ذولا الرجال..لشاعره حصه هلال( ريميه)

الشاعره ريميه





ذولا الرجال يقال حصن ٍ مناكير

ماهم بحال كروش هي والكحيله

إن اقبلوا خلّو حياتك نواويـر

وان ادبروا شاحوك من عند ذيله

دايم ضحاياهم بنـات المناعيـر

كم شيخة ٍ حطو عليها خبيلـه

زيزومهم لو هو يقود الطوابيـر

عند الغنج وام الغنج بِرد حيلـه

لو انه ابو زيد والا انـه الزيـر

لو خزته طفله غـدا واحليلـه

لا لامح المهره يـدوس المحاذيـر

ويروح عجه قاطب ٍ مع صهيله

وان جيتي بوجهه تجيك الاعاصير

ينسف على الراس المعاند شليله

راح الحصان وجعلها له مسافير

باكر يعوّد لـك تباريـه عيلـه

إما اشلعي وادعي بقلبه مسامير

والا اصبري صبر القلوب الهبيله

عَلك الرسن ما فاد قبلك غنادير

وكم بالعنان من الحراير ذليلـه

ممدي له القانون حدب ٍ مشاهير

ومع قوته يمـده بكـل خيلـه

فوضى وبالفوضى تضيع المعايير

ومن دنّع الغايه يهيـن الوسيلـه



http://www.youtube.com/watch?v=r5pR4...eature=related