حكاوي من الحجاز

السلام عليكم ورحمة الله وبركاته
يالله امبسطوا مع الكحاوي الحجازيه ما احسن منها خاصه وانها تكتر في رمضان بس ما تقولو النجم وش دخلو فيها لانو انا عاشقها وعائشه كمان بعروقي
يالله تعالو ولا يكتر

المنظر : بيت من بيوت مكة يتكون من عدة طوابق الطابق الأخير هناك الخارجة والصفة والقطيع

- يا عبده ..... يا ولد يا عبده ......... يا عبدو

- مرحبا عمي

- فينك عساك البلا . من أولية وأنا أزهم عليك .. إلين أتنبح صوتي.

- عمتي ارسلتني إلى الدكان..

- أمشي بلا عمتي ....... بلا عمتي .... عمامة قمل إن شاالله . تعال هنا .

- حاضر ياعمي.

- شوف أبغاك بعد صلاة العصر تروح هوا على عمك إبراهيم وتقولوا عمي يبغى منك المروحة القعّادي . وتاخدها منو وتجيبها هنا و تطلعها في الخارجة. بعدين ترش الخارجة بالمويه وبعدين تجيب الشربتين إللي في المركب وتحطها في المشربية وتفرش الخارجة وتجيب أنت وزبيدة المساند والتكايات من الخزين فوق في السطوح وتظبطو الخارجة عشان جايين البشكة الليلة يسهروا عندي. وبعد المغرب تروح لدكان عمك طاهر وتجيب من عنده ليات الشيش إللي وديتها أمس لعنده عشان يصيخها... فاكر ولا نسيت.

- فاكر يا عمي .... هما البشكة جايين الليلة يا عمي.

- إيوه ... عساك الصنج.,أنا أقولك سوي الحاجات هادي ليه... أوه لا تنسى تحط بنت المنقلة جنب باب الطهارة وتولع الفحم في وش العدو بعد صلاة العشا وتقول لعمتك تعبي براريد الشاهي و الفناجيل. يا الله قوم بسرعة.

- حاضر يا عمي.

بعد صلاة العشاء وصل البعض من البشكة.

- سلام عليكم

- عليكم السلام و رحمة الله و بركاته

- هلأ ... هلأ ....بي وَش الفلى.. من غاب الغيبة جاب الغنائم .... فين الناس من زمان ؟

- أهو ... في هادي الدنيا .. فاضي مشغول. زي أم العروسة.

- ول .... ول .... إشبك كِده مهموم. خلليها علله ياراجل .. لا تفكر ... لها مدبر.

- يلله ياهو ناخد صكة بلوت قبل ما تكتر البشكة... و ما راح يوصلنا السرا.

- يلله . مين يقابلني .. لا ما أبغى حسين يقابلني ... هادا غشيييم.

- قوم يا واد إنت الغشيم. دحين أوريك مين الغشيم ؟ .. قابلني يا محمد ... خلينا نوريه مين الغشيم.

- حُكُم .

- لا صن ..... ميِّة

- لا ما فينا رص .... الغشيم هو اللي يرص.

- لا أنا بس أخشخشها ... ما أرص .

و يصل بقية البشكة ... ويوصل آخر واحد.

- سلام عليكم

- وعليكم السلام ورحمة الله وبركاته ... فينك ... ليش أتأخرت.

- أسكت يا شيخ الحريم دول شغلتهم شغلة على بال ما يجو من المقينة ويلبسو الكورَت ويحطوا الحمرة والبودرة وعلى بال ما يتلكعوا شوية أقوم أوديهم ُجَواز بيت عم صابر .. أصله الليلة صبحة ولده سامي .... و الحرمة نصييصة مع أهل العريس.

- والله كنا رايحين نتعشى ونسيبك .

- يالله معليش أخرتكم شوية .... أقولك هادا مو عم حمزة إللي جنب الرادو ؟

- إلا هو ... شوفوا رايح مع حفلة السيدة.

- أهلاً عم حمزة ... سلام عليكم .

- عليكم السلام ... هلا ..... هلا ....كيف حالك.

- نعمه ... الحمد لله .... كده آخد الجو لوحدك .... ورايح فيها .

- لم الزمان اللي غدربي بعدك و كنت نديم شكواه

رماك و جا السهم في قلبي عطف عليه والبعد ضناه

- الله ياعم حمزة ... أتريك .... غاطس غطسة بنت كلب ..

- يا واد .... أبعد عني خليني أسبح في بحر الغرام لوحدي.

- الله ..... الله ... هادا واقع بدبابيبو . .... ها ما جا دوري.... يالله المغلوب يجنب على جنب.

- يالله يا هو العشا فاصل.

- العشا فاصل !! هادي غشامة..... الله فكك من غلب يا غشيم.

- نشوف بعد العشا .... لحسن أنا جعت من كثر الشيش والشاهي.

- تموا يا جماعة ... و استروا ما وجهتوا ...

- ما حصل قصور ... كفيت و وفيت ... ما شا الله تبارك الله

- الله .... سليق ممتاز .... تسلم يدك يا أم صالح .... الله يطرح البركة فيك يا أبو صالح.... هنيالك بأم صالح.

- بالهنا والعافية... وحياكم الله .وبارك الله فيك.

- الحمد لله ... نعمة ... والله الواحد أكل بدون حساب .. إلين أنبشم.......... يعطيك الخير يابو صالح.

- ألف هنا ..... وعافية.

- يا واد عبده صب الشاهي.

- حاضر يا عمي.

- أديني شاهي اخضر خليني أهضم.

- بالله إذا فيه شاهي بالنعناع بس بدون سكر.

- حاضر ..... أتفضل .... أتفضل .

- فين الطهارة.

- قوم يا واد يا عبده وريه عمك فين الطهارة . و شوف الحنفية فيلها موية كافية والا لأ ؟.

- يالله يا جماعة أنا أستأزن خلاص الساعة صارت إطنعشر .... هود الليل .... يالله مع السلامة.

- مو بدري ياهو .

- لا خلاص سهرنا كتير وبكرة جمعة ... الواحد لازم يصحى بدري عشان ينزل الحرم بدري و يصلي الجمعة ويحَصِّلوا مكان في الصحن. تصبحوا على خير.

- وانت من أهلو.

- مع السلامة .... و في حفظ الله.

[align=right]

يا سلام ع لهجة أهل الحجاز :p !!
احلى الأجواء الرمضانية بجدة ومكة والمدينة ،،
اما دباديبووو ههههه

يسلموووو نجم ع القصة الزريفة
[/align]

ههههههه
ياحلاتها من لهجة
النجم الشمالي
تسلم على القصة الحجازية الزريفة

خخخخخخخخخخ ..
مششكـوور .. خيـوووو ..~ٍ]

الشمآالي


سلمت أخوي ..


مــــلاذ

يعطيك الف عافيه ويالبى لهجه اهل الحجاز
خالص شكري ياالنجم الشمالي

شكري وتقديري للجميع

ههههههههههههه
ييسعدك ربي ياارب ~