][ .. قراءه في روح الشاعر خالد .. ][

.
.
.







وهنا شاعر أراد ان يتلاعب بالألفاظ والكلمات .. ويقذفها بوجه شاعرنا دون سبب ! فأمطره شاعرنا بهذه الابيات






إتّضح لي قبْل ابادلْك القصايد
.......... إنّك بْكبْرك ولا تسْوى قصيده !

شاعر ٍ محبوب ماهي لك عوايد
.......... جابك الله طحْت بلْسان الوليده

غيرتك صارت على خصْمك فوايد
.......... ما هقيتك ترْفس بْقاع المصيده

خلّك متابع لْشعْري بالجرايد
.......... لا يفوتك يوم ما تشْري جريده

واطْلب الله دوم يا طير الهدايد
.......... يرْزقك دامك تفرَّشْت الحديده !








وهنا ردع محاولات بائسه قام بها البعض .. ! الموقف يستدعي المباشره .. مع القليل من الكوميديا .. حيث ان المناوره أخويه !







رزقي على الله دام وصْلك شحوحي
.......... مانيب مثلك تشْحذ [ الغير ] نظْره

سلامتك وش فيك تشْكي الجروحي ؟
.......... يا جرْح ما ينفع بك عْلاج وابره

تضْحَك على الجهّال كنّك نصوحي
.......... وانت النفاق بْعين طبْعه وغدْره

شِعْري مهو مثلك [ تعالي و روحي ]
.......... بعض القصـيد اللي تقوله مَغَرّه

شِعْري تَأَمَّل فيه لا صرْت توحي
.......... ونْ صرْت غاير لا تمرّ وْ تحرّه

خَلّ السوالف في قصيدك تبوحي
..........واتْرك لي احْساس الهواوي وعِطْره

شِعْري مكانه فوق ذيك السفوحي
.......... أَبْعَدْ على خشْمك من اقْصى المجرّه

مثل القمر يسْهر مع الناس ضوحي
.......... وانته مع نْجومك تمنّ وْ تشَرَّه

شِعْري يخصّ اهْل المزاج اللحوحي
.......... اللي لهم في كيف الاشعار نعْرَه

مجبور تخْضع للعدل يا [ سطوحي ]
.......... مالك ومال اللي رقى الغيم قدْره

صدْري وسيع وْراس ماله مزوحي
.......... بس انتبه لا ضاق يطْلبْك عذْره

زود الغباوه فيك يرْضى طموحي !
.......... مير البلا لا صرْت مسْموع أمْره !









هرْجة القفا صفه ممقوته .. فكيف بها وهي تأتي من رفيق أو صديق أو حبيب !






ما نفع بك طيبي وحبي وعطاي
.......... من عطاك ارْجوك بسْ فارق بخير

للطّبع عنوان هرْجك في قفاي
.......... والنذاله مالها عنوان غير .. !

بقْلع جذورك عسى ينْظف هواي
.......... ومن بحر حبّك أبنْجو واسْتخير









هنا ( روايه ) تعبق برائحة الكوميديا .. وتئن بطعم الجراح .. كالقدر عندما يسخر .. ! لون إستطاع شاعرنا أن يعسفه ويروّضه لصالح الفكره .. !








تقول وينك ؟ يا هلا
.......... ليتي عرفتك من بديت
ألْعب واطامر بالفلا
.......... لين احْتواني وانتهيت
خِبْلّ ٍ مريض ٍ مبْتلى
.......... بطْناج ولْسـانه ونيت !
شكّاك ما عمْره سَلا
.......... ملّيت مِنَّه وانْطويت
خالد نصيتك من بلا
.......... شفْني على شطّك رسيت
خذني غرق خذني على
.......... موجك دخيله وارْتميت
في حضْرة عْيون الملا
.......... حبّك فضحْني ما دريت ؟
ما تدري إني يالحلا ؟
.......... من يوم شفتك إكْتفيت ؟
والهمّ عـن قلبي جلا
.......... ماكنت اظنّ انّي هويت
حتى اختفى صوتك فلا
.......... جفّت دموعي لين جيت !
خَــلّ القصايد يالغلا
.......... تاصف شعور ٍ لك فديت
قلت اقضبي درب الخلا
.......... مثْلك حقيره ما رأيت !
قومي ارحلي عني وَلاَ
.......... يطري لك اني بك هقيت
سهْم الهوى يوم اعْتلا
.......... في سوقك الغادر شريت
كِذْبك على عيني انْطلا
.......... واليوم انا مفْلس غديت
يصْلا ضميري ما صلا
.......... قلب ٍ غلبْني واهتويت
من باع دينه لو كَلاَ
.......... بعْقولنا يـوزر و صيت
يبقى مقامه لوْ علا
.......... حِسْبة كَفَر في بسْكليت






لا تمتزج قطرات المطر مع الرمل إلا بأنين هذا الشاعر .. وما الندى على وجهه .. إلاّ .. دموع المحرومين .. !
وهنا يجود الشاعر بنفسه ليفتدي أحلام العصافير .. الذي تعجّ بهم السماء .. ويذوق ما ذاقوا .. ليخطّ بيده طريق حريّتهم وكرامتهم ..
وحينما تبعث الحياه للأطفال حلْما .. ينتهي الظلم وترتفع رايات التغيير ..

قبل الختام نود الإشاره إلى ان هذا النص كان مليئا بالرموز .. وهناك إنزياحات كثيره في النص .. ونجد أثر البيئه متربعا على ألفاظ القصيده وعلى صورها !
فهي ريفيه الألفاظ والمشاعر ..






يا حروف ٍ عامت فـْ بَحْر القصايد
.......... دمعة اللولو متى ناصل مـداها ؟

أبْحري دام الهوى قاسي وكايد
.......... والصعايب تهْتوي روحك كداها

مرْكبك دفتر ومجدافك ( حدايد )
.......... والحبر دمّ ٍ نزف يومه شـداها

ساقتك موجه على درب الشدايد
.......... والأماني صرْخة ٍ يبكي صداها

إكتبيها ملّت طْعون وْلهايد
.......... خانها الداني وقاصيها فـداها !

وش بقى من عرْسها غير القلايد
......... والمكان اللي فضى في منتداها

مع شقـاها عانت سْلوم وعوايد
......... إعذريها لو عنا الهمّ ارتداها

يا نديّه يا ندى مالك ندايد
......... وجْنتك وردة حلا يقْطر نداها

جاوبيني كلما تشكي القصايد
.......... كلمتي ماتت وهي تطلب جداها !



.
.








رجاء ولطفا وكرما منكم عدم المرور لحين الإنتهاء من القراءه


يتبع