ياشين الهدوء ياناس ذبحني

((مزيون بعد حيي والخمس نجوم))

طبعا انا الان في قطر لتسجيل بعض البرامج التاريخيه وفيها

حدثت حاجه غريبه تحتاج الى وقفه لعلاجها وهي:

لما اتصل بي مسؤل العلاقات العامه بالتلفزيون للتنسيق حول الحجز

والسكن قال هل فيه مكان معين تحبه بالذات ؟؟ قلت انا ونظرا لكوني

مزيون المضايف الساحر والقائد الاول للقوات المسدحه بالمضايف قلت:

[poem=font=",6,black,bold,normal" bkcolor="transparent" bkimage="http://www.b3b7.com/vb/mwaextraedit2/backgrounds/5.gif" border="double,4,black" type=2 line=0 align=center use=ex num="0,black""]
دايـم(ن)نـنـزل علـى نابــي المشارف=زامي(ن)راسي على غـيم السحـايب
مايـجـيـه الا كـثـيــريـن المــعــارف=مثل ابن غسلان جـيــاب عـجايب
اشقر(ن)يجـدع من الصيد الطوارف=لا سلم من صاج شيـنات الضرايب
ابي خمس نـجـوم بـه خمسة مصارف=فوق هام السحب عن كثر الطلايب[/poem]

والله وهم يستقبلوني استقبال يليق بمقام قائد فرقة الصاعقه بالمضايف على سياره

طرفها بالدوحه وطرفها الثاني بالدمام وعلى طول للفندق ويوم انسدحت ابي ارتاح

شوي قبل اللقاء بمدير التلفزيون للتباحث بالعمل 00

علمي بروحي انسداحتي على هكالسرير اللي كله ريش وعطور الساعه ثمان العشاء

والاجتماع الساعه عشر 00 يوم غطيت لي غطه وصحيت يمار الساعه تسع قلت مضبوط

وانا اويق مع الدريشه يمار الشمس طالعه واثريها تسع الضحى وراح الاجتماع واتصلوا تليفونات

وصعدوا يطقون الباب وانا فاطس خارج حدود التغطيه 00

استحيت منهم وقلت هذي حاله من الشجاعه والسطار والثقه الكامله تجيني بالسنه مره وحده

وقلت:

[poem=font=",6,black,bold,normal" bkcolor="transparent" bkimage="http://www.b3b7.com/vb/mwaextraedit2/backgrounds/5.gif" border="double,4,black" type=2 line=0 align=center use=ex num="0,black""]
نومـي يـجـي باسباب كثر الشجـاعه=انـشد هـل الـفـلـه عـن طـبـوع فـواز
ذيب الـذيـاب اللـي تـهـابـه سبـاعه=لا نـام مايـقـعـد عـلـى مـحـط الاهـواز
دامه جـمـع عـقـل وجـمـال وبـتـاعه=وعشوق يشهد لي على الفـعل بايجاز
لا شافـتـه عــذرى تـقـعـطـل بساعه=عـدك ضـربـت وروكـهـا بـألـف برواز
وش عاد والله لو يفـوت اجـتـمـاعه=واصبح على الـفـرشـه تـقـل عـيـن لكاز[/poem]

قالوا حصل خير ودايم اللي بسفر يتعب ويحتاج راحه ومن هالحكي يتعذرون لي

الاجواد 0 والله وحنا نقوم للعشاء يمار يجي اربعين متر فطورهم وانا لي يوم ونصف

نايم وماكليت شي وكبدي صايرة تطق تقل جرس عربيه 00 وتخبرون مالي روح على

المرقوق واقعد ابخز بعيني ابي اشوفها لكن ماش ماهي فيه وانا اسحب صحن مكرونه

اللي تقل خيوط ويسمونها (سباكيتي)يمار اخبرها هكالسنه يوم حنا بلبنان ومن الجوع

شلعت لي شحنة ملعقه وحطيتها بافمي ومشت لين وصلت بلعومي وتعدته يجي شبر

واطرافها الثانيه بالصحن من طولها واثاريهم يقصونها بالشوكه وانا تجهلن بعض طبايع

هالمواكيل يمار يوم بلزت عيوني وصرت مثل زرطة التيس للمخلب اللي اعترض بحلقه

وانا يثور بلاي من ناحيه مستحي ومن ناحيه بلشت بكومة هالسلوك الي تجمعت بحلقي

واثاريني متعود اول على المرقوقه الله يذكرها بالخير لقمه لقمه وتضبطها ام فهد على مقاس

افمي وحلقي 00 والله اني تمنيت منيذر اخبر له فزعات حلوه بهالمواقف الذيب

لأني من كثر اللقمه ادري ان اللي يبي يجرها يبي ياصل للباب وهي ماطلعت كلها فقلت:

[poem=font=",6,black,bold,normal" bkcolor="transparent" bkimage="http://www.b3b7.com/vb/mwaextraedit2/backgrounds/5.gif" border="double,4,black" type=2 line=0 align=center use=ex num="0,black""]
لا واحسايـف ذيـبـكـم يالـمـضـايـف=اللي يـهـابـونـه جـيـوش وطـوابـير
من لقمة(ن)عـدت بدرب الشفايف=وليته سلم منها وله عـيـشـة الـطير
لو تقـصف العلباء بـشـيـن الـقـذايف=ماتـطـلـع اللـي كـنـها الحـبـل بالـبير
سدت لـه الـزردوم سد الـقـطـايـف=ثم اعلنت بالحلق عن قطعة السير
مع لـقـمـة الـمـرقـوق مـا بـه كـسايف=ولا به خيوط(ن)ماتجي كـود تمتير
حـيـثـه دلاقــم نـاعـمــات(ن)ظـرايف=تفوت مع بلـعـوم حـتـى الـعـصـافير[/poem]

قمت بسرعه كني شبعت ورحت لدورة المياه واقعد اجذب واجدع يمار يوم تعدت

المترين الملعونه وكلها متلويه بحلقي وانا اتنفس واغسل وجهي والله وامشي منهم للفندق

ابي اكتب لي مواضيع براسي 0 واقعد احاول واحاول وعجزت من شدة الهدوء وتخبرون

الراس متعود على اللجه وبواري السيارات وصيجان ام فهد له ورير من فوق راسي تقل

طيار واثاري راسي ادمن على اللجه وصار مايقدر يكتب الا بالفوضى والصوت0 وانا اقوم

ارفع على حس التلفزيون يمار يوم اعتدل المزاج عندي وجيت اكتب واذا الناس يطقون علي

الباب ويطلبون الهدوء وقصر التلفزيون لانه فندق خمس نجوم وفيه شخصيات وانا اقصره

واحاول اكتب يمار يوم ذبحن الهدوء وحاس ميزانية عقلي وانا اتصل بالمسؤل قلت ابي شقه

بسوق واقف بمركز المدينه وزحمتها مثل البطحاء بالرياض فقال هناك قلق عليك كثير فقلت

القلق بهذا وهناك هو الجو الحلو اللي تعودت عليه فقلت:

[poem=font=",6,black,bold,normal" bkcolor="transparent" bkimage="http://www.b3b7.com/vb/mwaextraedit2/backgrounds/5.gif" border="double,4,black" type=2 line=0 align=center use=ex num="0,black""]
ياشيخ ابـي فـرقـى حياة الرجـنسي=اللي غـديـت بـقـاعـتـه تـقل مقـبـور
وشلون اعيش بـقاعـتـه تـقل منسي=لا صاج لا شوتـه على فـجـة الـنـور
ابي الاوادم مثل طبـعـي وجـنـسـي=وهوادي الوغدان تقذف من السور
كل الاوادم فـيـه حـمـر(ن)وفنسي=ولا ني على القعده مع الناس مجبور
اللـعـب بـلـيـارد وبالـصـبـح تـنـسـي=وشلون مقعادي الى شـهـر عـاشور
وش عاد لو جـوه بعـينك رومنسي=ابي البواري حـسـهـا يشطب الدور
وابي انـبـطح بالقاع من دون كنسي=لو كنت عند الناس راوي ومشهور[/poem]

لكن مدير التلفزيون رفض وقال عيب علينا نخلي ضيفنا بشقه بالديره00

ولا ازال اعاني من شدة الهدوووووء ياقشره ماابي هدوووووووء عجزت اكتب000

يعني طار الاجتماع وطار الالهام ياحرام ضحكتني وفوق هذا كلة تبي مرقوق مانفعت لك السباغيتي
الله يرحم حالك وش نقول لك أصبر الصبر مفتاح الفرج
تقبل مروري
دمت في حفظ الرحمن

ياشيخ ابي فرقى حيـاة الرجنسـي
اللي غديت بقاعتـه تقـل مقبـور
وشلون اعيش بقاعته تقل منسـي
لا صاج لا شوته على فجـة النـور
هههههههههههههه
بعذرك والله
مشكور اخوي فواز على القصه الغريبه
بس النوم كثير
تروح شجاعتك منه

ههههههههههههههههههههههههههههههههههههههههههههه

خوش موقف يابوفهد مسووين زحمه اتصالات وفوضى بالفندق وبوفهد بسابع نوومه

ههههههههههههههههههههههههه


ربي يسعدك وويفقك وترجع سالم انشالله

ابو فهد
هذا اشوف خشتك كل صبح عسى خشتك ماتخفى
وربي بس انتبه لاتجيب لنا العيد مره ثانيه وتزرقهم

تقديرى وحبى لك
ورد على الجوال لا اتصلت عليك