.
[poem=font="simplified arabic,5,black,bold,normal" bkcolor="transparent" bkimage="" border="none,4," type=2 line=1 align=center use=ex num="0,black""]
جت بأول الشارع وجفني بين سجْده واعتدال=ومرت وذابت بي قبل .. تسجد من الجفن شعره
تجر ثوب الغطرسه .. والعنجهيه .. والدلال=تمشي تقل تمشي على .. شىٍّ تخاف تكسّره
ساق يعزم ساق وخصر ان مالت السيقان مال=ينثرعناقيد الغنج .. والشوف .. يتليه بشَرَه
حتى الرصيف استانس لخطواتها فوقه وطال=كل ما وطت حجر .. غمز .. للي وراه .. يبشره
شربت زمزم حسنها .. حتى سكرت من الجمال=مثل الذى ما شاف خير .. او شاف بس استكثره
وظليت لا نايم واقول: اسرفت يا حلم بخيال=ولا واعى اشهد غيرها.. ما خلّفت حوا .. مرَه
تكلّفت .. عبث .. تبى تستّر بغربال شال=ولا كلف الله نفس ذاك الشال فوق المقدره
وجهٍ تنفس به صباحٍ من صباحات الشمال=اصفى من الطيبه بياض .. ان ما تنرفز ... احمره
تفاحتين ليا ضحكن .. قل مات سوق البرتقال=وليا بكن .. توردت مكانهن ... الف ثمره
وتوتٍ طغى واستفحل وعاث بشفايفها زلال=تستطعم .. ليا بلّته بالريق .. نكهة سكره
وثغرٍ يحج الشوف غصب لقبته من غير بال=الله يرحم من لمس ركنه ... ومن حب حجره
وجفن ان تثاوب زلزل العقل ونفش عنه الهبال=تقوم بالروح القيامه .. قبل ماتستغفره
وهذا لحال وقدّها المنحوت من جوهر لحال=سبحان من قال لعجينة طينها .. كن جوهره
تقفي بردفٍ ما تقول الا تقل ينده .. تعال=وتقبل بصدرٍ .. ما تقول الا من اللى زرّره
والثوب .. ماكنّه مصدّق تلبسه ابن الحلال=حتى حضنها حضنةٍ .. ياعلّ ربي يقهره
حسنٍ سفك دم الانوثه وانتهك عرض المحال=ومن كفّها الغض انتهض نورٍ .. تكاسل اكثره
جت بأول الشارع ولا ادري عقبها من لا يزال=مايلقط انفاسه ولا عقله .. ولا غض بصره
هذا وانا ما شفتها الا بين .. سجده واعتدال=من جفن .. يقسم غيرها ماشافت عيونه مَرَه[/poem]
.