النصيحه

..السلام عليكم..
هذه القصيده تعجبني جدا واجد بها كثيرا من نفسي
ولكن كما يقال/ارضاء الناس غايةٌ لاتدرك
وبما ان هذا المنتدى الذي به يُحتذى لايقطنه الا المبدعون
فانا اقول: (ارضاء المبدعون ضربٌ من الجنون)
ولكنه جنونٌ بمرتبة الجنونِ الابداعي
وقطفت هذه الزهره من بستان الشاعر عبدالكريم الجباري
اتمنى تلاقي القبول

وش يرفع اللي هاقين فيه لاطاح
انشهد ان طيحته ماهي بطيحه

واحر منها لاتذكرت ماراح
يوم نصحوك ولاسمعت النصيحه

وقفت معه بهم وبحزن وافراح
وزعلت من شانه وجيهن فليحه

واللي استفدت هموم وطعون وجراح
ويح اللذي سواء فعايله ويحه

ياطير يومني دعيتك بملواح
ابا تعذر فيك واجر صيحه

ماهو عشانك طنب القلب بصياح
اصيح من همٍ عسى الله يزيحه

القلب قفل ولا لقى القفل مفتاح
واللي ترادى بي عسى الله يبيحه

اخيل برق العز من وين ما لاح
ولا خيل براق النفوس الشحيحه

الله خلقني للثقيلات نطاح
اتعب وهم قلوبهم مستريحه

لو شفتني مرتاح ماني بمرتاح
اضحك وفي عيني تضيق الفسيحه

مطلب ومن دوني بواريد ورماح
قربي لها خطر ومردي فضيحه

ماخاف لكني بلا درع وسلاح
ماقد قنيت سلاح كود القريحه

كرامتي قبل الخساير والارباح
والله يديمك يالعلوم الصحيحه

خسرت لي قوم ٍ على شان الانصاح
وصارحت ناس ٍ واحسب انها صريحه

ناس ٍ تفرقها مفاهيم الاصلاح
وتجمعت على الصحن والذبيحه

لو قلد الجاهل من العقل بوشاح
تلقاء معه كبد الركاده جريحه

ولو يسكت العاقل ولا ادلاء بالافصاح
تلقاء تعابير النواظر فصيحه

والله خلق لي عقل ماني بمداح
ولا اشره على ذم الزمان ومديحه

وقت ٍ تغير وقلبت فيه الارياح
وعامت مراكيب الجهاله بريحه

تبي تفارق صاحبك وانت مرتاح
لا شفته اخطاء عاتبه في نصيحه