العضو 2:
أصلا أنا " أحس انه يكرهـ كل الناس !
العضو 2:
مادري مادري أستغفر الله ، أخاف نظلمه..
بس باين من صورته الشخصية إنه حقودي !
العضو 1:
يعني ما يصير أكلمه مره ثانيه .. ؟
العضو 2:
هيه أحسن ..
أبعد عن الشر وغني له ياخي..
العضو 1:
لا ما راح أعدّيها له ، أنا أراويه والأيام بيننا ..
عيل يكرهني وأنا ما سويتله شي !
العضو 2:
هيه لازم تعامل الناس مثل ما يعاملونك ..
-2-
العضو 2:
ياحليله مشرفنا .....!
- روعة !!، هذاك المشرف! -
" أحسـ " ـه شاطر وحبوب وما يبغى يزعل حد منه ..
العضو 1:
لا تجيب طاريه تكفى ..
لا تقول ياحليله !
مالت عليه ..
العضو 2:
أوف ، ليش ؟ شو مسوي ؟
العضو 1:
تخيل كل ما نزلت رد ، حذفه ، كل ما نزلت رد حذفه !
" أحسه " مستقوي وعنده إشراف ..
العضو 2:
لهالدرجة ظالم ؟
لا عاد ، ما كنت أتوقع إنه كذا ..
العضو 1:
هيه ، حتى " أحس " أنه مستّقد للأعضاء ..
يا غير يحذف بمواضيعهم وبردودهم هالمساكين ..
العضو 2:
حسبي الله عليه ، إذا هو مستقعد لنا حنا بعد نستقعد له ..
- 3 -
العضو 1:
المشرفة القسم اللي أحبه خلت الإشراف ..
العضو 1:
تتوقع شو السبب ؟
العضو 2:
" أحس" إن في حد مزعلنها !
تتوقع زعلانه من الإدارة وإلا من عضو معين ؟
العضو 1:
لا لا ما أعتقد ..
العضو 2:
إلا ، أنا " أشك " إن هذا اللي صار لها ..
أصلا لما المشرف يترك إعرف أنه
متضارب مع حد ، أو حد مزعلنه ..
العضو1:
عيل شكلها الإداره هي السبب
العضو 2:
هيه " أحس " كذيه ..
حالــة الـ " شكــشكـة " :
حالة متأزّمـة ..
تيي للناس بشكل يفوق الوصف ..
متى تحدث ؟ :
تحدث لما تصير الأحاسيس و الشكوك تتحكم في
تعاملات الناس مع بعضها !
في هذي الحالة يصيرون الناس " يشكشكون " ..
أسبابها :
لم يعرف سببها الفعلي إلا الآن ..
في ناس تقول أن سببها هو التفكير بشكل
سلبي في كل الأمور ..
هذه الحالة صنفت من أشد الحالات اللي تخلي الشخص
حاد الطباع في التعامل مع غيرهـ ..
للأسف منتشرة وبكثرة ، بشكل يلفت الأنظار ..
لها آثار مدمرة ، كل ما زادت حالة الـ " شكشكة "
زادت هالآثار قوة ..
العلاج :
- التخفيف من كلمتين " أحس " ، " أشك" ..
- تصفية النية عند الحكم على الآخرين ..
- النظرة الإيجابية الدائمة في جميع تعاملاتنا مع الناس ..
نصائح وقائية :
- مب كل شيء ينقال يتصدق ..
- لو واجهتي أختي العضوة وأخي العضو أناس أمثال العضو 1 و العضو 2
من ناحية التفكير ، طنشوهم ..
نكمل مابدأنا به ..
الـ " شكشكة " غالباً تبدأ بيننا وبين نفسنا ..
نصير نهويس باللي حولنا كالآتي :
أحس فلان يقصدني بكل مواضيعه ..
أحس فلان يكرهـ فلان ..
أحس فلانه تكرهني ..
أحس فلان متكبر ..
أحس ... وأحس .. وأحس ..
تستمر هالـ " شكشكة " لين تتطور ..
ويصير الشخص مايتقبل تصرفات اللي حوله بمجرد أنه
( حس ) بأن غيرهـ يتقصدهـ ولا يكرهه ... إلخ ..
مع الوقت تبدأ تطلع آثار الـ "شكشكة " ..
وهي التخاصم ، والتعامل الحاد بيننا وبين بعض مثال :
حسيت إنه يتقصدني أنا أراويه !
حسيت إنه يكرهني ، بأكرهه ..
حسيت إنه .... بـ .....
وبالتالي تصير بيننا مشاكل سببها :
أبد ، ولا شيء !
شكشكنا في البداية شوي وبس ..
لما نبني تصرفاتنا مع حولنا على أساس الـ" شكشكة "
فـ هذا غلط بحقنا وبحق الآخرين ..