بأصنع قراري وكل شي بيدي
مليت من صبر عطاني مضره
أعيش في عصر لجدان جدي
عادتهم متمركزه مستقره
أسوار خلف أسوار ودي اعدي
ودي أفسر ضجة الناس بره
الناس حولي للقمر تستعدي
وأنا أحسبه موجود وصف لغره
قررت اوقف ثورة العرف ضدي
وأحررك يانفس و أعيش حرة
لا تسافر
لاتسافر و تتركني أجاهد غلاك
كل شي يهون الاجهاد الغرام
اماتبقى معايا او اسافر معك
لا تخليني لطول الليالي طعام
خوفي البعد لامنه خذاك و طواك
مثل قصر تولاه الزمن و الهدام
هاجس النفس هو بلوى أبوك و بلاك
من يحب الضمان اللي وراه التزام
لاتسافر وانا اللي في رجاء الله و رجاك
لا تسافر و تلقاني بقاي حطام
حيرة
لا..قال ردي لي ولا..قال روحي
لا..هو مريحني ولاهوب مرتاح
يغيب ويعود يفتق جروحي
واذا استجد الجرح لوح لي وراح
واضحك واجامل وادعي بالفروحي
وبداخلي نار...وتجاريح وصياح
واحاول آخفي جروحي بروحي
واخيط جرح تنفتق عدة اجراح
وان قربت دمعات عيني تفوحي
الله أكبر صار لي قلب مزاح
مقدار
مقدار حبي عالم فيه ربي
والا الموازين لغرامي ظلومه
لا..لاتقارن حب أمك بحبي
أخاف من عينك تطيح الأمومه
أخشى يقولوا عنك ماهو متربي
مابي أشارك في عقوق الرحومه
ياغايتي ماعاد فيني أغبي
حبك تعدى حدود نفس كتومه
مابيك تسأل عن مقادير حبي
بكره مع الأيام تطلع علومه
الرحيل
ميخالف ارحل بس لاترحل بعيد
ميخالف اهجر بس خلك بداري
ميخالف اعشق الف عذرا من الغيد
ميخالف اجرح بس حاول تداري
أنا عقب فرقاك ما مرني عيد
العام ذا من كل الأعياد عاري
ياصاحبي لا تكثر العذل وتزيد
معذور الأعمى لو مشى الليل ساري
بابيع عمري لك من غير تحديد
عمري رخص من يوم شفت انكساري
عقبك.قسم بالله.مدري وش اريد
أبنتظر ما بي ثمن لانتظاري
واتركني أغرق في بحور التقاليد
إرحل وسافر بس خلك بداري
وصيتها لزوجها قبل وفاتها ..
ترى الذبايح وأهلها ماتسليني
أنا أدري إن المرض لا يمكن علاجه
أدري تبي راحتي لا يابعد عيني
حرام ما قصرت يديك في حاجه
أخذ وصاتي وأمانه لاتبكيني
لو كان لك خاطر ما ودي أزعاجه
أبيك في يديك تشهدني وتسقيني
أمانتك لا يجي جسمي بثلاجه
لف الكفن في يديك وضف رجليني
ما غيرك أحد كشف حسناه واحراجه
أبيك بالخير تذكرني وتطريني
يجيرني خالقي من نار وهاجه
سامح على اللي جرى ما بينك وبيني
أيام نمشي عدل وأيام منعاجه
همي عيالي وأنا اللي في كافيني
علمهم الدين تفسيره ومنهاجه
أثر يديني
حان الفراق وتم توديع غالين
قسوة زمن وظروف ماهي رحومه
وحاولت ابدل موقف العسر باللين
وابين قدامه جسور ظلومه
واعاتبه وانقد على دمعة العين
وهذا الفراق اللي تجينا علومه
ومسكت نفسي كن ما صاير شين
أخشى على خلي يشقق هدومه
ثم قلت وش تنطر حبيبي لهالحين؟
أثر يديني ما سكات كمومه
اعجبتن هذه الشاعره الرائعه واحببت ان تشاركوني معرفة
شيئا عنها
مودتي