ديوان الشاعر الكبير / رعد الشلال

بعد عناء طويل إستطعت أن أجمع لكم الغالبيه من قصائد الشاعر الكبير : رعد الشلال الشمري



وأرجوا أن كان لدى أيا منكم قصيده لهذا الشاعر أن لا يذخرها










1: في الدفاع عن النبي(عليه الصلاة والسلام) قال :

صاروا يعرفوننا كل من يبي قمه
يثيرنا ويصبح أشهر نجم بدياره

تصور إنسان يجهل به رفيق أمه
شلناه حد السما بأصوات هداره

رسم ملامح خيال وحط له عمه
وتظاهر الشرق كله ينشر أخباره

أصبح فتى الغرب والشرهه على الأمه
كانت خشب مسرح وخيطين وستاره

هذه القصيده وقصيدتين أخر لشاعرنا القدير على هذا الرابط






2: آخر رمق

آخر رمق كان اللقي يلفظ نفس آخر
وكانت وسط منجم صغير وحارسه ظلعي

بعيونها الليل ومعه مسحة فجر ساحر
سال الضباب ودمعها الشمع استفز دمعي

ومثل الطفل جاني يتخطى صوته الخادر
يتعثر برجفة شفا وأحتضنه بسمعي

ولما يجيني طيفها من مواطن مهاجر
أستقبله بأحزان تشتيتي فرح جمعي



3: هيكل

هيكل يبي عالم تضاريس مختص
يوصف مدرج خصرها للمنصــه

متغطرسه لو قصر الوصف تغتص
بأهدابها لسان القصيده تقصه

متقسمه كل شي خارج عن النص
جارت على فستان ملزم بنصه

الكعب يوم الخصر من كتفها إرتص
الردف رص الساق والساق رصه

مشي المهار إيقاع وإنعثرت وغص
تك تك تك تتك تتك طــــار نــــصــه

الساق الأيسر زل تكتص.. تكتص..
تعرج وصدر القافيه فيه غصه

أمزح معا حمدي على إيه بتبص
يقول وأنت تبص.. قلت ايه بصه

بس طولت ياصبي عيني وأقول اص
يفتح غطى الجفنين ويقول أوصه



4: قصر البحر (في رثاء الشيخ زايد رحمه الله)

لا هنت ياقصر البحر ليه منكود
لك في سما ربك قصور وسكينه

لأن بابك عمر ماكان مسدود
مفتوح باب الله بينك وبينه

من قال غاب الشيخ؟ والشيخ موجود!
بأرض البطين اللي بصدره دفينه

أثر قدم زايد على الرمل مشهود
تياسري ياريح لا تمسحينه

وجهه على سطح البحر خير ممدود
تيامني عن صورته ياسفينه

النخل مد جذوره بشوق منضود
تحت الشوارع وإتجه للمدينه

للمسجد اللي به غفا زايد الجود
حذآآآآر ياجذور النخل تجرحينه





5: ردا على أكثر من نص سمعه لأبن الذيب قال :

سلام حام وسام وسلام وسلوم
موصول للدوله إماره إماره

على العواصم كل حاكم ومحكوم
وعلى الصدور الواسعه والصداره

ما دام ولد آوى عوى عطّل الصوم
سمّو على ملح اللحا والطهاره

حدر اول السطر ارسم السهم مسموم
عكس السهام ارسم صدور ومراره

زخرف أقواس البسمله بإسم قيوم
تحيه..أما بعد ..نقطه..إشاره

سلام واللي غرّه إبليس مسلوم
سلسلت له حربٍ على قد ناره

دف..دف..ددم..دمّامها دق ياقروم
طبل المسامع دق عظمه بطاره

لا صار فتل أشناب ومطاحن خشوم
تعطس ورا الحدبآ دبار السعاره

تبري بحبر وقمقم الحبر مختوم
والجن الأزرق مرتكي بالمغاره

يضرب غطاها لا أصبح الجو ملغوم
ويضغط على جسمه بخار الحراره

وأقرا عليه الراجفه وسورة الروم
تحصين لا ترجف زوايا جداره

أسكّنه وأسد عن كل زيزوم
من جن نجد لجن مسقط لواره

بالجن ما إحتجت لسكرتير مخزوم
يكتب لي وتبري ثقيلٍ عِياره

جن الجليد اللي ورا القطب مزكوم
إذا يبون اكتبلهم في غزاره

ياراكبٍ جهمٍ من الجن محكوم
طيارة الميق إقصرت عن مطاره

تركبه أو يركبك مع قومته قوم
لا تجنح لعرش اليمن والحضاره

عرّج على ابن الذيب وأرجدله علوم
نبغىآ مدارات الخشوم اتّشاره

قلّه محيط الشعر حيتانه تحوم
من نجد جيعانه لسابع إماره

تبلعك يالمرحوم تجدفك مهضوم
ويونس نبيٍ فك ربه حصاره

من راية الضلّيل إمرؤ إلى اليوم
جِل شِل حِل اسأل هل غسل فم باره

جِل طِف شِف احذِف ضِف صِفعزرس رز روم
لو مركز الهز بـ فمي دق زاره

فرجاري أفحج وأطلس الشعر ملموم
أقص نصف الخارطه بإستداره

لو معك جن الشرق ترطن له الروم
والترجمه في واد عبقر مثاره

والشايب اللي بسبع جمرات مرجوم
يردح بـ بطنك مثل ردح العْماره

تبقى رقم في سبحة الشعر ملظوم
دون الآحاد وفوق خط الصْفاره

جبت الفقار بنكهة الكرش مطعوم
وأثّر على المعلاق كيس المراره

وإذا كبر عن عض الاصباع مفطوم
يحك جلد الخشم يقشط أعذاره

يوم أتنحنح مدفعٍ بالع هموم
وسّعت صدرٍ ما تسعه الصداره

يلوذ قلب وكبد في ضلع مقصوم
وتصير ثلثين المراجل جساره

تزبن على الله تنفض إثيابها حزوم
وخشوم ينفض شَعَر غاره غباره

شبك الحمام بظهرها وكوّر الحوم
لا ضمّها الشاهين يثقل طْياره

طِر ضِم شبكٍ كوّر وكفت يسوم
نساه نسوٍ فك أذى رعش طاره

وإذا سأل عنّي قعيدٍ من النوم
بصبي عينه لقف كبر وقضاره

منه البليّ اللي من التسع منجوم
حوّل على البيدا مضيّع مداره

قولوا أبد يوم السما زحمة غيوم
تصادمت شحنات ربح وخساره

يقدح بكهرب برقها بجو محموم
صوتٍ يسبّح ويتهدم جساره

والله ياإبن الذيب ما نهجنا توم
متخالفين من السما للحجاره

قاعد وحظي واقف يعلق نجوم
عيني تنام وفي ظميري خفاره

لوا أهه زلزلت لك رد مردوم
يكسر يدين مدبرين الجباره

حنا الكبار نعلم صغارنا علوم
نصبر على اللي مايوقر كباره

أذا كبر يفهم وإذا يفهم يصوم
وإن صام صلى وكان صلى طهاره

سلاآآم لأهل الشعر خلفته سلوم
وأخصص لشبه الجزيره بهاره
http://www.youtube.com/view_play_lis...&v=JxLRkp1I2Gg



6: السواري في الشيخ زايد (رحمه الله) وأبنائه خليفه ومحمد (حفظهم الله)

كتفي لكفي بفضل زايد نسج كُم
وزندي يرف من الجمايل شحمها

وتكلمت في ساعدي لهجة الدم
من طيب أبوك بعظمها وبلحمها

وزَلزَلت وزنٍ زحزح القافيه ثم
تجاذبوا قطب القصيده وقلمها

مثل القنابل صم لكن لها فم
سلك الأمان عن التكلم لجمها

أجهَدْت صمّام الأمان وشكا الصم
للفجر تدوي والقلم من خدمها

كهربت موجة صوتها وملحها شم
قدح الشرار وثقل كفي صدمها

حرّكتَها لجل الجبل والجبل شم
ظللتها وريش المحابر رسمها

وحدّيتها لزايد على ساحل اليم
بشراع لو سد العواصف قسمها

شيخٍ تكفّل في ذمم مالها ذْمَم
لين إنتهض قصر البحر وإستلمها

كم كم صفا .. كم كم رفا .. كم عفا كم
كم كبد يسحب قيحها من ورمها

كم فعل منصوب رفعه شيخنا ضم
وفتحات الأفعال الأواخر جزمها

فضله زحف غيّم لـ وادي جبل رم
لين إشتكا الوادي وجِبَله إلتزمها

خليفه بظله سرج خيله الدهم
تشكي الغبار غبار خيله لثمها

زايد أبوه ولجل الأسياد يهتم
لين الخشوم السمر يسخن نسمها

سدٍ وقف للسيل جهم صدم جهم
تشبه له أطول ساريه في علمها

جرجل أطل .. حن هل نهل .. ظل كماألتم
سمّى على السود الصعاب وهزمها

لا قال كلمه بشت ابو خالد ألتم
سم .. تم .. نعم .. لبّاه اخوه ولزمها

قمرآ يا أبو سلطان ما لوّح الوسم
كثر الرقاب اللي يمينك وسمها

واجنح بها ياحادي الموج باليم
سفنٍ تلاطم موجها ما لطمها

عرّج بها لشيخ السرايا الذي لم
صدره شظايا المرجله وإلتحمها

سلم على محمد له الحمد منضم
للقمتين الثالثه من قممها

ابن الضوارم .. والمكارم .. شمخ زم
طيار .. مهرة نار .. يسرج حممها

مهره من المعدن ورا الغيم تشتم
ريحة عرق حرق العصب في دسمها

ثار انفجار الصوت بالعاليه ردم
وأبوه قبله كل عليا ردمها

تحشم شوارب في ظلاله عن الذم
وتشمخ مدارات الخشوم بشممها

ناديت أبو خالد يا أبو خالد أعتم
صدر القصيده وفاض موجٍ كتمها

رم ضم وصل .. دم ضم وهل .. حلو وزل غم
ياموج ياروج الرجا في أثمها

هنّتك خيلٍ رمّت دروبها رم
طال السبيب ولوحت به نغمها

حتى الطبل هنّا .. دم .. طق .. طق .. دم
وخشخش خرز خلخال غيدا بقدمها

هنّاك زايد فخرك بكفه ألجم
كف صدمت موج المحيط بكرمها

زايد اصابع لقمته قبل تلتم
بينه وبين الشرق الأوسط قسمها

أقسم بمن أكمل لنا دينه وتم
ما مثل زايد في عربها وعجمها

فخرك أبو سلطان أخوك الذي عم
فضل أيمنه ضمضم تيمم شيمها

وأنت بظهر زايد تقاسمتوا الدم
ومدت لأخوك من الكنانه سهمها

أيئم أشم .. أغيم ركن .. جلمدن صم
ألجم متن من ليلها في ضلمها

حتى القلم بأفضالكم جوفه إحتم
لامن رِضع رَضع المحابر فطمها

قمرا لكم ياشيوخنا رماحنا الشم
يامقضب سيوف الحروب وسطمها

تم السلام وظل الأبيات ما تم
حشمه وقف زحف المداد وختمها







7: إفضحي

افضحي حبك وخطي وإشطبــــــي
وإكتبيني ســطر وإقــريني كتــــاب

أروع أنــواع الفضيحـــه بـمذهبــي
لو فضح سر المطر قلب السحــــاب

كوني طفله مــدلــلــه باللي تبــي
والطفل يهوىآ يتعبث بالخــــراب

شــقــي أوراق القصيده وإسكـبــي
حـبرها وإتعلمــي رفــض الجــواب

وإن منعــتك عانــــديني وإلــعبــي
وإنــثري حــبر القلم فــوق الثــياب

وصفقي لنصر الطفوله وشاغبــي
وإكسري ثم أجبــري عقل الشبــاب

وإبــــعــدي كل البنــات وقــــربــي
وإعلني حرب الغزل فوق الهضاب

وإنثري شعرك وصلي ع النبــــــي
وإفخري باللــيل الحرير وقلب ذاب

وذكــريني شمس ترفــض تختبــي
وللغروب يحــدها شــرق الــعــذاب

وطــــرزتها للخــــــــليج اليعربــــي
فوق صدر البحر لحظــــات الغيــاب



8: ماشالني

ما شالني عقب القلم كف شيال
عقب القلم ثلثين الأصحاب تمثيل

بيدي قلم يوم أنتخي ينسل جبال
وقفة قلم عندي بمواقف رجاجيل

بمهرة حروفي دجلت الأسماع رحال
أعتز بخيولي وتعتز بي حيل

سعدون كل الحس وقفلك إجلال
وتنافرت خيلي كرامه وتجيل

ياعزوتي لعيون لباسة الشال
مهما جمحت خيلك لروضلك الخيل

وجيتك قبيله شدها صوت خيال
لاظل يغربها ولاترقد الليل

أخوك مايقصر عن الوعد لوطال
لكن ترى المنجل تخونه محاصيل



9: رده على قصيده للأمير خالد الفيصل منها هذا البيت

((حنا العرب يامدعين العروبه....حنا هل التاريخ وانتم له اغراب))

قال :

الله ياشيخ تعثر بثوبه
بلاه ذيب وهو بلا مننا ذياب

الله واحتطنا للأشعار نوبه
وحقك تحسب للحكي مية حساب

سهله من الطيب تفوت بصعوبه
وصعبات بعض رجال ماتحسب صعاب

يا إبن الكرم غلطه عليك محسوبه
يومك تغربنا وماكلنا أغراب

يا إبن الكرم بعض الحروف مغلوبه
وبعض الحروف الصادقه تكسر أحراب

العدل بسمان القصايد عذوبه
والعين وش قيمة حورها بالأهداب

من هاب ينهاب وللأشراف حوبه
ولاهنت قولك يابن الأجواد ماصاب

منا ولنا وفينا وعلينا العروبه
ياجزل قول صابت العين وانصاب

والفخر بالتاريخ عزه كذوبه
وأرقابنا والقدس بكفوف الأجناب

تاريخنا ياشيخ حنا عيوبه
وأمجادنا رمحين قضابهن خاب

رمح طعن مسلم جرح فيه ثوبه
ورمح طعن ظهراننا وسالت أنساب

وفيه الزمان اللي وطتنا دروبه
تحمى الغنم من سطوت الذيب بكلاب

والريح نحرم بعضنا من هبوبه
فيه الزمن لوكان للريح مقضاب

أما الرتب والنفط تربه خصوبه
تنبت مهازل بإختلافات الأسباب

مدري العروبه ظهر ربعي غدروبه
والا العروبه رمح بظهورنا غاب

وقصيدتي طاهرلك الله ثوبه
والصوت داوي ولامع الصوت مخلاب





10: مهىآ

طحت إسنديني يا مها حيل تعبان
صعبه مها طيحة طويلين الأشبار




مها ..مها ، جسمي رجف حيل بردان
وبعض الرجال عيونهم يا مها نار



لعنت حاجه قررت ظلم الأخوان
صدق هالزمن يا طيبة الأصل دوار



نفسي عزيز إخت ربعي هلالشام
حرّه عفيف تشتكي ظلم الأحرار



ما قصّ قلبي ظلم بخسين الأثمان
بس يا مها ظلم الحلاحيل جبار



الله بس لو لي حدر جفنك أوطان
أدفا بها وأحتاجها مرار ومرار



أدري عيونك ودها تكون أحضان
لو كنت ملح أخفى بها كني أسرار



عينك خذتني يا مها لوقت ما هان
أقفا وكل نابه مع أحلام الأصغار



نلعب مثل لعب العصافير بأغصان
ونضحك مثل ضحك السنابل للأمطار



يسارنا يمشن عريضات شلان
كلامهن همس وقصيرات مشوار



ويميننا عصم الشوارب وفنجان
بظلال بيت به عفيفين الأنظار



الله على ممشى طويلات الأردان
حمر الهباري بيض الأعراض والكار



والله على مجلس حدر ضو نعسان
فانوس معلق على راس مسمار



وأشوف بعيونك صحاري وريضان
أسرح بها راعي بقطعان الأفكار



بس إغمضي جفن خذاني لمكان
بطراف عينك يا مها للبدو دار






11: بنت إلهامي:

للإستماع :
http://www.alsh3r.com/download.php?m...listen&id=5857

للتحميل :
http://www.alsh3r.com/download.php?m...wnload&id=5857




12: ياطراد:

للإستماع :
http://www.alsh3r.com/download.php?m...listen&id=5856

للتحميل :
http://www.alsh3r.com/download.php?m...wnload&id=5856




جمع وإعداد : (فاصل)





}}} إن أخطئت فمن نفسي والشيطان وإن أصبت فمن الله {{{