والذكرى موانينا*** نرسي عليها مع الايام للعبره
والحاضر المر ضاقت به فيافينا ***بعيوننا الكون كنّه (خرم) هاالابره
واخاف الأيام لامرّت تنّسينا ***حبن دبور السنين العوج تختبره
تمر الايام لاكن ماتعدينا ***مهما تعبنا ولاندري وش الدبره
نصبر على الهم والضحكه تكفينا *** ياصبر ايوب من بلواه ياصبره
كل المواجع عليها الوقت ممدينا ***من يوم قدت قميص الصبر من دبره
احيان الأشواق لاقامت تمنينا *** من (مهد) الأحساس تاخذنا على قبره
وتسعة عشر عام والضحكه تواسينا *** وحنا على الولف والآمال والعبره