مدخل
تجاعيد الجفا لاحت على وجه الليال السمر
وبدت ريح الفراق تهز غصن اوراق تشريني
انا جيتك من اطراف الرحيل وفي ضلوعي مر
وبقايا من حطب ذكرى تشب ولاتدفيني
عمق
أفتش في جيوب الليل عن شمعة وحفنة نور
وادوّر في طريق الأمس عن لحظة من أيامي
مشيتك واكتشفت أن الطريق البارحه مكسور
مشيت الخوف والغام الظلام أتغازل أقدامي
حبيبي غصني اليابس فقد من لهفته عصفور
بنى عشه من أطيافك وربى فيه أحلامي
أنا لجلك جمعت الصمت في بطن الكلام شهور
نثرت ألآه في حلق الوجع وتنامت ألآمي
ولد طفل الأمل يائس كأنه أنولد مجبور
تربّى في وسط جرحي وعاش بضيعة أوهامي
يمر السيل من جنبه يسلّم يا " صباح البور "
يمر الغيم من فوقه يقول : أمسيت ياظامي !!!
على رف الغياب أسمك لقيته للوجع دستور
نفضته من غبار الذكريات وطاح قدامي
على كثر الهزايم والضحايا جيت لك منصور
على كثر الحطام اللي تناثر جيت بحطامي
وأنا أتضور ألم أنزف ندم واضمى فرح وسرور
تعبت أمشي تضاريس الحزن واجرجر أعظامي
حبيبي حطّـم ( أصنام الغياب ) وحرّر المأسور
وانا برجي اللقا ياتي وينسى جرحك الدامي
يبللني غيابك وانت لو ناشف لقا وحضور
تعال أشرب مطر عمري وجرّب جدول أحلامي
تعال أنفث تعاويذ المطر خل اليباس يغووور
دخيلك جمّع أطرافي مدامي فيك مترامي !!
مخرج
واطارد طيفك العابر على مد ارتحال الفكر
على صحراء من الذكرى ورى الحرمان تنفيني
واداعب باقي احلامن تعريها خيوط الفجر
عسى في غمرة احساس الحنين المر تطريني
لارواحكم النقيه
العرض الشجري
