˚ஐ˚◦{ ♥ ذكريات المدينه˚♥}◦˚ஐ˚

السلام عليكم ورحمة الله وبركاته ’’’’

حبيت انكم تشاركوني ذكرياتي لاني من فتره لقيت مذكراتي القديمه با الصدفه وانا ادور على غرض معين
من زمان ماقريتها لاني ماحسيت ان مر الوقت بسرعه على ذيك الذكريات لكن تفاجئت اني كاتبه التاريخ
والمذكرات صار لها حوالي تسع سنين
وخطي خط طفله عمرها 16 سنه المهم يمكن راح اطول بسرد الذكريات على حسب ماهو مكتوب با المذكره
صراحه لما عدت قرياتها تفاجئت من احداث صارت لنا وتذكرتها
على فكره الموضوع فيه فرفشه وشوية مواقف صعبه لكن قلت الفرفشه يمكن اقرب للموضوع

قبل لا ادخل با المذكره ’’’ مقدمه بسيطه قبل احداثها

كنا انا واهلي ناويين نسافر للمدينه المنوره ومكه ناخذ عمره ونرجع وكان اللي يسوق السياره اخوي اكبر مني بسنه عمره 17 صغير ولا بحياته سافر ولا حنا

اتركم مع احداث الرحله ,,,,


الاربعاء \ 4\7\ 1423 هــ
مشينا الساعه 4 الفجر ومعنا اغرضنا فوق السياره بطانيات ومخدات وكل شي ( اول سفره وكل شي ماخذينه كاننا نبي نسكن هناك ههههه)
نكمل ماهو مكتوب با المذكره \
قبل ما نطلع من حايل كنا انا وساره و وليد وراء قاعدين على الكراسي اخر السياره
وليد ( عمره سنتين )
ايه وبعدين انا وساره قعدنا نسولف ونكركر فجأه وليد يتكلم بشي مو فاهمينه ويشر لنا على الشارع يا الله فهمناه لقينا البطانيه اللي فوق السياره طاحت با الشارع
ابعدنا حيل عنها قلنا لسلطان ( اللي يسوق ) ارجع البطانيه طاحت قعدت السيارات اللي ورانا تبعد عن البطانيه ولا احد نبهنا او ضرب بوري الظاهر انهم يحسبونه واحد فاطس
رجعنا وخذيناها وكملنا المشوار (ماطلعنا من حايل تو )

ويوم طلعنا من حايل يمكن مسافة الميه وفوق شوي قامت السياره شوي شوي تمشي وفجئه وقفت
انا خفت وكلنا اللي با السياره خفنا لاننا وقفنا بمكان مافيه احد ابدولا معنا احد يساعدنا
بس واحد مايهمه تخرب السياره او لا وهو متعب ( تسع سنين ) قعد يلج على روسنا
نزل سلطان وصلح السياره بعد محاولات كثيره
المهم مشت السياره الحمد لله
وصلنا للمدينه الساعه 11

عاد رحنا لشقه فيها غرفتين ومطبخ وحمام اجغين با الحيل ( يعني صغير الله يكرمكم )
المهم ماجانا نوم الا يوم جت الساعه عشر با الليل ابتلشنا كل واحد مايدري وين ينام ( مو متعودين الا على غرفهم ههههه)
اللي نام على السرير واللي نام بدون بطانيه واللي نام على الارض واللي نام بدون وساده
عاد نمنا واصبحنا
اول صبح لنا با المدينه كل واحد عنده برنامج يبي يسويه
قعدنا نتفرج على الناس اللي يكب البطيخ عند باب بيته والزباله عند عينه
يوم جاء العصر انقسمنا قسمين سلطان وساره وفايزه وريم راحو لسوق (نسيت اسمه هههه بس كان راقي )
وانا وامي والعيال الصغار وسلمى الصغيره رحنا لسوق كل محل يشبه الثاني لا عاد حنا ندخلهن كلهن رغم التشابه مو حلو لا وبعد غالين

’’’’ الموقف الصعب ’’’’ يوم الجمعه
قمنا من النوم واستعدينا نبي نحضر اول صلاة جمعه با المدينه ( اول صلاه لي بمسجد ولا الجمعه وبا المدينه شي ما انساه)
المهم \
كلنا قمنا من النوم واستعدينا الا وليد ( سنتين ) راحت امي تصحيه با الغصب تبينا كلنا نحضر سوا ونطلع كلنا جميع والشقه مافيها احد عشان كذا خذينا وليد معنا

رحنا للمسجد كان زحمه دخلنا وحضرنا خطبة الجمعه اول مره نحضر خطبه جمعه حنا الحريم
وكانت الخطبه حول التعليم والدراسه
خلصت الخطبه والصلاه وقمنا ندور وليد مالقيناه ( اقشعر بدني خووووووف )
رحنا ندور عليه با الحرم مالقيناه داخل المسجد بعد مالقيناه
نصنا راح للشقه يدور عليه ونصنا كمل البحث با المسجد وبقمة الحر وحافين الاقدام ارض الحرم عكس نور الشمس على عيوننا من كثر ماندور عليه هناك
امي ايئست وقالت ياليتني ماغصبته يروح ياليتني خليته نايم با الشقه امي انهارت وسلطان مارجع للشقه ابطى يوم مر حوالي ساعه ونص من البحث جاء للشقه ويائس
بغلو الشرطه والشرطه ماعندها غير انهم يزودون املك ايه تلقونه راح تلقونه ولا يبحثون
مرت ساعتين ونص من اختفاء وليد قلت لسلطان خلنا ندور عليه مره ثانيه قال بلغنا والشرطه اكيد تلقاه اما امي قطعت الامل انه بخير اكيد صار فيه شي مو الى الحين هو بخير

انا انقهرت شفتهم احبطو وقطعو الامل وجالسين
لبست عباتي وقلت انا ادوره ماعلي منكم لو اضيع قالت اختي الكبيره انا ابي اروح معك

لقينا تحت العماره عيال صغار يلعبون قلنا ماشفتو ولد صغير جاء هنا او شكله ضايع
قالو لا
رحنا نبي نبحث عنه على رجولنا من الشقه للحرم مسافه طويله لكن سبحان الله ولا طلبنا مساعده من احد وقفت سياره وحنا على طرف الشارع واقفات ظن اننا نبي توصيل
قال تحتاجن توصيل قلنا له السالفه
قال اكيد انه حول الحرم مو بعيد حنا راح ندور هناك وان شاء الله تلقونه با اذن الله
بصراحه فرحت من كلامه حسيت باالامل بعد ما انقطع الامل عند اهلي زاد املي بكلامه الله يجزاه كل خير
الحمد لله فايزه معي لاني كنت ضعيفة نظر وحنا ندور عليه لمحته فايزه هذا هو وقف وقف انا ما صدقت وينه وينه
فتحنا النافذه وقمنا نصوت له وليد وليد هو شافنا من بعيد قام يركض ويتخبط بركضه وحافي وكان الجو حار
نزلت من السياره واسرعت فايزه وضمته وقامت تتفقده هو سليم والحمدلله سليم ماتعرض لمكروه
رجعنا للشقه من بعد البحث الطويل ودخلنا والكل تفاجئ والشرطه ما سوت شي الولد باين حافي وصغير ويمشي لحاله حول الحرم وربي انقهرت منهم لكن الحمدلله
وبا النهايه ما كملنا مشوارنا لمكه رجعنا لحايل بسبب تأثير الموقف اللي صار