السلام عليكم جميعا ,, وكل عام وانتم بخير ,,
لي الشرف بتواجدي بينكم ,,,
وفي هذا المساء ,, راق لي ان اصافحكم بهذه المتواضعه كعربون محبه ,, ادامكم الله
ذكرى مع الأيام تقسى على الروح
كفّنتها باقصى المحاني طريحه
دايم تجي بالبال واسمع لها نوح
مثل البكا لا خان سدّ الجريحه
بنزف لها ما دمت مجروح مجروح
دمّي ودمعي والشقا بستبيحه
لا ما قسى قلبي ولا نيب مسموح
مير البلا لا صار عذْرك فضيحه
جتني قمر صافي وانا ليل مشفوح
هايم على ضوّ النجوم المليحه
واثر الهوى مايبني اركان وصروح
بارض ٍ تساوى غشّها والنصيحه
في ساعة ٍ يطري عليْ لعب ومزوح
ارسل لها كذْب الكلام وصريحه
واذا بدا في صوتها الصدق مفضوح
قلت اسمحي لي ما شحنت الشريحه
يا عازف التحنان وسط الحشا روح
واسمر لها لو هي بصدرك ذبيحه
كود الفرح يمطر على قلب مذبوح
ويبلّل عروق الهشيم وضريحه
عقْب الندم ومجادل الدمع والبوح
ودّي اقبّل راسها واستميحه