تصحيح بعض الاخطاء في حياتنا على طريقة مزيون بعد حيي(لاتفوتكم)

بسم الله الرحمن الرحيم

الفكرة طقت في دميجتي يوم الخميس وانا واقف عند الاشارة وبسم الله بس طقت الاشارة خضراء ومادريت الا شعر راسي وقف من اصوات سمعتها..طبعا انا كنت في حاره اهلها راقين جدا وطبعا انا كنت هناك علشان اشوف الشلالات اللي عندهم والحدائق اللي تسر الخاطر وعلى فكرة بداية الحاره...ابدا مافيها طلعه ويطلق عليها(طلعة..........)

واسم الحي اسمين واحد تقول لاي شخص من حايل والثاني اذا جانا واحد من برى حايل

نعود لمحور حديثنا وبدت الاصوات((طاااااااااااااط..طييييييييييييييط...امش يالوح...ليه ماتوخر ياسطل ((كل هالكشخة وسطل))

المهم مشينا من الاشارة وصرت كل ماوصلت اشارة الف يمين علشان مايجينا اكثر من سطل

عاد طقت براسي فكرة تصحيح لبعض الاخطاء علشان نعيش وباي حاره

نقول بعض الاخطاء السلوكية ونقول لكم تصحيح هذا الخطاء ومستعد لاي استشارة

الموقف الاول:

تفتح الإشارة .. ثم يزمّر لك االي وراك ... ثم تشوف في المراية ... وتلقاه يهاوش ومعصب(يخانق يعني) .. ثم تشر بيدك تتأسف ... خطاء يالغالي

الصحيح : تنزل له بمفتاح العجل .. أو عجراء ... وتطق الدريشة عليه ... وأول مايفتحها ... جرّه مع شعره ... واجلده لمين يقول العيد الليلة ...

ثم ..

قله مرة ثانية تصير الاشارة خضراء .. تصير حمراء .. تصير زرقاء ... تاكل تبن(اعزكم الله) وتسكت ..

الموقف الثاني:

جالسين أنت ومجموعة من الشباب ... وعندكم علب بيبسي ... وطلعت تبي تغسل ... فيقوم صديقك ويرج العلبه ... ثم تجي تبي تفتحها .. ثم ترشق بوجهك ... ويضحكون عليك .. فتقول ... هههههه الله يقطع بليسك والله لارد لك المقلب يالنكبة.. طبعا خطاء ياقلبي خطاء

الصحيح : تمسكه ... مع رجليه ... وتصبخه بالارض صبخ ... وتجيب قوطي ببسي .. وترجه رجا مبرحا ... ثم تفتحه بوجهه ...

ثم ..

تقوله لاصرت أخوك الصغير ... والا تمون علي .. امزح معي هالمزح ... وهالمرة بسمح لك عشان خاطر الموجودين .. والا تدري !! ...
ثم عفط العلبه... وحطّها بمخباته ... وقله لاتطلعها من مخباتك الا اذا رحنا ...


الموقف الثالث:

تمشي بالحارة .... مثلا رايح للمسجد ... ثم يجي بزر من هالبزراين ... ويفلقك بحصاة .. ثم تلعن الشيطان وتعوذ من إبليس ... وتكمل دربك .. تقول بزر ماعليه شرهه ... والله خطاء ياقلبي

الصحيح : تاخذ لك بلكّه ... وتصكه به ... إن ضربته ... فهو خير ونعمة ...
وإن ماضربته ... خذ عصا .. وامسكه واجلده ...
إن صاح خير ونعمة ...
وإن ماصاح .. فاتركه ... ورح صل وخلص مشواريك... همن ارجع له .. وتفرّغ له ...
أكيدماراح تتحمل لمين وقت الصلاة الثانية ... وعلى مسؤوليتي هالمره يبي يصحيح لاتخاف

الموقف الرابع:

ساكن بالدور الأرضي ... وفوقك ساكن واحد ... وصارت الساعة وحدة ... وأنت بتنام ... واللي فوق لجّه وصجّة ...
ماتقدر تنام ... ثم تروح لهم .. وتدق عليهم ... وتقول لهم .. ترى سويتوا ازعاج وانا بنام ... ثم ترجع .. وتلقاهم نفس الحالة .. ثم تقول .. الله يقطعهم ماخلوني أنام .. وتواصل للصبح .. ودربي راسك وانت رايح للدوام وهذا خطاء يابعد حيي

واهم شي ياجدي انك تدق على محل دشوش ... وقله نبيك تجي تركّب لنا الدش بالسطح ... ولاتنسى تجيب الدريل معك ... لأننا بنركب 15 دش .. الليلة ..
ثم واصل للصبح ... صح ان الصوت بيوصلك اولا لكن اهم شي بتغثهم يسكتون مايسكتون تنح ولا يهزك ريح

الموقف الخامس:

بالشبه رحت انت اول واحد وانت تفرفر بهالقنوات اخترت فلم مثلا وجلست تتابع..يجي واحد من الزقرت ويغير القناة وانت متحمس...وتجي انت وبكل مثاليه وتقول ياخي تكفى يرحم والديك والله اني متابع والفلم شوي ويخلص تكفى ...تصدق عاد انك دجاجه ومجمد بعد يعني لابك لاطعم ولا ريق

شف يالغالي صكه بالطوفريه(الصنيه) ... ولحقه ببياله والا طفاية الدخان ... وخذ منه الريموت .. بدون ماتكلمه ... وحط فيلمك ... وتابعه بصدر رحب ...

الموقف السادس:

بعد اي موضوع لك بالمنتدى تجي وزعمك مثالي وتبي تبين انك وذف وتقول اسف اني طولت عليكم وسامحوني وتتاسف للمشرف العام وتستحي من ساري وتقول ابي اتعب اجوديه وهي تقراء ويمكن بقايا حلم تنتفخ عيونها لان الموضوع طويل ولا جوكر مسوي لي توقيع وراح ياخذ موضوعي مساحه من المنتدىولا سرحان ولا عشوق ولا اليافعيه او حايليه او متلثمة بشعرها..او اي عضو بالمنتدى ...اذا بتسوي كذا غلطان وماعندك ماعند جدتي

اختم موضوعك بقوه وطير عيونك واذا ماطارت عيونك جب حمام وطيره(فكرة)
وقل لهم اذا طولت عليكم بكيفي وانا حر ولاغصبتكم تقرون كلامي

واحلى سلام لاحلى اعضاء ومنتدى ولكل من نسيت اكتب اسمه

مهبولكم/مزيون حايل