استودعك من يبث الروح باعضا الجسد
اللي ملا الكون نوره وامسك اركانها
يانهيت رحلتك ياماجد بتلك البلد
اللي على سنة الدجال سكانها
امسك على سنة الشافع بيوم الوعد
واسرج خيول المراجل وسط ميدانها
انا ادري انك صغيرن بس طير السعد
ينذر حياته على القمه ومن شانها
عرّض نحور المصاعب رمح صلف الجهد
واجذب خطام الامور وحط ميزانها
لاترجي اعمال يوم السبت يوم الاحد
ادخل مجال الحيات بكل بيبانها
استودعك من يحفظ الكون هو الصمد
اللي يغيث القلوب مثبت ايمانها
يكفيك سود الليال وبعدطول السهد
انه يقر العيون بشوف خلانها
شاعرالضياغم/شاطي مجول الخليل
يوصي ابنه ماجد يوم راح يدرس بالخارج الله يحفظه. يقرعينه به
👆🏻
وانا اعجبت بقصيدته وجاريته في هذه الابيات اقول
ياشاطي انته محيط الشعرقبل وبعد
لك تفتح المفردات الشرد بيبانها
اناشهد انك سحاب الشعر برق ورعد
تقود شرّد بيوت الشعر بارسانها
تسجدلك المفردات العوب عهدووعد
وتلبس لك اجمل ملابسها. وتيجانها
حلّق خيالك بحلو المفردات وصعد
وعوّد يقود القوافي قود بعنانها
يوم ان بعض المشاعر بس مر وتعد
انت البحر فيك تعصا السفن ربانها
الشعر بحرن به الغواص قام وقعد
وانت امتطيت البحور وفزت بسمانها
ورّدت دلوك لعدن مايضاهيه عد
هداج شيخ العدود ومروي اضعانها
ونهلت من منهله مالا يرام ويعد
لين ارتوت كل نفس وفاض ميزانها
خطفت قمة بنات الشعر شقراء جعد
عذرآ تغذي جدايلها بريحانها
الله يرد الغريب بكل خير وسعد
وايقر عين المحب بشوف خلانها
اخوك/مشعل عسام بن غافل التريباني الشمري في 24/12/1440هجري
العرض الشجري
