شرح للأبراج .. ههههههه ..~

بسم الله الرحمن الرحيم
هذا شرح للأبراج لاكن بطريقه الي كاتبه :P

برج الكيرم من 15 محرم إلى 15 صفر
انت سوف تكون من أسباب ضياع مستقبل ابوجيرانكم الوظيفي..بسبب كثرة تسلقك
للنخل..ولن تترك هذه العادة الا بعد ان تصلفط على خشتك عدة مرات متلاحقة..مما
قد تسبب حدوث انفصام في شخصية برطمك..فا يبدأ برطمك بالأحساس انه خشم وليس
برطم..حينها سوف تتوهق توهيقتن كبيرة...وافلقني ياشيخ ان كانك مملوح..

- برج البيالة من 15 صفر إلى 15 ربيع أول
تدخل بقالة مايبيعون كراث..وانت طالع تزلق بقرطاسة بسكوت ريكو..ويمر هايلكس
محمل ثلاث هنود ويطشم عليك ماء من اللي بالأرض..عاد تخاف ان خشتك تغيرت
ملامحه
..وتصاب بحالة من الدلاخه تستمر ثمانطعش دقيقه..وتزيد حالتك الأستدلاخية شيئا
فشيئا..وتروح تاكل فصفص سوبر مصري ..ويجيك مغص باصبع رجلك
الوسطي..وبعد مدة
تلاحظ ان كل الي اكلته سابق الذكر..قاضية مدته..باختصار..انت حظك رايح فيها.

برج خبز الصامولي من 15 ربيع أول إلى 15 ربيع ثاني
تفحيطك بالسيكل منذو صغرك..قد تسبب في ان يكون هناك سوء تفاهم بين عيونك..مما
اضطر ان يقوم ابوك بتصفيقك كل يوم على باله يبي يعدل عيونك...وسوف تبتسم لك
وحده عند بقالة وهي المرة الأولى والأخيرة..وتبي تضيع علومك...وتقوم انت وتبدا
تسحب جلنطات بالددسن..وتصدم عمود لمبه مكتوب عليه ذكريات ام سعد..ويجي
ابوسعد ويتمردغ ببطنك لين تقتنع بالمثل اللي يقول كن دلخا تعش حياتك هنيئا..

برج الطرمبه من 15 ربيع ثاني إلى 15 جماد أول
ادمانك للعب السوني ( بلاي ستيشن )..سوف يعرضك للأنفلاق بقوطي حمضيات من اخوك
الصغير..وزعقه من امك ( يعني تهزيئه بصوت مرتفع )..وراح تتولد في طيات خشتك
ردة فعل تجاه القواطي..مماسوف يجعلك عرضة لسخرية جميع الحلاقين..ولكن ومع كل
هذا...انت جميل الوجه..وسوف تكون احد اسباب تحويل طالبات حارتكم اللي داخلات
قسم طب..يدخلن قسم آثار..

برج الملعقة من 15 جماد اول إلى 15 جماد ثاني
تأثرك السريع بمايحدث حولك..قد يتسبب في تغيير اسمك من سمير الى الهام
شاهين..لأنه راح يصادف انك تدخل على ناس يناظرون تمثلية مصرية بطولة تحية
كاريوكا..ومادري وش دخل الهام شاهين...انت طويل وخبل..والمثل اللي يقول..شف
وجه العنز واحلب ببسي..قايلينه في..
كثيرا ماتفقع وجهك من اللموزينات..حيث انك تفضل ركوب الباص او مع راعين الدداسن ابو ريالين او خط البلده بالنسبه للي ساكن بالرياض..

برج البردقانة من 15 جماد ثاني إلى 15 رجب
نطقك للحروف..رايح فيها..وقد يتسبب في ان يمسكك اربع عرابجه..ويلبسونك سترتش
ضيق مره..ويعصرونك لين تقعد تصيح..وتجيك جلطة دماغية بخشمك ..ويطيح شعر
سيقانك..وتنفصل ركبتك عن يدك..وتصيبك حالة من الجزع والهلع..بسبب كثرة تنسيم
الكورة من النخل اللي بحوشكم....حظك تبي تلقاه تحت زولية مقلط رجال بشقة
باكستانية ساكنين بغينيا الجديده جنوب لندن..مقابل تموينات ابوسعد..

برج الدلوخه من 15 رجب إلى 15 شعبان
انت اذكى انسان بالعالم...في نظر نفسك..ينلعب عليك بسرعه..يعني مخفة..لو
يقولون لك انقز من الفيصلية قلت لا ابنقز من عمارة المملكة اطول شوي..تتمتع بشخصية
قوية عند زملاؤك اللي من نفس فصيلتك الأستدلاخية..كثيرا مايحالفك الحظ في
الأشارات فغالبا اذا وصلت الأشارة تصير خضراء..احسن مافيك انك تدربي راسك ولا
تدري وش الدنيا..فأنت تعمل بالمثل القائل..اضحك للدنيا ولو تفلت بوجهك عادي..

برج ولا شي من 15 شعبان إلى 15 رمضان
اشخاص هذا البرج مادري وش يبون من الدنيا..اللي مولود في هذا البرج..من رايي
السديد انه يروح لأقرب طريق سريع ينسدح فيه على امل يدعسه قلابي ان شاء الله..ومع
ذلك حظهم يكسر الحصى..

برج صعفق من 15 رمضان إلى 15 شوال
انت حظك متدودل من عمود لمبه ملبق جنبه سيكل هندي مربوط بسلسله وإذا أنسرق
هالسيكل يحسبونك انت اللي سارقه..ويدفعونك غرامة وتنسجن مع واحد غني..وتسلفه
عشرين ريال لأنه مامعه صرف..واذا طلعتوا من السجن يبي يردها لك عشرين الف..وتبي
تنبسط..وبالأخير يمسكك ابوك ويمحطك بالزبيرية عشانك اخذت ربـــــا....باختصار
حظك تلقاه تحت قوطي ميرندا فراولة الشكل القديم شاربه سوداني مدرس املاء...

برج اخوه محماس من15 شوال إلى 15 ذو القعدة
يطلق عليك لقب البطران..لما تتمتع به من فزعة لجميع اخوياك الطفارى..وتباشر
عليهم..وهذا قد يؤدي الى مردود عكسي حسب النظرية الفيزيائيه تروش ولو بتراب
فتراب خير من ولاشي...انت ماناقص الا تهتم بنظافتك الشخصية....واذا بغيت تتنكر
ولا يعرفك احد انصحك تتروش عشان تتغير ملامح وجهك...انتبه من سواقكم..لأنه قد
يكون سبب في تأخر ولادة العنز اللي انت شاريها....ولو اني داري انك منتب وجه
سواقين..

برج الزبيرية 15 ذو القعدة إلى 15 ذو الحجة
يتمتع اصحاب هذا البرج بالذكاء الفائق..لدرجة انهم يدخلون الأختبارات وهم
ماذاكروا..تبي تشارك بمن سيربح المليون..وتبي تاصل للسؤال الأخير..بس يبي يدق
عليك خويك بآخر لحظه ويعلمك ان بنت جيرانكم ماتحبك..وانه رايحه وطي مع ابوك
وتموت فيه ..وتصاب انت بحالة تسمى الأستصطال المزمن...ويدخلونك مستشفى وتجي ممرضة ووتفقد الذاكرة هالممرضه وتحبك بالغلط وتجيبون عيال تسمونهم على اسم خال
امك من الرضاع

برج النمله المنسدحه من 15 ذو الحجة إلى 15 محرم
خشمك كبير..وانت معيي تقتنع بهذه الحقيقه..كبر خشمك سوف يسبب لك مشاكل اذا
جيت تصور..فيضطر المصور انه ياخذ لك صورتين وحده لك والثانيه لخشمك...يصارحك حارس استراحتكم بأن خشمك كبير..فتنفخ عليه انت..فيعبر عن مشاعره ويقوم يفقع
وجهك و يصير وجهك كنه علبة هندسه مافيها منقله..بس فيها مثلث..والفرجار ضايع....ومع
كل ذلك تبي تتزوج وحده تشبه ساندرا بولوك..يابختك ياعم.. أخسسس


فى الاخر احب اقول كذب المنجمون ولو صدقوا

تحديدا لبعض الناس المصدقين بالأبراج

اعجبني ونقلته

خخخخخخخخخخ
تسسسلم

هههههههههههههههههههههههههههههههههههه

وربي تووحفه

يعطيك العاافيه اخووي

ونستنااااااااااااااااااا

وصراااحه كلام مدري من ويين جاايبينه خخخخخ

هههههههههههههههههههه
مشكور

منورين والله ..

دووم الوناسه إن شاء الله ..

تحياتي لكم

ههههههههههههههههههههههههههآي

يسعدك ربي ع هيك فرفشهـ

اشكرك اختي على المرور ..

تحياتي لك

هههههههههههههههه
شرح رهيب
شبابي حايل
تشكر على هالفرفشة

ههههههههههههههه
يعطيك العافيه

هههههههههههه

يسلمؤؤؤؤؤؤؤؤؤؤ

اشكركم على المرور جميعا ..

نورتوا وافرحتوا

هههههههههههههه
تسلمين غلاي<~