شوفو شو سوا السعودي لزوجته في ذكرى زواجه الخامس

السلام عليكم ورحمة الله وبركاته

في قصه جذبتني واايد قريتها في احدى المواقع وحبيت اني انقلها لكم


قبل شهر تقريبا وانا قاعد في البيت (عقب المغرب ) أقلب في هالريموت من محطه

لمحطه ومن قناة لقناة ...وكانت المدام على يميني تبتسم وتناظر فيني وودها تقول شي

( أعرفها ان بغت حاجه تشوف لوزها من الأبتسامه )وأن كان مالها حاجه صارت

زي ذا

المهم بادرتني بسؤال خطافي (ماتوقعته ) قالت : حبيبي كم لنا متزوجين ؟؟ قلت هاه!!

الصراحه أنا انلخمت وبديت أحسب بأصابعي ... يوم شفتها كشرت ... قلت لحظه

بجيبها (عقدتي الحساب) وفعلا عطيتها الأجابه الصحيحه ,قلت :- بعد اسبوعين

ياعمري نكمل 5 سنين معرسين.. يوم طقت الأبتسامه مره ثانيه وقالت :- طيب !!

وش يعني لك هذا ؟؟ بيني وبينكم انا ما عرفت وش تقصد بس توقعت انها تبي

هديه ( ماذبحنا الا نصب الأفلام العربي ...كل سنه وانتي طيبه ياروحي ) قلت لها :-

وش قصدك تبين هديه يعني ؟؟ قالت لا لا فهمتني غلط !! انا ابغاك انت

قلت يا حبي لتس والله آمري !!

قالت وش رايك نروح دبي أسبوع عسل .. ونحتفل انا وياك بمرور خمسه سنوات

يعني اليوبيل الذهبي لزواجنا !!

قلت لحظه :- من قالك ان 5 سنوات يعني يوبيل !!

اليوبيل من 25 سنه وفوق !! قالت لا اني سامعه فوزيه الدريع تقول ان 5 سنين

خليها يوبيل ذهبي !! قلت طيب ... بس ترى العطله توها باديه وصعب القى حجز

لدبي هالأيام ... قالت لا مالك هم أنا حاجزه بالتلفون قبل شهرين !!! ومخليتها لك

مفاجأه... بس ترى آخر موعد لقص التذاكر بكره الظهر يعني أطمر الحين لأقرب

مكتب وقص التذاكر !!! ( بصراحه حسيت في هاللحظه ان الحريم دواهي ) .

طبعا انا أسقط في يدي وما قدرت أفرك ( بس تبون الصدق فرحت لأني انا ودي بعد اسافر )

صراحه طفشت من الرياض وزحماته هذا أولا وثانيا من زمان ما سافرنا انا وهالحبيبه..

قلت لها ابشري بس وين ودك نسكن في دبي ؟؟ ناخذ شقه ولا فندق ؟؟

قالت لا معليش ياعمري نبي فندق يكون له اطلاله مباشره على البحر وشاطيء خاص ..

وياليت لو يكون شاليه أحلى وأحلى !!

والله وأطمر لمكتب السفريات وفعلا قصيت التذاكر وحجزت مدة أسبوع في منتجع

وسبا هبتور قراند دبي ( الليله ب 1100 ريال) يعني 7700 ريال إقامه فقط ..

وقررت اني أقضي أسبوع زواج رومانسي جدا في دبي .. وأيضا قررنا انا وزوجتي

اننا ما نستخدم جوالاتنا وناخذ شريحتين من دبي ..عشان ماحد يتصل علينا

ويزعجنا !! وفعلا نفذنا كلامنا .......وبرعاية الله طرنا لدبي لقضاء هالكم يوم بدون

ما يشغلنا أحد !! ووصلنا دبي وعلى طول استأجرت سياره من المطار وعلى الفندق

الي يقع فعلا على البحر مباشره وقريب من برج العرب على شاطيء الجميره وكان

الصراحه الفندق (( يشجع على الرومانسيه )) ويوم دخلنا الغرفه لقيناها

خيااال (غرفه غراند ديلوكس ) والحمام بس لحاله قصه... والغرفه كبيره مره وحاطين

كمبيوتر مفتوح انترنت 24ساعه وجهاز تصليح كوفي وشاي مع اغراضهم مجاني ..

وفرش صح وديكورات صح ... الصراحه انه يستاهل هالسعر .. بس عيبه ان اسعار

المأكولات و (المشروبات ) غاليه شوي !!

المهم انا نويت اسوي مفاجأه إحتفاليه غريبه للمعزبه وأعمل حركه رومانسيه ماتتخيلها ..

فقلت لها بعد ما استقرينا بالغرفه ..أنا بنزل لأقرب سوبرماركت عشان أجيب أغراض

وأعبي ثلاجة الغرفه ( عصيرات -زيتون أخضر - جبن أبيض - عسل- خبزتوست -خيار - جزر -

بسكوت مالح قليل الدسم -حق الشاهي - مكسرات ...الختعرفون هالخفايف حلو تكون

بالغرفه أوفر سعر من برى وفي نفس القت حق النقنقه والتسلي

المهم نزلت من الغرفه وعلى الرسبشن على طول وسألت عن المدير..ودلوني عليه..

رحت لمكتبه خلف الرسبشن لقيته رجال شمحوط جنسيته لبناني يسوى ديره ( ولا يهون

من يقرأ )...سلمت عليه بحفاوه وعرفته بنفسي

وقلت له انا بصراحه جاي أقضي كم يوم هنا وبكره يصادف ذكرى زواجي وودي اسوي

مفاجأه للمدام ( يعني بارتي صغير انا وهي بس) وما ودي اتكلف كثير وش رايك !!

ودي انك تساعدني ؟ انا عندي فكره براسي بس لازم توافق عليها !!

الصراحه الرجال فرح كنه هو الي بيسوي الحفل ...قال تكرم عينك ...شو هي الفكره؟

قلت انا قريت ان الشاطيء يطفي انواره الساعه 7 المساء ... ويكون مفتوح طول

الليل للنزلاء الي يبغون يجلسون على الرمل او يتمشون ...صح ؟ قال ايه صح ..

قلت طيب فكرتي الي ابيك تساعدني على تنفيذها اننا نحط طاوله دائريه مقابل الشاطيء

على الرمل بفرش حلو وكرسيين ونحط دار مدارها شموع بشكل حلو ومدخل للشموع

ونحط على الطاوله الكيكه والعصير ....هاه وش رايك ؟؟

والله ابن الحلال انبسط وقال مافيه مانع الطاوله والفرش والعصير من عندنا هديه

بس انتا جيب الشموع والكيكه .... قلت أبشر ساعه وكلها عندك ...

وفعلا بدأت بتنفيذ الخطه ورحت لمحل حلويات دلوني عليه بشارع الجميره وسوو لي

كيكة روووعه ومكتوب عليه المناسبه وشريت شموع من سوق جنبهم ورجعت

للفندق وعطيتهم الأغراض وعلى الغرفه .....ومعي باقي الأغراض الي شريتهم للثلاجه

وكاني ما سويت شي !! أستعدادا للمفاجأه الرومانسيه يوم غد الساعه 12 مساءا

إنتهى الجزأ الأول ( وباقي الجزأ الثاني ) وفيه

* حرمتي صاحت زي الأفلام يوم شافت المفاجأه

* حركه سويناها بالفندق خلت الخليجيين كلهم يسوون زينا

* صديقي الأسترالي وموقفه من الخليجيين !!

* دبي بعيون أهل الرياض






زي ما وعدتكم بنكمل الجزأ الأهم في الموضوع

وقبل لا أبدأ أقول للي يقولون اكيد انك منتب سعودي هم صادقين بصراحه انا من يوم

اني صغير وأنا احس ان ذا الشهبان اللهبان الي في حارتنا ماش مهومب من ديرتنا ... وكان

عندي إحساس يراودني ان فيني عرق شامي بس إذا ناظرت وجه أخوي دحيم !! أقتنع

وأقول يا ولد أعقل .. ما دام ذا أخوك يغني عن الف شهادة ميلاد !!

وبالنسبه للي مستغربين من أحداث الرحله تراي ما قلت اني استأجرت بوينغ ورحت هنلولو!

ولا قلت أني شريت ديناصور محنط !!, ولا اني استأجرت سويت ملكي في برج العرب

ب 9000 درهم في الليله عشان تصير قصتي خياال ولا حلم ...ترى االرحله بالضبط

يوم حسبتها بتذاكر الرحله وإقامه مدة 7 ليالي في قراند هبتور + ليله قارب خاص +

مصاريف الأكل والشرب والسياره وهديه محترمه للمدام في ليلة الأحتفال (يعني بالعربي

عشنا الف ليله وليله ) كل هالمصاريف والله ما تعدت 15الف ريال !!! أنا متأكد ان فيه

من شبابنا ناس يروحون دبي بنفس المده ويصرفون أكثر منها على بنات ليل وسربته

ويجي لديرته ضايق صدره ومكتأب من تأنيب الضمير وصرف دراهم في غير طريقها !!

نكمل الموضوع


رجعت للفندق في اول ليله ومعي بعض الأغراض اللي شريتها وقمت ارتب الثلاجه وأطلع

الأغراض اللي مالها سنع !! ,

كانت الساعه عندما قررنا الخروج من الغرفه تقريبا 9 مساءا يعني تونا بدري ويمدينا

على اننا نلحق على كل شيء ذيك الليله , فسألتها هاه وين ودك نروح الحين , قالت والله

كيفك بس وش رايك نروح للمارينا لأنها قريبه مقابله فندقنا وفيها قعدات ومطاعم تمدحها

رفيقتي ...قلت اوكي بس اتفقنا اننا نخليها وحنا راجعين لأنه ما تغلقالى متأخر... ورحنا

ذاك اليوم لسوق فخم وحلو (على الطراز الأيطالي ) اسمه مركاتو سنتر...وطبعا تمشينا

فيه وتعشينا بمطعم فوق بالدور الثاني وبعد ما خلصنا مرينا الهايبر ماركت الي فيه وخذنا

بعض المكسرات والشوكالاتات (انا بصراحه تستهويني الشوكلاتات وخصوصا الغريبه)

وطبعا رجعنا على طريق الساحل قاصدين نتقهوى بقعدات المارينا (مرسى اليخوت بدبي)

وللي ماراح للمارينا هي عباره عن مبنى جميل على شكل سفينه وبه عدد من المقاهي

والمطاعم العالميه وجلساته داخليه (تكييف) وخارجيه (في الهواء الطلق) مقابل بحيرة

المرسى وفيه مقهى مره رهيب ...خصوصا اذا شغلوا الرشاشات حقت

المويه رذاذها يخليني أعيش الخياال ... وبصراحه انا كنت عاقد العزم على اني أدلع المدام والجو

شجعني اني أطلع مواهبي ...مافيه كلمه غزل سمعتها في فيلم عربي او هندي الا قلتها ذاك اليوم

لدرجه اني خفت اني ما ألقى شي أقوله لليوم المحدد (يوم المفاجأه) بس فعلا كانت ليله حلوه وبدايه

مشجعه لي أني اعيش فعلا اسبوع عسل مميز..

( نسيت أقول شيء مهم ) وهو أني أملك مشروع تجاري وطوال 4 سنوات ماضيه كنت مشغول جدا

,أطلع من البيت الصباح بدري وما أرجع الا بالليل متأخر وأجي تافل العافيه يعني مافيه وقت للدلع

والرومانسيه وكانت هي بصراحه صابره ومقدره ظروفي السابقه ويوم زالت هذه الظروف وزانت

الأمور قررت اني اعوضها وأصير فعلا رومانسي زي ما تحب كل زوجه ان يصير زوجها ..

وكنت انا ناوي ارتب رحله آخر الصيف واخليها مفاجأه..بس يوم شفتها متحمسه لدبي (وكان وقتها

الجو حلو أول اسبوع من ألاجازه )بصراحه ماحبيت أكسر بخاطرها ...

المهم جلسنا هذيك الليله الين الساعه وحده ونص تقريبا بعدها رجعنا للفندق , وطبعاانا ما قلت

لها شيء ولا لمحت لها بشيء عن حفلة بكره بس انها سألتني وين تبي نروح بكره قلت لها خلي

البرنامج حق بكره علي يعني دعي القياده لي وتمتعي انتي بالرحله ...قالت اوكي على كيفك..

نمنا هذيك الليله وقمنا الساعه 12 الظهر وطبعا احنا جايبين معانا فطاير وكيكات وحركات ...

وصخان المويه والكافي ميكر موجود بالغرفه,المهم زبطنابالغرفه فطورمحترم وقعدنا نتقهوى

ونتفرج على التلفزيون ( على فكره حجزنا شامل بوفيه مفتوح للفطور بس حنا يالسعوديين

ما ينفع لنا , لأننا ننوم متأخرين ونقوم متأخرين)

المهم يوم افطرنا ( فطور غداء في نفس الوقت ) فتحت النت للمدام عشان تدخل على موقع

سياحي تقول بجمع لك معلومات عن الجديد في دبي... وأنا لبست الشورت حقي ونزلت

للمسبح الساعه وحده الظهر وقلت لها اذا خلصتي انزلي للمسبح تفرجي ووسعي صدرك...

واتفقنا اننا نطلع من الفندق اذا برد الجو شوي يعني اربع ...المهم انا نزلت وعلى طول

على المسبح الرائع حق الفندق وطبيت (محيفره))<<<شهادة اثبات اني سعودي !!

المهم كان بوسط المسبح في المويه قعدات زي البار ويخدمون فيه من الخارج...بس انت

تكون جوا المويه ...المهم قعدت حوالي ساعتين والا هذيك الي قاعده قبالي على طاوله من

الطاولات الي جنب المسبح لابسه نقاب وشكلها تبتسم !! بيني بينكم انا ما عرفت انها حرمتي

الى من نعالها ( شبشب أصفر,حق بحر !!!) للعلم زوجتي من بيئه قرويه مره وعايشه يتيمه

الأب ..متوفي ابوها وهي عمرها سنه ونص ...يعني لها رحمه .. الصراحه انا رحمتها ورحمت

كل السعوديات والخليجيات..ودهم يستمتعون بالبحر بس المشكله الأجواء غير مهيئه (سلموالي

على الريتز كالرتون حق البحرين ..حاطين مسبح خاص للحريم )!! المهم انا عقبها قلت والله

لأخليها تستمتع بالبحر وتطافش فيه الين تمل ..والا مانيب ولد ابوي ..

طلعت من المسبح وقعدت انا وياها على الطاوله وطلبنا شيبس( بطاطس مقلي ) لأني شفته

مع بزر سعودي جنبنا وخفت اني أنظله !!!

يوم خلصنا متقهوين رحنا غرفتنا نغير عشان نطلع نكمل تمشيتنا في دبي... وفي الطريق

للغرفه بغى موظف الرسبشن يخرب المفاجاه لأنه ناداني وانا طالع عشان يعلمن الترتيبات

حقت الليله (طبعا انا فهمت وش يبي مني قبل اروح له عشان كذا قلت للمدام اسبقيني للغرفه

غيري الين اجي ) وفعلا تمت الترتيبات النهائيه للحفل الي حددته انا الساعه 12 مساءا

وقال لي الرسبشن ان هذا الشخص (هندي) اسمه محمد سليم هو المسؤل عن ترتيباتك

طبعا انا عاى طول مسكت محمد سليم وعطيته 50 درهم اكراميه وحرصته ...وكان فعلا

ذا الهندي رهيب مره وجاب هو زود 6 شموع أم عصى وحطهم على مدخل الطاوله , ووصيته

انهم يحطون اغراضهم ويروحون ( كنت ابغى اصير انا وياها لحالنا على الشاطيء في الليل)..

وفعلا سوو نفس الي كنا متفقين عليه رتبوا الطاوله وولعوا الشموع قبل الساعه 12 بعشر

دقايق ومشو ....

ارجع للموضوع

المهم طلعنا نتمشى ورحنا يم السوق الصيني (دراقون) الي على طريق العين ..وكنا نبغى

نشتري من السوق الصيني كرسي مساج بس لقيناها هناك غاليه وقعدنا نتمشى في السوق

وما طلعنا منه الى الساعه 9 وعلى طول على مطعم صدف الأيراني الي بشارع الشيخ زايد

وكنا بصراحه ميتين من الجوع ودبغنا في هالبوفيه المفتوح الين دخنا ... وعقبها قالت لي

خلنا نروح نتقهوى بالمارينا ... قلت لا انا عازمك على بيالتين شاهي في مطعم الفندق !!

كنها ما ودها !! بس قالت على كيفك انت اليوم مدير البرنامج ..ومريت في الطريق على محل

في المركاتوا حق مجوهرات وقلت لها انا بنزل 5 دقايق خليك في السياره وتعذرت اني ابي

الصيدليه عشان آخذ بندول بس رحت للمحل وخذت منه خاتم ب 1800 ريال مع انه يمكن

لا عب علي بس المدام يوم عطيتها اياه تقول انه روعه ومايقل سعره عن 3000!!!!

وصلنا الفندق الساعه 11وطلبت منها انا تلبس فستانها الي هي جايبته ( انا شايفها وهي

ترتب اغراضها في الرياض وجايبه معها فستان سهره - مصدقه الحرمه انه عرس !! )

وطلبت منها تكشخ كنها رايحه لعرس ... وقلت لها بجيك بالزبط قبل الساعه 12 بخمس

دقايق وانتي جاهزه ... قالت اوكي ... وطلعت انا عشان اشوف الترتيبات ولقيت محمد

سليم يدهر ( نفعت الخمسين ) وفعلا حطو الطاوله قبال البحر على الرمل في مكان مظلم

بس منظر الفندق خلفنا وانواره رائعه والبحر شكله كان مره روووعه ... والي يزينها

ان الفندق يمنع السباحه في الليل ( يعني الشاطيء كان لي انا ولزوجتي لحالنا ) !!

المهم زبطنا الطاوله وولعنا الشموع دار مدار الطاوله من الخارج (على الرمل) وكان

الهندي جايب معه شموع بأعواد غرسها على الرمل - زي مدخل للطاوله - وجابو

العصير وشوية ورد حطوه بالنص وجابوالكيكه ورتبنا الجلسه صح...

وعند الوقت المناسب طلعت فوق اجيب العروس ( عروس بعد خمس سنوات زواج)

وفعلا نزلنا انا وياها ومرينا من جنب الرسبشن وكان الموظف ( من لقافته يناظرنا)

وده يشوف الموقف ...وطلعنا انا وياها من الباب الخلفي ...متجهين للبحر...نمشي

بخطوات بطيئه والله اني كنت احس انها زفه... بس هي الى الحين ماتدري وش

السالفه !!

ويوم قربنا للبحر ...قالت لي وين بتروح ؟؟ من هنا مافيه مطعم !! قلت تقدمي شوي

ورى هالشجر بأتجاه الرمل الي يودي للشاطيء...

وفعلا وصلنا للمكان

وشافت الطاوله والشموع

وشافت المنظر ...والتفتت علي قالت هذي لنا !!!!!


قالت هذي لك انتي ...

لك أنتي يابعد كل الناس ...


والله ياجماعة الخير الحرمه ما تمالكت نفسها ...

وقعدت تصيح !!!

انا الصراحه كنت احسبها دقيقه كذا ودموع فرح وخلاص ...بس ماش الحرمه

قامت تشاهق من الصياح...

أضمضم فيها واسكتها .....ماش !!

يابنت الحلال ...وش فيك !!! خلاص اسكتي !!

الحرمه تزفر وتشهق من الصياح ...لدرجة ان الكحل والمكياج والروج وكل مستحضرات

التجميل ساحت على كتفي ووصخت ثوبي ...هذا غير الي يطلع من الخشم من الشهاق!!

قعدنا حوالي ربع ساعه وحنا على هالحال ...وطلعت هديتي وعطيتها ...ثم عودت تصيح

مره ثانيه !!

المهم تسكت شوي وتقعد تناظرني ثم تعود تصيح !!!

قلت يابنت الحلال وش السالفه !!

قالت قسم بالله اني ما عمري فرحت ولا حسيت بقيمتي مثل اليوم !!!

تخيلوا !!

هالكلمه للرجال المتزوجين

(ترى مثل هالحركات وان كانت غير مكلفه بس عند الحرمه أغلى من عقد الماس بخمسين الف)


المهم الحرمه ذاك اليوم كانت في قمة السعاده ومو مصدقه نفسها وكل شوي تلتفت علي وتشوف

آثار صياحها على ثوبي ونقعد نضحك !!!

.....


معليش بخل بوعدي وبكمل بعدين لأني تعبت من الكتابه وصراحه فيه اشياء كثسره ودي

اقولها عشان كذا ما أبي اسلق الموضوع سلق ( القاكم غدا)



(( 3 ))

صباح الخير عليكم جميعا

نكمل

وقفت عند ذيك الليله الي صاحت فيها حرمتي صياح الله لا يوريكم وكنت انا احاول

اني أغيرالموضوع وأنكت بس هي فعلا كانت تضحك شوي وتصيح شوي( يعني صياح دلع)

ويوم هدأ الجو شوي وشافت هديتها وبدأت تدخل في الجو وتركز على الي حولها ...شافت

الكيكه والشموع والورد والعصير ....وقامت تناظر في البحر وفيني ...قالت أخس والله منتب

هين وشلون سويت كذا !! <<<(الله من زين التعبير )

وهالفندق وشلون طاعوك !! بس انا مقدر انها مصدومه.. قلت اني استأذنت منهم وماقصروا

وبعدين حنا ما كلفنا عليهم بشيء ... حتى الخدمه قايل لهم لا أشوف ولا واحد !!

وفعلا قضينا ليله مره رايقه ...أستانست فيها مرتي لدرجه انها قامت تجيب نكت أول مره

أضحك من قلبي عليها (أول أضحك مجامله ) لدرجة اني شكيت انها شاربتن شي من

هالغراش الي بالغرفه !! قلت قولي الصدز وش انتي شاربه في الغرفه !! قالت قسم مويه بس ..

المهم ضحكنا واستانسنا الين الساعه حوالي 3 الفجر بعدها اتصلت على الفندق يشيلون

اغراضهم وطاولتهم وانا واياها توجهنا للشاطيء وجلسنا على الرمل ورجلينا في المويه

طبعا انا ثوبي رايح فيها من الأساس وهي من الفرحه قالت خلاص هذا الفستان بعلقه

في دولابي ذكرى وما عادني لابسته ابد الين اموت !!! <<< أقول لكم الحرمه فاقده حنان

تصدقون ما طلعنا لغرفتنا الا الساعه 6 صباحا ...أذكر اني وصلت الغرفه وناوي اتروش

بس ما دريت عن نفسي اني نمت الا الساعه 2 الظهر !!!

قمت ولقيتها نايمه وقعدت اجهز للفطوروشبكت المويه على السخان وطلعت التوست

والجبن وزبطت الشاهي وقربت العسل و( زبدة الفول السود) وحطيتهم على الطاوله

وناظرت والا هي قايمه وفاقه كشرتها من الأبتسامه

أفطرنا وقمت فتحت لها الجهاز وشبكته على النت ولبست شورتي ونزلت للمسبح

بنفس جدول امس...بس هالمره تعرفت على واحد استرالي( دب ) جاي ترانزيت ثلاث ايام

في دبي وقعدت اسولف انا وياه على بار المسبح وكان محور كلامنا عن الأرهاب

المهم أني أقنعته في الأخير ان الأرهاب غير مرتبط بديننا وأنه موجود في كل الملل

بس طبعا البروبيقاندا الأمريكيه والميديا الغربيه كبرت الموضوع <<تراي مانيب سهل

المهم ان الرجال صار صديقي وبدأ يمدح في الخليجيين وانه ما توقع يشوف دبي كذا

وأنه كان يتصور ان دبي عباره عن بعارين وخيام ...والخ , واثناء كلامه مر واحد من

ربعهم استرالي هو وزوجته وسأله ذا الطحش الي معي هاه وش أخبار رحلتكم ؟؟

قاموا يمدحونها وانها تجربه روعه وأنها أحسن من الي في استراليا... وأنا ذاب اذني

عندهم واتسمع وش السالفه !!

ويوم التفت علي سألته وين هم رايحين <<<< شفاحة أهل سدير

قال لي انهم راحو برحله بحريه على يخت !! مدة 16 ساعه من 6 مساءا الى10 صباحا

قلت طيب لحالهم والا معهم ناس ؟؟ قال لا لحالهم !! قلت طيب ابي منك خدمه تعطيني

عنوان هالشركه ...أبتسم وقال ما يحتاج اعطيك عنوانهم ..شف مكتبهم في الفندق!!

وفعلا انا ما صدقت خبر رحت لهم على طول ولقيتهم فعلا جنب اللوبي لهم مكتب وعندهم

رحلات جماعيه وفرديه باليخت !! بس يوم سألت عن أسعارهم والا هي نااار!!

قلت للموظف(أماراتي ) طيب مافيه بدايل ؟؟ يعني شركات رخيصه شوي !! قال فيه

موجودين يم الخور هناك وفيه بأبو ظبي وايد عند كاسر الأمواج يأجرون ..قلت زين

أجل نروح نشوف ابوظبي ونتمشى فيها يوم ..ونمر على هالي يقول ..

وفعلا قررنا اننا بكره نروح لأبوظبي أول مانقوم من النوم ونتمشى فيها وأسواقها

وإذا خلصنا نرجع نبات في دبي ..

طلعت فوق لمرتي وعلمتها بالخطه ولبسنا وطلعنا يم مول الأمارات الرائع وأول ما

وصلنا له حجزنا على فيلم الساعه 8 ثم طلعنا نتمشى ورحنا للمدينه الثلجيه وقعدنا

نتزحلق مع هالعالم ( والله ونس) لأننا ما كنا نقول لا والله حنا كبار على الملاهي والا

على التزلج ...لا ...لا ... كنا ندخل الملاهي والألعاب ونجرب كل شي وكأننا اطفال

بس كنا فعلا نستانس ..

ويوم خلصنا من الملاهي والتزلج رحنا نحضر الفيلم الأجنبي (شوتر)الي بدأ الساعه

8 المساء وكان فيلم (مهوب جديد مره بس انا ماكنت شايفه من قبل) بس الفيلم حليو

وعقب الفيلم رحنا يم وسط دبي (جهة الخور) وقعدنا بقهوه هناك مهيب شينه ,

وجلسنا بها المقهى الين بعد منصف الليل ورجعنا للفندق لتنفيذ الخطه الأولى الي

عقبها قلدونا الخليجيين الي بالفندق كلهم !!

هذا الله يسلمكم الفنادق الي على شاطيء الجميره كلها (هبتور - ميريديان - الهيلتون

جميره بيتش....ألخ) عندهم نظام ان الشاطيء يعمل حتى الساعه 7 مساءا... وطبعا

الي يستفيد من الشاطيء منهم ؟؟؟

الأجانب .... بس الأجانب ... يتفصخون على هالشاطيء عشان تحرق بشرتهم

بينما حريمنا بهالعبايات وهالحجب ما يقدرون يستخدمون هالشاطيء!!

فأنا فكرت اننا ننزل نسبح آخر الليل !!

وفعلا حرمتي لبست مايوه اسلامي (اسود في اسود) وكم طويل وبنطلون طويل

وانا خذت اغراضي وفوطنا وحطيتهم بكيس ...ونزلنا للشاطيء بكل ثقه ...

وتونا طابين في البحر وحاطين اغراضنا على الطاوله الا وسيارة من شرطة السواحل

حقت دبي تجينا ...وطلعت لهم والا ظابط اماراتي ومعه شرطي ثاني ...ووالله ان ابن

الحلال كان مؤدب جدا وقال لي انتوا نازلين البحر(ممنوع) بها الوقت !! قلت يالحبيب

معليش متى ننزل البحر ؟ في النهار هالمفاصيخ !! والحر والشمس!! وخنا عاداتنا

ما تسمح !! والحين الوقت المناسب..والله ان الرجال قال لي برافو عليك بس رجاءا

لا تدخل بعيد عشان مصلحتكم ومسؤليتنا ... قلت ابشر.. وراح الأجودي .. وكان في

هالوقت السيكورتي حق الشاطيء ينتظر الين يخلص الظابط ثم جاني وقال هاه ايش

قال لك ...قلت ابد طلب مني ما ابعد.. قال بس .. قلت بس.. قال لي ترا احنا بالفندق

نخلي مسؤليتنا بعد ... قلت شكرا ما نبي منكم شي ما قصرتوا امس ..

وفعلا قعدنا نسبح ..ونشوف هالسعوديين والخليجيين الي يمرون الشاطيء من جوا

الفندق (كل واحد معه حرمته ومسوين فيها رسميين ) ...بس ثاني يوم أكثر من

اربعه الي نزلوا يسبحون بعوائلهم

واليوم الي بعده زاد العدد وأخذ يتصاعد تدريجيا ... وصارت فله آخر الأيام ( من بعد

10 مساءا الين الفجر والشاطيء يدهرون فيه الخليجيين ) حتى ان السيكورتي كل

ما شافني يقول انت الي خربت نظامنا ... وأقول له لا أنا الي زبطت نظامكم !!

المهم ان مرتي مارجعت للرياض الا والبحر والسباحه طالعه من خشمها ( وفعلا

أوفيت بوعدي الي قطعته على نفسي )

نرجع لليوم الي بعده على طول من يوم قمنا رحنا لأبوظبي الساعه 2 ونص بعد

الظهر وتوجهنا مباشره لسوق مارينا ابوظبي ثم طلعنا لشاطيء كاسر الأمواج الي

دلنا عليه الأماراتي ... وفعلا لقينا فيه قوارب حقت رحلات بس كلها جماعيه ويوم

سألت واحد عن الرحلات الخاصه دلوني على شخص يأجر رحلات خاصه وأسعاره

معقوله ...ورحت له (هو نفسه صاحب السفينه حقت المطعم العائم في شاطيء

كاسر الأمواج بأبوظبي) قلت له ابغى قارب خاص لمدة يوم كامل قال لي احنا يوم

كامل عندنا من 6 مساءا الى بكره 10 صباحا قلت أو كي بس بكم ؟؟ قال الويك

اند ب 2000 درهم ووسط الأسبوع ب 1500 درهم قلت انا ابغاها بوسط الأسوع

بس ابيك تراعييني خصوصا انه راح يضيع علي يوم بالفندق ماراح استفيد منه!!

قال تبي تركب الحين يالله عشانه فاضي بحسبه لك نهايه ب 1200 درهم قلت

توكلنا على الله ...قال اجل تعال بعد ساعه تلقى القارب(اليخت جاهز) وجيب معاك

اغراض الطبخ لأن اليخت فيه مطبخ وبهارات وملح وزيت بس الباقي جيبه انت

قلت ابشر والله وفعلا رحنا ندور سوبر ماركت ( تعبنا ندور- يحليلك يادبي) المهم

اخيرا لقينا سوق وخذنا اغراضنا (رز +دجاج متبل جاهز + فحم للشوي + حلويات

+غصاير +موية شرب ....الخ)

التفتت علي حرمتي وقالت طيب انا ما جبت ملابس...قلت عادي خذي لك من هنا

اي شيء الله واكبر عاد حنا بنروح نشخص... وفعلا خذت لها بنطلون رجالي

أسود ( يضحك شكله عليها) وقميص كحلي ب 50 درهم (عندنا من ابوعشره)

طلعنا من السوق على الموعد ووقفنا سيارتنا مقابل المقاهي الي في كاسر الأمواج

وخذنا أغراضنا ونصينا الجماعه ...وطلب منا اننا ننتظر 10 دقايق لأنه بالطريق

وفعلا جا القارب وكان حجمه حلو مره وفيه كبينه اماميه للسائق مع حمام صغيرله

وقز صغير ( بس حنا ما خليناه يطبخ طول الرحله وكنا نحسب حسابه في الأكل)

وخلفها فيه القسم الرئيسي للقارب عباره عن غرفة نوم حجمها صغير بس حلوه

ومطبخ بالغرفه ودورة مياه.. وتطلع من الخلف بدرج على جلسه حليوه على

سطح القارب من الخلف... بصراحه القارب يناسب شخصين او ثلاثه مرتاحين

وفعلا انطلقنا في عرض البحر الساعه 6 وربع مساءا وكنا متخوفين في البدايه

( رغم تطمينات صاحب القارب بوجود أجهزة السلامه وأنهم اخذو اذن من الأرصاد

الجويه قبل يطلعون ) بس طبعا كان فيه شوية رهبه في البدايه ...بس بعد شوي

صارت عادي جدا..قضينا ليله جميله وهادئه جدا في وسط البحر.. وكان للأمانه

السائق الفلبيني في منتهى الأدب والأخلاق لدرجة اننا ومالكم علي حلف ما نشوفه

الا اذا جيت اعطيه الأكل او العصير أبد جالس في هالكبينه ...وبالذات يوم طفا

المحركات بالليل شغل له الرجال أفلام على السي دي (افلام هنديه وهو فلبيني !!)

المهم اننا سهرنا ذيك الليله الين الصبح (عن الحلف غفينا على سطح القارب

يمكن الساعه 4 وقمنا الساعه 6 الصبح على الشمس برى) يوم قمنا رحت اشوف

السواق الا هو نايم !! قلت للمعزبه يالله بنطب !! قالت لا والله وان جانا سمك قرش!!

قلت مصدقه انتي الأفلام!! يالله البسي بس خلنا نطب !! بصراحه انا بعد قلت يمكن

فيه خطر !! مالنا الا هالسواق نسأله.. رحت له وطقيت الباب عليه يوم قام من النوم

عطيته عصير وكروسان جبن يفطر... وسألته هاه نقدر نسبح هنا ... قال تبون

تسبحون ؟؟ قلت إيه قال لا انتظر اوديكم مكان زين للسباحه .. وفعلا شغل الرجال

ومشى بنا حوالي نص ساعه بسرعه عاليه ... ويوم وصلنا مكان ( الشاطيء

نشوفه من بعييييد) بس الصراحه كان فعلا مكان رااائع والمويه سبحان الله شي

خياال وفعلا وجه القارب لم جهة الشاطي وقال خذوا راحتكم !!! يحسب ان حرمتي

بتلبس بكيني !!

المهم والله استانسنا وسبحنا وكان يوم جميل جدا وسط البحر

نسيت اقول لكم اننا ماشوينا وقلبناها أمس كبسة دجاج لأننا لقينا قدر كاتم عندهم !!

رجعنا الساعه عشر ونص للشاطيء كاسر الأمواج وركبنا سيارتنا وعلى دبي ورحنا

فندقنا وكبرنا الوساده لأننا ما نمنا طول الليل ..

قمنا الساعه 6 مساءا وطلعنا نتمشى في دبي ولكي أختصر الأماكن الي زرناها

وبرنامجنا للأيام التاليه :-

* ركبنا الباص العجيب (برمائي) يلف دبي والخور

* تمتعت زوجتي في مدينة الألعاب المائيه (الولد وادي )وسبحنا فيها ولعبنا

انا وياها بها لممرات المائيه وهالقوارب وكانت هي محافظه على حجابها

ولابسه كاب خاص بالمطافش وما منعها من انها تستمتع بكافة مرافق الولد

وادي ( ما عدا بعض الزحاليق رفضو انها تركبها بحجة ان الكاب ممكن يسبب

خطوره وينشب فيها )

* مطعم البوم العائم ( أكبر مقلب ) وحاجرين الناس بوسطه ومانعينهم يطلعون

فوق سطح البوم هذا غير ان أكلهم زفت ..لقينا ثاني يوم مطاعم عائمه عند خور

دبي أطلق منه وأرخص.

* جلسات المارينا رايقه للعوائل الي تبي تسهر في دبي..

..........

هذا مختصر لرحلتي أسبوع العسل الي حاولت بكل جد وإجتهاد اني اكون رومانسي

وقررت فعلا اني في هالأسبوع اني أعيش اجواء الرومانسيه

بس..




انتظر ردوودكم الحلوه

دلووع آمـه

مشكوور

مشكوور متيم طلآل

مشكوور ع المرور

مشكور يبغالي شهر عشان اقراها

حمدان مشكور ع المرور

[align=center]
هههههههههههههههههه بصراحة استانست وياهم و أنا أقرأ

بس عندي سؤال ؟؟

متأكد إن بطل القصة سعودي الأصل و المنشأ ؟؟

>>> أكييييد فيه عرق خارجي وإلا ما أكون أنا فصولة خخخخخخخ :59ar:

دلوووع يسلمو على القصة الختييييييييييييييييييييرة

تحيتي

فاصلة بيضاء
[/align]

ههههههههههههه

مشكوور دلووع امـة

فاصلة بيضاء
متيم طلال

تسلموون ع المرور

استدار راسي

هههههههههههه

توني ماقريت الجزء الثاني

يسلمووووووووووووووووو

انوآر آلشمآل

تسلمي ,, ع المرور

[align=right]




قريت بدآيتها شكلها ممتعه
فكآهية شوي ..



لي عوده أكملها كلها ..
لكن الآن تنقل إلى القسمـِ المنآسب [/align]

هههههههه يــعــآفيـك ً ربــًِـي ً يالغلا

الله ً لآ يحــًـِـرمنـــًـِـآ من جـديـًِـدك ً يالغـًـِـلآ


تحياتي لك ً

عـاأإزف ً المشـاأإعـر ً

تسلموووووووووووون

[align=right]

المضمون رووووعــة ،،
مع آنو لو آختصرها شوي
عن جد حسيت حالي عايشة جوهم ،،
وياليت شباب هاليومين يسووها ،،
لأنو ثلاث آرباعهم يسافروا للمتعة الحرام ،،
وتاركين حريمهم لا حول لهم ولا قوة ،،
الله يهنيه ويسعده ،،
ويبارك له وللجميع ،،
دلوووع ،،
يعافيك ربي ع الطرح الشيق ،،
كل الشكر لك ،،
[/align]

هـآيـدي

مشكووورة