إليكم أخر ماخط قلمي
أحلا الهدايا ياحبيبي هداياك=وأنته معي بالحب كل الهدايا
أهديتني وأحرجتني صدق وياك=وأخجلتني ما بين كل البرايا
وأنا بعد بهديك وأسعى لمرضاك=وأكتب لك أحلا الشعر وأثبت وفايا
ياروح روحي جيت كلي فداياك=يا مالك ٍ بالحب كل المزايا
يامملكة بالورد والورد يزهاك=ياقاهره بالزين حتى المرايا
كل النساء تعجز تسوي سواياك=أحرجتهم ياتاج كل الصبايا
ملكتني مابين ذولا وذولاك=حتى طبعت اسمك بوسط الخلايا
ياعل يفدونك نفوس ٍ تحداك=تبغى مواصيلك وسوت سوايا
والقلب عاف الكل بس أنت يبغاك=يامالك ٍ بالروح كل الزوايا
وحدك بوسط القلب ساكن ٍ ومحلاك=وحدك ملكة اليوم كل الحنايا
اسقيتني عذب الحكي من شفاياك=اتعبتني في همس ذيك الشفايا
انت الأريج وكل وردي تمناك= أنت الشروق ونور نوّر مسايا
ورد وعطر يازين ما احلا عطاياك=وأنا قصيد أعطيك واقبل عطايا
يالله عساها ماهي أخر هداياك=ياللي وجودك في حياتي هدايا
محمد الفريدي