السلام عليكم ورحمة الله وبركاته
قصيدة الشاعر عواد الطواله نقلتها لروعتها
.................................................. .........................
كل ما قربت راسي للمخده= مرني طيفك عن النوم وخذاني
والله أنك غير يعني مثل جده= يعني إنك في حياتي شخص ثاني
ينتهض قلبي يبي وصلك ورده= ينتهض وترده العوج المحاني
ليت وقتي جايبك من قبل مده= ليش يا عمري تأخر بك زماني
جيتني كلك روحي مستعده= كلها لك حب وأمال وأماني
كل يومٍ فات لي عن عام أعده= ومن عرفتك صارت أيامي ثواني
دوك قلبي وين ما يعجبك وده= ولك علي مناظر البيض الغواني
نظرتي عن كل مخلوق مصده= من عرفتك صرت رجالٍ أناني
الليالي فيك بيضٍ مجرهده= للحياة بوصلك ألوان ومعاني
والهموم اللي بقلبي مستبده= من عرفتك صارن أفراح وأغاني
ياهلي لو تنرسم عينه وخده= وأعرف لرسمه رسمته في بناني
أذكر الله لاثنا من حسن قده= من يطل أقرأ له السبع المثاني
والله أني لانتزع قلبي ومده= له إن كان الله هداه ونساني