السلام عليكم ورحمة الله وبركاته
يسعد مساكم جميعاً ...
اطـل عليكم بعد غياب قصير واقول لكم يـــــــا هـــــلا فيكم ومليون مرحـــبا
يسعدني اهدائكم آخر قصائدي بعنون ( أنقاض الاطلال )
على جوادّ الأبل .. وأنقاض الأطلال=
ومفازة الصحراء .. ومَرسى السفينه
عادت بي الذكرى على كل الأبطال=
في منهجٍ بعض البشر ناهجينه
أبو جعفر المنصور.. للحمل شيّال=
حط الحَجر فوق الحَجر مأسسينه
نمت وصحيت بنغمة الغوص .. يا مال=
ولقيت نغمات الفرح آسرينه
وأقول شفت الشيخ بالحلم وش قال=
أحلامنا .. تصعب على مفسرينه
أمد بيدي سبحـتيـنٍ وفنجال=
وأقول هذا الشعر يا مدوّرينه
وأقول بحر الشعر يلطم على الجال=
ولا أقول وحدي .. كلهم راكبينه
وأقول بيت الشعر مَخـرَج ومدخال=
وغطـاوةٍ تحتاج لمحللينه
الغزوة اللي ما تجيب من الأنفال=
ما عاد فيها الاّ الجمل متعبينه
ناسٍ تجيب المال من غسل الأموال=
وناسٍ يجيها المال من والــدينه
لا صار سعر ريال يساوي ريال=
أبيع لأول سومه لسايمينه
شيب الغوارب باعها كل جمّال=
واللي برأسة زومةٍ عاسفينه
تفاوتت ما بين شاري ودلال=
متخالطٍ غث الكلام وسمينه
معبَر جبل طارق مضيقٍ وغربال=
ما مَر به من عابر مجمركينه
في غبة أمواج البحر شفت الأهوال=
والساحل الشرقي به مورطينه
ليلة زفاف اللي تغنت بالآمال=
عند النصايب حطوا الياسمينه
حطيت له بالفكر صورة وتمثال=
ما مثلها صورة .. عزيزة .. ثمينه
يا خوف قلبي فرحة الوقت تغتال=
في عَالم ما ينعرف وش رطينه
جاء قارىء التوراة بالمشي يختال=
وبلقيس عَرشه من سبأ محضرينه
ويا صاح كان إنك للألغاز حلال=
قل لي من اللي هَدّ حصن المدينه
زلزال ما يشبه ولا كل زلزال=
طلّع من الباطن أمورٍ دفينه
بصمه لها بين التواريخ منزال=
تبقى على الأشراف ذكرى حزينه
الجبر ما يجبر لنا كل رجال=
حتى ولا حكايات ريّـا وسكينه
فيها تروح شيوخ و رجال واطفال=
بؤرة فساد .. ووين مستأصلينه
طاحونة الأموات تمشي وتشتال=
والباز صار شعار متوارثينه
بعِقد الجواهر ما بقى غير سلسال=
والجوهرة صارت بيدهم رهينه
سجدة سهو تأتي بها بعد الإخلال=
شمّاعةٍ لأخطاهم معـلـقينه
واقف على مفرق طرق ذيك الأجيال=
وضاع الطريق بخارطة راسمينه
وان جيت أعيد القول .. ما تنفع أقوال=
في منهجٍ بعض البشر ناهجينه
العرض الشجري
