كيف نكسب حسنات بأسهل الطرق

بسم الله الرحمن الرحيم



موضوعي خفيف آوي << تلمح يعني لا تعيجزون تقرونه

المهم بما ان رمضان شرف والحمد لله..فأكيد الحسنات تضاعف في هالشهر

واذا قلنا تضاعف اغلب الناس يضاعفون الصلاة و قراءة القرآن والذكر

طيب قرينا قرآن صلينا التراويح وتسننا وش بعد نسوي !!؟؟

لو نفكر بنكون اهملنا اشياءكثييييييره سهله مره وما تحتاج شي

وممكن تسوينها في اوقات الراحه حتى

فيه شي يغفل عنه الكثير منا

اللي هو ((احتساب الأجر ))

يعني ايش احتساب الاجر !!

يعني // كل عمل نقوم فيه نجعله خالص لوجه الله ونرغب من الله انه يرزقنا لاجله الثواب والاجر ..

"يلزم النيه في "القلب" دايم مب تقولين اللهم اني احتسب الاجر في كل شي اسويه لهالشهر اوهالاسبوع او هاليوم"
الله يرفع درجاتنا جميعاً

يعني لو نعيش يومنا كله وحنا نحتسب الاجر في كل عمل لنا

كان ان شاء الله صارت حسناتنا جبال ..

بتقولون وش نحتسب الاجر عليه مثلا !!

بحاول اختصر الموضوع علشان ما تزهقون وانتم تقرون

مثلا ,, بما انه رمضان يعني اكيد أكل ونص وقتك بالمطبخ

وانتي تطبخين لاهلك احتسبي الاجر

على الساعه 10 _11 ولدك ,, اخوك ,, اختك الصغيره او الكبيره

اشتهت شي قومي جيبي لها و احتسبي الاجر

ارسلي لجارتك والا مع زوجك لاصدقاءه او للعمال بعض الاكل اللي انتي مسويته واحتسبي الاجر

فتات الخبز طلعيه في الحديقه والا على الشباك "للعصافير"واحتسبي الاجر انك اطعمتي كبد رطبه


المطبخ مكوووووووووم مواعين >> ساعدي شغالتك و احتسبي الاجر << ولا تنسين انها بتفرح وتقدرك زود

ولدك صاح وانتي بعز نومك .. وانتي قايمه تسوين له رضعته احتسبي الاجر

ابوك ,,اخوك,, زوجك >> سيارته وصخه ومغبره ,,, اغسليها و احتسبي الاجر

ارسلي مسج لوحده ما كلمتيها من زمان " ولو انك مالك خلقها والا العلاقه مب ذاك الزود" و احتسبي الاجر

انقلي موضوع مفيد من منتدى والا ارسلي دعاء ,, والا ذكري بسنّه او حديث للمضافين بالايميل عندك و احتسبي الاجر

انتي تعباااااااااانه ومقصره بعد يوم كرف ,,لقيتي مويه منكبه ,,قراطيس على الارض ,, بدال ما تنادين الشغاله تنظف ,,نظفي على طريقك و احتسبي الاجر

ودي معك للمسجد مويه او مناديل << لو كرتون "بيستفيدون منه اللي جنبك على اقل تقدير" و احتسبي الاجر

امك او ابوك راجعين من التراويح رجولهم ما تشيلهم .. دلكيها و احتسبي الاجر

رحتي بيت اهلك والا صديقتك والا خالتك خذي معك طبخه و احتسبي الاجر

لا تطالعين التلفزيون ذاك اليوم " وان شاء الله كل يوم " و احتسبي الاجر
"مب تقولين يوه مشغوله ما يمديني على المسلسل يالله خل احتسب الاجر"

صديقتك مسويه طبخه .. بالنسبه لك "عاديه" .. وش يمنع امدحها واخليها تفرح !!


كلها كلمتين تخليها تبتسم وتنبسط ... [ما شاء الله طبختك لذيذه] ,, و احتسبي الاجر

قمتي الصبح ودوام وحوووووووووسه ... لا تتأففين .. ابتسمي وتذكري انك بتحتسبين الاجر

شفتي في طريقك عامل نظافه ..عطيه المقسوم و احتسبي الاجر

طفل صغير يبيع مناديل ,, مويه << اشتري منه حتى لو نفسك ما تقبل ... خليه يحس بقيمته و احتسبي الاجر

لمبات الحوش كلها مولعه وانتم بتنامون .. روحي طفيها لان اذا طفيتيها بتقل الفاتوره عن اللي بيسدد و احتسبي الاجر

خلي عيالك او اخوانك الصغار مره يسوون معك طبخه .. وشوفي فرحتهم وهم متحمسين و احتسبي الاجر



اخوك الشباب مجمع الشله سوي لهم شاهي ورتبي لهم حركات فطاير او شي ينوكل و احتسبي الاجر

اختك بتطلع وكل شي تكركب على راسها << ساعديها بكوي ملابسها مثلاً او لبسي عيالها و احتسبي الاجر

ابتسمي في وجه شغالتكم والا قولي لها انتي كويس و احتسبي الاجر

رحتي السوق مضطره .. وانتي تتفرجين على الملابس الا بلوزه طايحه علقيها مكانها و احتسبي الاجر


شفتي اكل طايح بالارض شيلي النعمه و احتسبي الاجر << بعض الناس يتقرفون يشيلون الاكل اللي بالاماكن العامه.. شيلي بمديل والا عادي غسلي حتى لو الحمام بعيد .. وتذكري انك تحتسبين الاجر

سامحي شخص غلط عليك والا ظلمك و احتسبي الاجر

*********


اللي حابه اقوله فيه مواقف كثيره بحياتنا .. ممكن يجينا منها حسنات .. في السنه عامه وفي رمضان خاصه علشان الحسنات تضاعف


و اللي عليها العذر بتقول لا صلاة ولا قرآن وشلون اكسب حسنات !!

اولا اذا احتسبتي اجر صيامك وصلاتك وقرآتك للقرآن واعتدتي على الاحتساب في الايام العاديه.. ينكتب لك في ايام العذر اجرها
قال صلى الله عليه وسلم: "إذا مرض العبد أو سافر كتب له ما كان يعمل صحيحا مقيما"[16].

و الحمد لله كل شي نسويه فيه خير ,, يجينا عليه اجر .. احتسبي الاجر في كل الامور الثانيه اللي ذكرتها واللي غفلت عنها ..

وعلشان تحسين بإنك انجزتي شي مهم يرجع عليك بالاجر كل يوم في رمضان وغير رمضان ان شاء الله

جيبي دفتر وقلم .. وقبل تنامين احسبي وش سويتي باليوم!!


*صليت التراويح


*قريت جزء من القرآن

*استغفرت 1000 مره

*مسحت المويه عن الارض

*ساعدت الشغاله

... الخ


صدقيني بتلقينك كتبتي اشياء كثيره وتعطيك دافع تستمرين على الوضع هذا .. وبتحسين براحه نفسيه ان شاء الله وبتلقينك متعوده على الاحتساب

يعني الحسنات مب مقتصره على القرآن والصلاة والذكر..

والله دايم افكر .. الحمد لله دينا سهل والله هالديانات الثانيه اغبياء ... دينا كل شي له حسنات الحمد لله حتى ابسط الامور يآخي اسلمو وبس <<يقالكم اسلوب دعوه


واذكركم ثانيه .. النيه في القلب "وليس اللسان"مطلوبه في احتساب الاجر ..

ولا تنسين

اقري موضوعي وارفعيه بذكر و احتسبي الاجر

والله يجعلنا من عتقائه يارب .. وجميع المسلمين ..

ان اصبت فمن الله ,, وان اخطأت فمني ومن الشيطان

** وعذراً على الاطاله حاولت اختصر بس ماقدرت اكثر من كذا لان حبيت اذكّر بأشياء الكثير ما يحطها في باله **

الموضوع الأصلي: كيف نكسب حسنات بأسهل الطرق || الكاتب: أ ذ كـر اللـه || المصدر: منتديات بعد حيي

www.b3b7.com

كلمات البحث

مواضيع اسلامية، مواضيع عامة، قصائد، هاكات ، استايلات