بروق خير

شاعراً أبدع في شعره وألقاءه قطف من ثمر القصيد وأعذبه نهل من اقوى المعاني وأسمآها الشاعر المعروف ..نشمي حامد المويعزي الحربي .. وقصيدة بعنوان " بروق خير "

الضيقه اللي بالصدر عيّـت تـروح
حاولـت فيهـا ماقـدرت ازيحـهـا

ضيقة صدر كسرى بعد فتح الفتـوح
يـوم الأعـادي مانـفـع تسليحـهـا

لا وآوجودي يالبـروق اللـي تلـوح
مثل السيوف البيـض فـي تلويحهـا

بيدين من يروي شبا السيـف الذبـوح
اللـي ليـا شـاف العـدا ياويحهـا

أليا بدا سيفه يشوح الـروس شـوح
ذكّـر علـي اللـمّـع وتكشيحـهـا

بروق خير تلوح بالمـزن الصبـوح
والريـح دوبـه كـف مـن تلقيحهـا

مزنٍ مابيـن الأرض والقبـه سبـوح
مثـل الطيـور الكاسـره تجنيحهـا

والأرض كبدٍ من ضما الوسمي تفوح
فوح الـدلال البيـض مـع تبريحهـا

والمزن هل وعل قبـل إنـه يـروح
لين الحـزوم السـود بيّـن سيحهـا

والأرض صارت كنها البنت الطموح
فستانها اخضـر والفـراق مريحهـا

فستانها الخضره وخاطرهـا سمـوح
وريح الخزاما والشمطـري ريحهـا

وفياضهـا مكتظـةٍ فيهـا السـروح
اهل البـل اللـي همهـم تصليحهـا

من عقب ماترعى الهراس من السفوح
اعاضهـا الله بالفيـاض وشيحـهـا

ذودٍ ليا عرّض على عيـون الشفـوح
تدمـع عيونـه مـن كبـر تفتيحهـا

هذا دوى الضيقه وتضميـد الجـروح
من عالـمٍ عسـى العزيـز يبيحهـا

ناسٍ عن الدرب العدل فيهـا جنـوح
وتشـرّح الجثـه بعـد تشريحـهـا

والضيقه اللي بالصدر عيّـت تـروح
يمكـن مجاديـح السحـاب تزيحهـا