أذواق وأذواق وأذواق

الليل طرّف والسهر بين الاحداق
والصبــح حلم البارحة ما ضــوابه

ليل السهر يا معذبي تو ما فـــاق
مـــن سكرته من غفلته من عذابه

ما دام حتى احلامنا البيض تنعاق
عنّا وش اللي عــــــــــــاد باقي نهابه

لم الورق لا ينكشف سر الأوراق
ما تشبع الاوراق جـــــوع الكتــــابة

ولا تبرد الونة لهب حر الاشواق
لا (ون) مجـــروح النوى.. زاد مـابه

ولا ينفع الولهان ترديد مشتاق
ان ما شــــــرب صافي زلال وروابـــه

وانا ادري انك مرهف احساس واخلاق
مـر الهوى قلبـــــك وهجيت بابــــــه

اللي قريته كفنه وسط الاعماق
خــــل السؤال يمــوت ( موته إجابة)

يا اطهر وصال نهايته كانت افراق
طهـــر الوصـــال اللي بــــداه انتهى به

الصبر مر وبعض الاحيان ينذاق
كـم علقـــــم كان الشفــــاء من شرابه

اصبر وخل الحل بيدين خـــــلاق
الله كريـــــــم ولا يخــــــــيب الرجا به

والبعد موجع والسفر هم وارهاق
واللــي يحبــــك درب وصـــلك مشابه

الله وامانه .. كل ما ناض براق
ضمـيت طيفــــــك والخفوق احتفــــابه

وسقت المشاعر والغلا جاك منساق
مثل القـــــراح العذب مثل (السحابة)

لا أرخت ذوايبها لوت كل الاعناق
تخيلها شــــــوق وشموخ ومهــــابة

لولا اختلاف اذواق وأذواق واذواق
ما شفــتك اجمل من جرحني عتــابه

يا اعذب و ارق من الندى عند الاشراق
.والطف من النسناس لاسرج ركابه

تدري وش اللي محرق ( قلبي ) احراق
انــك ( بعيد ) وحزن الايام غابـــة