ثمان ظوهر خطيرررة ( سلوكيات خاطئة )
مساء الخير للجميع
بصراحه لفت نظري بعض السلوكيات الخاطئة والتي كثيراً ما نجدها تتكاثر وتنمو في مجتمعاتنا وخاصة المجتمع السعودي .. والتي أتمنى أن نناقشها بوضوح حتى يتسنى لنا معالجتها وإيجاد بعض الحلول المقترحة لبعض هذه السلوكيات ..
1- عدم احترام خصوصيات الآخرين
مثلاً ودايم تصير لي عند صرافة الراجحي واحد وأنت تسحب يبقى لازق لك وراك !!! مدري وش يبي ضاقت الدنيا ألا يصير وراك في نفس الغرفة ويطالع لشاشة الصرافة!
2- الواسطة
هذا الخطر الذي يندرج تحت مسميات كثيره منها ( الفزعه و النخوه و الحميا او الحمية ووو..الخ من المسميات التي لا حصر لها )
بصراحه ياناس الواسطة مررررررررض يصعب إجتثاثه ورغم أنها تفيد الكثيرين إلا أن ضررها أكبر بكثيرررر مما نتصور .
3- المعسل ( الشيشة )
بصراحه المعسل خطيرررررر وانتشر بشكل سريع ... يمكن البعض ما يقدر خطورته بس أثبتت تقارير طبية أن راس معسل يعادل يمكن كرز دخان ... وبعدين ياليته أنتشر بس بين الشباب لا حتى البنوتات صايرين يشيشون
تصدقون أن أستراحتي اللي بحائل اللي يعسلون فيها تقريباً (90% ) من الموجودين
ياساااااااااااااااااااااااااااااااااااااتر
4- ظاهرة ( البصبصه ) او التلفت عند الاشارات المرورية
دائماً إذا كنت عند أشاره وفيه بنات مع سواق الا والشباب شوي والا يركبون معاهم .. مدري ليش
الظاهره هذي بعدين اللي يطول على صوت المسجل والا يسوي حركات عشان يلفت انتباه البنت واللي واللي وفيه سوالف تصير بالرياض وربي استحي اني اقولها..
5- ظاهرة الكتابة على الجدران
بصراحه هذي الظاهرة بدأت تقل وتندثر ولله الحمد.... بس للحين فيه بقايا يعني فيه بعض القديمين ( الحويلين ) للحين يكتبون
6- ظاهرة التفحيط والتدخين في رمضان
ماشدني كثيراً لكتابة هذا الموضوع مايحدث من سلوكيات خطيرة أنتشرت في الآونة الأخيرة وهي التفحيط وما يلازمه من أطلاق نار ( غير أبهين بمن حولهم وغير مبالين وغير خائفين من أمن ) وكذلك التدخين ( وطبعاً مايجعلني أحزن أكثر ) أن هذا التدخين وغيره من السلوكيات الملازمه له يكون بعد صلاة الفجر وفي رمضان بالتحديد وفي الرياض...
أين الخوف من الله ؟
أين الحياء من الناس ؟
أين الخوف من الأمن ؟
أين الرقيب .؟ أين الأمن ؟؟ المشكله لو الأمن يضربون في يد من حديد لما كان هذا .
أين رجال الهيئة ؟
والله مناظر محزنه ......... ليتكم تشوفون كان والله لا تنقهرون من قلب
7- ظاهرة الحش
بصراحه تضايقني هالسالفه واجد ... كل ما أجي مجلس الأ مستلمين لهم مسلم .؟؟ مدري ليش ؟ الله يكون بالعون
8- ظاهرة الفضائيات
ياكثر المتابعين للفضائيات وخاصة للكليبات ( الماجنة ) والتي تربي نشئنا على غير مانتمنى ؟
وخاصة هاليومين طالع برنامج ( ستار أكاديمي 2 ) عساهم للبلى ...
ياناس هذا كله غزوا فكري ... يقول أحد المفكرين الغرب ( مستشرق ) إن أردت أن تغزوا قوما فدخل على دينهم ... وهم جالسين يضيعون ديننا الله يضيعهم ..
والظواهر واجد ( بس أنا بختصر لكم اليوم الموضوع هذا ) ونكمل الظواهر في الايام القادمة بإذن الله .
طلب ورجاء
ابي منكم مشاركة فعالة في كل ظاهرة ... يعني نبي حلول نبي مشاراكات إيجابية الله يخليكم
أخوكم الصغير
الفرنسي
|