|
بعض ماقيل بالملك فهد(رحمه الله)
بعض ماقيل عن فقيدنا فقيد الامه الاسلاميه الملك فهد(رحمه الله):
عساك في الفردوس
ليلي سواد وصبحي أسود من ليل
لا عدت بالاثنين بأيام الاسبوع
يا عين ما يكفيك دمعي هماليل
والله ما عزتني آهات ودموع
ما عاد فيني ياهلي للصبر حيل
من راح أبو فيصل غدا القلب مفجوع
عساك في الفردوس يا قايد الجيل
بأعلى المراتب يابو الخير مرفوع
رفعت دين الله عن الزيف والميل
يا سيدي ندعي لك سجود وركوع
والله ما جيت اكتب الشعر تمثيل
لكن غلاك بداخل القلب مطبوع
مصابنا اكبر من القال والقيل
غاب الفهد والفعل مرئي ومسموع
مها الشمري
ـــــــــــــــــــــــــــــــــــــــــــــــ
فهد رحل عنا
قالوا توفى في ضحى يوم الاثنين
ودموعنا من قلب طاحت سريعه
فهد رحل عنا وحنا حزينين
فجيعه يا كبرها من فجيعه
هذا قدر ربي وحنا مطيعين
نرضى بحكم الله ودايم نطيعه
بس الحزن بالقلب والدمع بالعين
وده يعبر عن غلاه ويذيعه
للي حكم شعبه على العز والزين
ونفسه على الطولات دايم رفيعه
ماهو من اللي يقلبون الموازين
اللي حكم شعبه بكذب وخديعه
فهد حكم شعبه على الشرع والدين
على كتاب الله وسنه وبيعه
عساه للجنة وخضر البساتين
والمصطفى يوم القيامه شفيعه
وانته يا بومتعب عسى ايامك سنين
الدار في يدك الامينه وديعه
وسلطان أبو خالد كعام المعادين
جوده سحاب ما تغير ربيعه
تركي المريخي
ــــــــــــــــــــــــــــــــــــــــــــــــــ ـــــــــــ
من المحيط توحّد الحزن للشام
للتأكيد أن فقد خادم الحرمين الشريفين الملك فهد بن عبدالعزيز - طيب الله ثراه- لم يكن خسارة للشعب السعودي فقط بل كان خسارة للأمتين العربية والإسلامية يقول شاعر الشام: أسعد الروابة
من المحيط توحّد الحزن للشام
وبغداد تبكي رغم طاحونة البين
ويقول:
كل الأمم تبكيك يادرع الإسلام
حتى الحجر يبكي عليك بفلسطين
تصوير شعري حزين شاركنا به شاعر الشام من خلال هذه المقطوعة المعبرة:
مَرْ الاثنين امرّْ من كل الايام
ليت الأحد وقف دهر قبل الاثنين
من المحيط توحّد الحزن للشام
وبغداد تبكي رغم طاحونة البين
نعوذ بالله من كوابيس الأحلام
كم قلب هزْته الفجيعه وكم عين
كل الأمم تبكيك يا درع الإسلام
حتى الحجر يبكي عليك بفلسطين
حكمت بين الناس عدلٍ بالاحكام
حتى تساوت هالبشر في الموازين
مرحوم قالو هالبشر يابو الايتام
ويجعل مكانك جنة الخلد. آمين
أسعد إبراهيم الروابة- سورية
ــــــــــــــــــــــــــــــــــــــــــــــــــ ــــ
يا كبر فرقاه
الا يا الله تجبر للشعوب المسلمه بلواه
بكل أوطانها رحماك من أقصاها لدانيها
دهى الحاكم دهى الامة مصاب والكبود أدماه
واخص بلادنا اللي هزّها فقده لغاليها
على فهد العروبة آه واويلاه واويلاه
الا ياليت روحه تنفدي بالروح لافديها
لابيع النفس وأرخصها يمينٍ صادقٍ لافداه
حرام اني على الموت الحمر والله لارميها
لابيعه بيع مرخص والعوض عند الولي نلقاه
اقوله والرجاء باللي بحالي عالم فيها
لابو فيصل تهون الروح لو بعناه وارخصناه
احسّ النار في جوفي كلاني حرّ صاليها
وزاد الهم هم وجضّ قلبي وانهدم مبناه
سحاب الحزن خيم والضماير بان خافيها
ساعة شفت الجموع وشفت عبدالله على يمناه
عضيده نايبه سلطان جعل الله يخليها
نعزّيهم يعزّونا فقيدٍ ياكبر فرقاه
وكل دمع عينه جرّح الخدين كاسيها
الا يالله هونها علينا يا عظيم الجاه
إلهي ضاقت الدنيا عليك الحال نشكيها
تكدر خاطري حاربت حلو النوم واعزاه
ورجلي وان بغيت امشي مسمرة مواطيها
فقيد الدين والامة الا يا صعب ما ننساه
ولو نكتب ولو نقصد حقوقه ما نوفيها
الا يارب يا رحمان تجعل جنتك مثواه
وقبره روضة منها ونور القبر غاشيها
معزّ الدين لو ندعي نهار وليل ما نجزاه
قضى عمره مناضل دعوة التوحيد معليها
عسى من لامنا في حب قايدنا تشل اعضاه
وبيده يطرف عيونه كلا الثنتين يعميها
عزانا والبقى باللي تقلد منصب يزهاه
أبو متعب ملكنا خادم البيتين راعيها
سياسيٍ حكيمٍ ثابتٍ ممشى الفهد ممشاه
إليا شطت بعون الله عبدالله يرسيها
وأبو خالد ولي العهد الا يا ويل من عاداه
زعيمٍ لا سطى يشفيك سور الدار حاميها
هل العوجا حماة الدين الا يا سعد من ينصاه
خذوها فوق سرد الخيل شرع الله مباديها
قيادتنا حكومتنا عسى ربي يذل اعداه
نصادق من يصادقهم نعادي من يعاديها
وصلّى الله على المبعوث رحمه لأمته مهداه
محمد صفوة المخلوق من أولها لتاليها
فهد بن عبدالعزيز الرميان
ـــــــــــــــــــــــــــــــــــــــــــــــــ
شيخ العروبة والإسلام
اهتز عرش القلب والجفن ما نام
لا والله إلا راح ذرب الفعالي
مرحوم يا شيخ العروبة والإسلام
مليكنا الغالي كريم السبالي
فهد العرب للمملكة درع وحزام
تشهد له أفعاله نهار القتالي
فهد السياسة والقيادة والإعلام
ترفع له البيضا بروس الطوالي
يشهد له التاريخ عامٍ ورا عام
وقفات أبو فيصل تهز الجبالي
شجاع ومحنك وقايد وضرغام
تشهد بفزعاته قروم الرجالي
الصيرمي حارس وفارس ومقدام
له هيبةٍ والرد جاهز وحالي
بلسم كبودٍ للفقارا والايتام
يعطي وينفق والعطايا جزالي
اسمه كبير وباقيٍ طول الأيام
والله ما ننساه في كل حالي
مرحوم يا فهد العروبة والإسلام
عساه بالجنة كريم السبالي
جعفر بن هادي بن شري
ــــــــــــــــــــــــــــــــــــــــــــــــــ ـ
فقيد غالي
ارحم فهد يا خيرة الراحميني
وعامله في لطفك وعفوك وحسناك
وتجعل مقره جنة الصالحيني
بظلال عرشك منحةٍ من عطاياك
فقيد غالي نذكره كل حيني
وشلون يا فهد الوفا كيف ننساك
وشلون وانت الجود خطل اليميني
غمرت شعبٍ ما عرف كيف ينعاك
والله أنا ما لوم قلبٍ حزيني
واللي يهل الدمع من حر فرقاك
يبكيك عود طاويته السنيني
احسنت له واسبلت يمه هداياك
ويبكيك طفلٍ ميت الوالديني
ذاق العنا لولا الولي ثم لولاك
يبكيك محروم قليل اليديني
شملته بعطفك وهذي سجاياك
يبكيك مرضانٍ يجر الونيني
على يديك اشفاه ربي من شفاك
يبكيك بيت الله مع الزايريني
تبكيك طيبة والمشاعر تمناك
يبكيك ذكر الحق والذاكريني
يبكيك منهو بالمواقف تنصاك
يبكيك كل الشعب والمسلميني
يبكيك حتى الدمع لا حل طرياك
والله لو اتبع لوعةٍ في كنيني
كان الحزن منعني اليوم لارثاك
ولو الاماني ترجع الغايبيني
لاشوف كل الناس قامت ترجاك
عسى العوض بالليث شبل العريني
اللي على نهجك وممشاه ممشاك
عبدالله الوافي ذرى الزابنيني
الحازم العازم للانشاب فكاك
قدنا يابو متعب لك مبايعيني
آمر وتلقا أرواحنا من فداياك
نطيع لك بالعسر والا بليني
ولا نمشي الا وفق غايتك ورضاك
ونقول حنا بالولا مخلصيني
ويا اغلى وطن ما احدٍ يقرب من حماك
سلامة عواد الضوي العنزي
ــــــــــــــــــــــــــــــــــــــــــــــــــ ــــ
فهد العرب
يا كبر هول الفاجعة يوم الاثنين
اشد واكبر من جميع الهوايل
حين ارتحل نور الوطن خادم الدين
فهد العرب واقفا عن الدار شايل
للحزن ثارت في وطنا براكين
واجتاح في ركبه شعوب وقبايل
وشلون ما تحزن عليه الملايين
هذا الفهد عدله عدل كل مايل
حكمه بشرع الدين سن القوانين
ما سن عن حكم الشريعة بدايل
شيخٍ بنى مجده بكل الميادين
لو غاب شخصه ما تزيله زوايل
نهضة وطن.. بنيان طرق وبساتين
والعلم والتعليم فاق المثايل
تاريخ عهده ثابتٍ بالبراهين
عشرين واربع من سنينه دلايل
عهد الرخا والعطف واللطف واللين
عهدٍ تميز به حميد الخصايل
عهد العطا عاشو بخيره كثيرين
يعطي هنا واهناك يعطي جزايل
بالدعم تشهد له قضية فلسطين
وبالبوسنا وفغان شعب وفصايل
ويشهد كويت العز يوم اللقا الشين
كيف اثمرت وقفة عريب السلايل
حطم جيوش الظلم واقفوا معيفين
عن دار جاره وانكسر كل عايل
ويشهد بلد لبنان حينٍ بعد حين
عقب التفرق كيف لم الشمايل
هذا بعض ما قدمه للمسلمين
عساه للجنة حميد الخصايل
آمين قولوها معي قولوا آمين
عسى ابو فيصل ما يشوف الهوايل
خلف الأسيد الشراري
|
العضو الأكثر نشاطاً هذا اليوم 
العرض الشجري
