المدى ليل وأنفـاس المسافـة ظروف
والجروح القديمـة باقيّـة مـا شفـت
قلت أضم القصيد اللي تبعثـر حـروف
يمكن الشعر يشعل شمعـةٍ لـي طفـت
طحت عاشق غيور ولا قويت الوقـوف
من مصابي روّت عين القهـر وارجفـت
بين شرهة غرام وجـرح عيّـا يـروف
جيت أقهوي همومٍ مـن نحيبـي لفـت
يا عذابي لبس شمس الحنيـن الكسـوف
وأنت تكوي عيونٍ من ضماك انشفـت
يوم ناي المواجع عنـد سمعـي عـزوف
لعنبوها عواطـف كانهـا مـا أعطفـت
يالخفوق العما هـدّك خفـوقٍ يشـوف
يوم رجلك على درب أشتياقك حفـت
صاحبي لا لحق قلبك مضامي وخـوف
قيس بحر المشاعر كـان عينـك رفـت
ما طعنت الهوى واللحقت فيك الحسوف
جيت أبرر شغف قلبٍ وعيـنٍ وفـت
شادن الروض يا قايد جمـوع الخشـوف
المدى فيك ليلة شوق جـت واحتفـت
لك وقف نبض قلبي والمحانـي صفـوف
لو عيوني على شانك بكـت وانزفـت