(( لعبة مشــاعر))

الهوى لعبة مشاعر يفـوز بهـا الغبـي=والقصايد نـور تجريـد ترمـز للسـلام
ماتحلت مهرة الزيف من صقـل ذهبـي=ولاارتكب قلبي حماقـة مجانيـن الغـرام
أشعلت نيران غيضي وشبيـت غضبـي=انفجر صمام غيـض الرجولـة بالتمـام
مانزل برسالة الحـب مـن ربـي نبـي=ولاحكم باركان شرع الهوى شيخ وأمـام
لامتى هالغـي يانفـس توبـي وارهبـي=الحلال أعز واغنى من اسبـاب الحـرام
فية عاشق بجتهاد الهـوى دوب يحبـي=وفيه عاشق يطلق النور بعيـون الظـلام
وفيه عاشق يحسب الحب غزوات وسبي=وخاب ظنه وطاح حظ الهوى وطار الحمام
وفيه عاشق يذبح الذيب لعيـون الظبـي=وبعد مدة يطلب الثار من ظبـي العـدام
وفيه عاشق بين خـدلات ايامـه ربـي=مادرى عن قلب تلعب به ظنـون الهيـام
وفيه عاشق يبني أحـلام حب(ن)أجنبـي=وبالنهاية تكون من حظ غيـره ياحـرام
وكان مره في زمانك لقيـت اللـي تبـي=من بعدها قل على راحة البـال السـلام
أي حب(ن) غير حب الله وحـب النبـي=آخر المشوار محتوم بين كـره وخصـام